ചെന്നൈ: ഡിറ്റ് വാ ചുഴലിക്കാറ്റ് തമിഴ്‌നാട് തീരത്തേക്ക് അടുക്കുന്ന സാഹചര്യത്തില്‍ കടലോര മേഖലകളില്‍ ജാഗ്രത പ്രഖ്യാപിച്ചു. അഞ്ച് ജില്ലകളിലും പുതുച്ചേരി, കാരയ്ക്കല്‍ എന്നിവിടങ്ങളിലും റെഡ് അലര്‍ട്ട് പ്രഖ്യാപിച്ചിട്ടുണ്ട്. ചെന്നൈയില്‍ നിന്നുള്ള 54 വിമാന സര്‍വീസുകള്‍ റദ്ദാക്കിയിട്ടുണ്ട്. അടുത്ത 48 മണിക്കൂറില്‍ അതിശക്തമായ മഴയും ശക്തമായ കാറ്റുമുണ്ടാകുമെന്ന് ഐ.എം.ഡിയുടെ പ്രവചനവും കണക്കിലെടുത്താണ് വിമാനങ്ങള്‍ റദ്ദാക്കിയത്. 

മധുര, തിരുച്ചിറപ്പള്ളി, തൂത്തുക്കുടി, സേലം, ബെംഗളൂരു, ഹൈദരാബാദ്, ജാഫ്‌ന തുടങ്ങിയ സ്ഥലങ്ങളിലേക്കുള്ള വിമാന സര്‍വീസുകളാണ് തടസ്സപ്പെടുക. 

ചെന്നൈ, കന്യാകുമാരി, മധുര എന്നിവിടങ്ങളില്‍ നിന്ന് രാമേശ്വരത്തേക്ക് പോകുന്ന ട്രെയിനുകള്‍ മണ്ഡപത്തില്‍ സര്‍വീസ് അവസാനിപ്പിച്ചിരിക്കുകയാണ്. പെരമ്പല്ലൂര്‍, തിരുവാരൂര്‍, നാഗപട്ടണം, മയിലാടുതുറൈ, കടലൂര്‍, കല്ലക്കുറിച്ചി, പുതുക്കോട്ടൈ, പുതുച്ചേരി, കാരക്കല്‍ എന്നിവിടങ്ങളിലെ സ്‌കൂളുകള്‍ക്കും കോളജുകള്‍ക്കും അവധി പ്രഖ്യാപിച്ചിട്ടുണ്ട്. 

ALSO READ: ഒരുമിച്ചുള്ള പ്രഭാതഭക്ഷണം, പിന്നാലെ ഒരുമിച്ചുള്ള വാര്‍ത്താസമ്മേളനം; അഭിപ്രായ വ്യത്യാസങ്ങളില്ലെന്ന് ഡികെയും സിദ്ധരാമയ്യയും 

ചുഴലിക്കാറ്റിനെ തുടര്‍ന്ന് ശനിയാഴ്ച നടത്താന്‍ നിശ്ചയിച്ചിരുന്ന എല്ലാ പരീക്ഷകളും മാറ്റിവച്ചതായും സര്‍വകലാശാലയിലെ എല്ലാ ക്ലാസുകള്‍ക്കും അവധി പ്രഖ്യാപിച്ചതായും പോണ്ടിച്ചേരി സെന്‍ട്രല്‍ യൂണിവേഴ്‌സിറ്റി അറിയിച്ചു.

ഡിറ്റ് വാ ചുഴലിക്കാറ്റിനെ തുടര്‍ന്ന് പ്രളയത്തിലും പേമാരിയിലും ശ്രീലങ്കയില്‍ 123 പേരാണ് മരണപ്പെട്ടത്. 130പേരെ കാണാതായി. 

ശക്തമായ മഴയും പ്രളയവുമാണ് ശ്രീലങ്കയില്‍ കഴിഞ്ഞ കുറച്ച് മണിക്കൂറായി തുടരുന്നത്. പലയിടത്തും 30 സെ.മി വരെ മഴ രേഖപ്പെടുത്തി. കിഴക്കന്‍ ശ്രീലങ്കയിലും മധ്യ മേഖലയിലുമാണ് കനത്ത മഴ ലഭിച്ചത്. 44,000 പേരെ മാറ്റി പാര്‍പ്പിച്ചു. സ്‌കൂളുകള്‍ക്കും അവധി നല്‍കിയിരുന്നു. ദുരിതാശ്വാസ, രക്ഷാപ്രവര്‍ത്തനങ്ങള്‍ തുടരുകയാണെന്ന് ഡിസാസ്റ്റര്‍ മാനേജ്‌മെന്റ് സെന്റര്‍ അറിയിച്ചു. 

തലസ്ഥാനമായ കൊളംബോയിലടക്കം പ്രളയം രൂക്ഷമാണ്. കൊളംബൊ സ്റ്റോക്ക് എക്‌സേഞ്ചിന്റെ പ്രവര്‍ത്തനം തടസപ്പെട്ടു. 
വ്യോമ, റോഡ്, റെയില്‍ ഗതാഗതവും മുടങ്ങി. കൊളംബൊ ബണ്ഡാരനായകെ അന്താരാഷ്ട്ര വിമാനത്താവളം അടച്ചു. പാലത്തില്‍ കുടുങ്ങിയ 13 പേരെ സൈന്യം എയര്‍ലിഫ്റ്റ് ചെയ്തു. വീടുകള്‍ക്കു മുകളില്‍ കുടുങ്ങിയവരെയും എയര്‍ലിഫ്റ്റ് ചെയ്തു.

അതേസമയം ശ്രീലങ്കയ്ക്ക് ദുരിതാശ്വാസ സഹായവുമായി ഇന്ത്യന്‍ നാവികസേനയുടെ കപ്പല്‍ ഐ.എന്‍.എസ് വിക്രാന്ത് കൊളംബൊയിലെത്തി.

Cyclone Dit Va nears the Tamil Nadu coast; red alerts issued, 54 flights cancelled, and several districts in TN and Puducherry shut schools amid heavy rain forecasts.