ദോഹ: ഖത്തറിന്റെ സര്‍ക്കാര്‍ ഉടമസ്ഥതയിലുള്ള ഊര്‍ജ കമ്പനിയായ 'ഖത്തര്‍എനര്‍ജി', ലെബനന്റെ തീരത്തിനടുത്തുള്ള കടല്‍പ്രദേശത്ത് നടക്കുന്ന എണ്ണവാതക അന്വേഷണ പദ്ധതിയില്‍ പങ്കാളിയായി. പുതിയ അന്വേഷണ മേഖലയിലെ 30 ശതമാനം പങ്കാണ് ഖത്തര്‍എനര്‍ജി സ്വന്തമാക്കിയിരിക്കുന്നത്. ഫ്രാന്‍സിലെ ടോട്ടല്‍എനര്‍ജീസും ഇറ്റലിയിലെ എനിയും ചേര്‍ന്നാണ് ഈ പദ്ധതി മുന്നോട്ട് കൊണ്ടുപോകുന്നത്.

കരാര്‍ അനുസരിച്ച്, ലെബനന്റെ തെക്കന്‍ തീരത്തിന് സമീപമുള്ള കടല്‍പ്രദേശത്ത് അന്വേഷണ പ്രവര്‍ത്തനങ്ങള്‍ തുടങ്ങും. 'ബ്ലോക്ക് 8' എന്ന് വിളിക്കുന്ന ഈ പ്രദേശത്ത് എണ്ണയോ പ്രകൃതി വാതകമോ ഉണ്ടോയെന്ന് പരിശോധിക്കാനാണ് പഠനം. ഇതിന്റെ ഭാഗമായി കടല്‍തട്ടില്‍ പ്രാഥമിക പരിശോധനകളും സര്‍വേകളും നടത്തും.

ലെബനന്‍ കടുത്ത സാമ്പത്തിക പ്രതിസന്ധി നേരിടുന്ന സാഹചര്യത്തിലാണ് ഈ പദ്ധതി. എണ്ണയോ വാതകമോ കണ്ടെത്താന്‍ സാധിച്ചാല്‍, രാജ്യത്തിന് അധിക വരുമാനം ലഭിക്കാനും സാമ്പത്തിക അവസ്ഥ മെച്ചപ്പെടാനുമിത് സഹായകരമായേക്കുമെന്നാണ് വിലയിരുത്തല്‍. അതിനാല്‍ തന്നെ ഈ അന്വേഷണത്തോട് ലെബനന്‍ സര്‍ക്കാര്‍ വലിയ പ്രതീക്ഷ പുലര്‍ത്തുന്നുണ്ട്.

ALSO READ: ഖത്തറിലെ കുടിയേറ്റ തൊഴിലാളികളുടെ സുരക്ഷ; ഐഒഎമ്മുമായി സഹകരണം തുടരും

ഖത്തര്‍എനര്‍ജിക്കിത് അന്താരാഷ്ട്ര തലത്തില്‍ സാന്നിധ്യം വര്‍ധിപ്പിക്കുന്ന ഒരു നീക്കമാണ്. മിഡില്‍ ഈസ്റ്റ് മേഖലയിലും മെഡിറ്ററേനിയന്‍ കടല്‍ പ്രദേശത്തും ഊര്‍ജ മേഖലയിലെ പ്രവര്‍ത്തനം ശക്തമാക്കുകയാണ് ഖത്തറിന്റെ ലക്ഷ്യം. വിവിധ രാജ്യങ്ങളുമായി ചേര്‍ന്ന് ദീര്‍ഘകാല പദ്ധതികള്‍ നടപ്പാക്കാനാണ് കമ്പനി പദ്ധതിയിടുന്നത്.

ഈ കരാര്‍ ഖത്തറും ലെബനനും തമ്മിലുള്ള സാമ്പത്തിക ബന്ധങ്ങള്‍ കൂടുതല്‍ ശക്തമാക്കുമെന്നും വിലയിരുത്തപ്പെടുന്നു. അന്വേഷണ ഫലങ്ങള്‍ അനുകൂലമായാല്‍, കൂടുതല്‍ നിക്ഷേപങ്ങളും വികസന പ്രവര്‍ത്തനങ്ങളും വരാനിടയുണ്ടെന്നാണ് സൂചന. അടുത്ത മാസങ്ങളില്‍ കടല്‍പ്രദേശത്തെ പഠനങ്ങള്‍ ആരംഭിക്കുമെന്നാണ് പ്രതീക്ഷ.

QatarEnergy becomes a partner in offshore oil and gas exploration near Lebanon, strengthening regional energy cooperation.