തിരുവനന്തപുരം:വരാനിരിക്കുന്ന നിയമസഭാ തിരഞ്ഞെടുപ്പിൽ തന്റെ രാഷ്ട്രീയ നിലപാട് മന്ത്രി വ്യക്തമാക്കി. അടുത്ത തിരഞ്ഞെടുപ്പിലും പത്തനാപുരം മണ്ഡലത്തിൽ തന്നെയാകും താൻ ജനവിധി തേടുകയെന്ന് ഗണേഷ് കുമാർ പറഞ്ഞു. കെഎസ്ആർടിസിയെ സ്വയംപര്യാപ്തതയിലേക്ക് എത്തിക്കാനുള്ള ശ്രമങ്ങൾ ഈ സർക്കാരിന്റെ നേതൃത്വത്തിൽ തുടരുമെന്നും അദ്ദേഹം പറഞ്ഞു.

ചരിത്രനേട്ടവുമായി കെഎസ്ആർടിസി

ടിക്കറ്റ് വരുമാനത്തിൽ സർവ്വകാല റെക്കോർഡ് നേട്ടം കൈവരിച്ച് കെഎസ്ആർടിസി. 2026 ജനുവരി 5 തിങ്കളാഴ്ച മാത്രം ടിക്കറ്റ് ഇനത്തിൽ 12.18 കോടി രൂപയുടെ വരുമാനമാണ് ലഭിച്ചതെന്ന് ഗതാഗതമന്ത്രി കെ ബി ഗണേഷ് കുമാർ വാർത്താസമ്മേളനത്തിൽ അറിയിച്ചു. ടിക്കറ്റ് ഇതര വരുമാനം കൂടി ചേർത്തുള്ള ആകെ വരുമാനം 13.02 കോടി രൂപയായി ഉയർന്നു.

ശബരിമല മാത്രമല്ല കാരണം

ശബരിമല സീസൺ ആയതുകൊണ്ട് മാത്രം ലഭിച്ച വർദ്ധനവല്ല ഇതെന്ന് മന്ത്രി വ്യക്തമാക്കി. കഴിഞ്ഞ വർഷത്തെ ശബരിമല സീസണെ അപേക്ഷിച്ച് രണ്ട് കോടി രൂപയുടെ അധിക വരുമാനമാണ് ഇത്തവണ ലഭിച്ചിരിക്കുന്നത്. കെഎസ്ആർടിസിയിൽ നടപ്പിലാക്കി വരുന്ന പരിഷ്കാരങ്ങളുടെ വിജയമാണിതെന്നും ഈ നേട്ടം കേരളത്തിലെ ജനങ്ങൾക്കായി സമർപ്പിക്കുന്നുവെന്നും അദ്ദേഹം പറഞ്ഞു.

ഡ്രൈവിംഗ് സ്കൂളുകളും ലക്ഷ്വറി ബസുകളും

കെഎസ്ആർടിസിയുടെ കീഴിലുള്ള 21 ഡ്രൈവിംഗ് സ്കൂളുകളിൽ നിന്ന് ഇതുവരെ 4.26 കോടി രൂപ സമാഹരിക്കാൻ സാധിച്ചു. വിമാനത്തിലേതിന് സമാനമായ സൗകര്യങ്ങളുള്ള വോൾവോ ലക്ഷ്വറി ബസുകൾ ഉടൻ നിരത്തിലിറങ്ങും. പാൻട്രി അടക്കമുള്ള ആധുനിക സൗകര്യങ്ങൾ ഈ ബസുകളിലുണ്ടാകും. ആദ്യ ഘട്ടത്തിൽ തിരുവനന്തപുരം - എറണാകുളം റൂട്ടിലാകും സർവീസ്. കൂടാതെ, നടൻ മോഹൻലാൽ കെഎസ്ആർടിസിയുടെ ഗുഡ്‌വിൽ അംബാസിഡറാകാമെന്ന് സമ്മതിച്ചിട്ടുണ്ടെന്നും മന്ത്രി അറിയിച്ചു.