ദുബൈ: ഡ്രൈവർക്ക് ബോധക്ഷയമുണ്ടായതിനെ തുടർന്ന് ഷെയ്ഖ് മുഹമ്മദ് ബിൻ സായിദ് റോഡിൽ (E311) ഉണ്ടായ വാഹനാപകടത്തിന് പിന്നാലെ ഡ്രൈവർമാർക്ക് കർശന നിർദ്ദേശങ്ങളുമായി ദുബൈ പൊലിസ് രംഗത്ത്. അസുഖം അനുഭവപ്പെടുമ്പോഴോ അമിതമായ ക്ഷീണം തോന്നുമ്പോഴോ വാഹനമോടിക്കുന്നത് വലിയ ദുരന്തങ്ങൾക്ക് കാരണമാകുമെന്ന് പൊലിസ് മുന്നറിയിപ്പ് നൽകി. കഴിഞ്ഞ ദിവസം നിയന്ത്രണം വിട്ട വാഹനം കോൺക്രീറ്റ് തടസ്സത്തിൽ ഇടിച്ച് രണ്ടു പേർക്ക് പരുക്ക്. സംഭവത്തിൽ പരുക്കേറ്റ രണ്ട് പേരെയും ആശുപത്രിയിൽ പ്രവേശിപ്പിച്ചിരുന്നു.

പെട്ടെന്നുണ്ടായ ശാരീരിക അസ്വസ്ഥത മൂലം ഡ്രൈവർക്ക് ബോധം നഷ്ടപ്പെട്ടതാണ് അപകടത്തിന് കാരണമായത്. നേരിയ ശാരീരിക അസ്വസ്ഥതകൾ പോലും അവഗണിക്കരുതെന്ന് ദുബൈ പൊലിസ് ട്രാഫിക് വിഭാഗം ഡയറക്ടർ ബ്രിഗേഡിയർ ജുമാ സലേം ബിൻ സുവൈദാൻ പറഞ്ഞു. ഡ്രൈവർക്ക് നിമിഷങ്ങൾക്കുള്ളിൽ നിയന്ത്രണം നഷ്ടപ്പെടുന്നത് സ്വന്തം ജീവനും റോഡിലെ മറ്റ് യാത്രക്കാരുടെ ജീവനും ഒരുപോലെ ഭീഷണിയാണെന്ന് അദ്ദേഹം ഓർമ്മിപ്പിച്ചു. അപകടത്തിന് പിന്നാലെ സ്ഥലത്തെത്തിയ ട്രാഫിക് പട്രോളിംഗ് സംഘം ഗതാഗതം നിയന്ത്രിക്കുകയും റോഡിലെ തടസ്സങ്ങൾ നീക്കം ചെയ്യുകയും ചെയ്തു.

ALSO READ: ദുബൈയിൽ വിമാന ജീവനക്കാരിയായ മുൻഭാര്യയെ കുത്തിക്കൊലപ്പെടുത്തി റഷ്യൻ യുവാവ്

രക്തത്തിലെ പഞ്ചസാരയുടെ അളവ് കുറയുകയോ കൂടുകയോ ചെയ്യുന്നത്, ഉയർന്ന രക്തസമ്മർദ്ദം, മാനസിക പിരിമുറുക്കം തുടങ്ങിയ അവസ്ഥകൾ ഡ്രൈവിംഗിനെ ബാധിക്കുമെന്ന് പൊലിസ് വ്യക്തമാക്കി. വിട്ടുമാറാത്ത ആരോഗ്യപ്രശ്നങ്ങളുള്ളവർ കൃത്യമായ ഇടവേളകളിൽ വൈദ്യപരിശോധന നടത്തണമെന്നും തങ്ങൾ വാഹനമോടിക്കാൻ യോഗ്യരാണെന്ന് ഉറപ്പുവരുത്തണമെന്നും ഉദ്യോഗസ്ഥർ നിർദ്ദേശിച്ചു. ദീർഘദൂര യാത്ര ചെയ്യുന്നവർക്കിടയിൽ ക്ഷീണം ഒരു പ്രധാന വെല്ലുവിളിയാണെന്നും റിപ്പോർട്ടുകൾ സൂചിപ്പിക്കുന്നു.

തലകറക്കമോ അമിതമായ ക്ഷീണമോ അനുഭവപ്പെട്ടാൽ ഉടൻ തന്നെ വാഹനം സുരക്ഷിതമായ സ്ഥലത്തേക്ക് മാറ്റി നിർത്തണമെന്ന് പൊലിസ് നിർദ്ദേശിച്ചു. യാത്ര തുടങ്ങുന്നതിന് മുമ്പ് മതിയായ വിശ്രമം ഉറപ്പാക്കണം. ലെയ്ൻ നിയമങ്ങൾ പാലിക്കണമെന്നും ഗതാഗത സുരക്ഷാ മാനദണ്ഡങ്ങളിൽ വിട്ടുവീഴ്ച ചെയ്യരുതെന്നും അധികൃതർ ആവശ്യപ്പെട്ടു. റോഡിലെ അപകട മരണങ്ങൾ കുറയ്ക്കുന്നതിനായി ഡ്രൈവർമാരുടെ ജാഗ്രത അത്യന്താപേക്ഷിതമാണെന്ന് ദുബൈ പൊലിസ് കൂട്ടിച്ചേർത്തു.

dubai police alerted motorists about the dangers of driving under fatigue or illness after a crash on e311. the accident occurred when a driver lost consciousness, highlighting the need for regular medical checkups and taking breaks during long journeys.