നിലമ്പൂര്‍: ചാലിയാര്‍ പുഴയില്‍ കാണാതായ മുതുകാട് കോളനിയിലെ പാടത്ത്പുലയന്‍ സുകുമാരന്‍(45), പുള്ളാളി ശങ്കരന്‍(53) എന്നിവര്‍ക്കായുള്ള തെരച്ചില്‍ രണ്ടാം ദിവസവും തുടരുകയാണ്. പെരിന്തല്‍മണ്ണ, നിലമ്പൂര്‍, മലപ്പുറം ഫയര്‍ ഫോഴ്‌സ് യൂനിറ്റുകളും നിലമ്പൂരിലെ എമര്‍ജെന്‍സി റസ്‌ക്യൂ ഫോഴ്‌സ്, ട്രോമാകെയര്‍ വളണ്ടിയര്‍മാരും പൊലിസ്, റവന്യു വകുപ്പുദ്യോഗസ്ഥരും തെരച്ചിലിനു നേതൃത്വം നല്‍കുന്നു.  
തഹസില്‍ദാര്‍ പി.പി. ജയചന്ദ്രന്‍, നിലമ്പൂര്‍ എസ്.ഐ. മനോജ് പറയറ്റ, നിലമ്പൂര്‍ വില്ലേജ് ഓഫിസര്‍ അല്ലി എന്നിവര്‍  തെരച്ചിലിനു നേതൃത്വം നല്‍കി. രാഷ്ട്രീയപാര്‍ട്ടി നേതാക്കന്‍മാര്‍, ജനപ്രതിനിധികള്‍ തുടങ്ങിയവരും സ്ഥലത്തെത്തി. വായു നിറച്ച ബോട്ടുകളും തോണിയും കൃത്രിമശ്വസന സഹായികളും ലൈഫ്‌ബോയും ശക്തിയേറിയ ലൈറ്റുകളും അടക്കം ആധുനിക സംവിധാനങ്ങള്‍ ഉപയോഗിച്ചാണു തെരച്ചില്‍ തുടരുന്നത്.
പാറയിടുക്കുകള്‍ ഏറെയുള്ള സ്ഥലമായതിനാലാണു തെരച്ചില്‍ നടത്തുന്നതിനു തടസമാകുന്നുണ്ട്.  പൊന്നാനി, തിരൂര്‍ ഫയര്‍ ഫോഴ്‌സ് യൂനിറ്റുകളിലെ അംഗങ്ങളും തെരച്ചിലിനായി എത്തിയിട്ടുണ്ട്. പി.വി. അന്‍വര്‍ എംഎല്‍എ അപകട സ്ഥലം സന്ദര്‍ശിച്ച ശേഷം മുഖ്യമന്ത്രി പിണറായി വിജയനുമായി ബന്ധപ്പെട്ടതിന്റെ ഫലമായി കോട്ടയത്ത് നിന്നുള്ള മുങ്ങല്‍ വിദഗ്ധര്‍ രാത്രിയില്‍ പ്രത്യേക പ്രകാശസംവിധാനത്തിന്റെ സഹായത്തോടെയും തെരച്ചില്‍ നടത്തി.