തിരുവനന്തപുരം: കേരളത്തിന്റെ വിവിധ ഇടങ്ങളിൽ ഇന്ന് ഉച്ചയ്ക്ക് ശേഷം മഴയ്ക്ക് സാധ്യത. തെക്കുപടിഞ്ഞാറൻ ബംഗാൾ ഉൾക്കടലിന് മുകളിലെ  അതിതീവ്ര ന്യൂനമർദ്ദമാണ് മഴയ്ക്കു കാരണമാകുന്നത്. ഇത് വടക്കു പടിഞ്ഞാറ് ദിശയിൽ നീങ്ങി വടക്കൻ ശ്രീലങ്കയ്ക്ക് മുകളിൽ ട്രിങ്കോമലിക്കും ജാഫ്നയും ഇടയിൽ കരയിൽ പ്രവേശിക്കാൻ സാധ്യതയുണ്ടെന്ന് കേന്ദ്ര  കാലാവസ്ഥാ വകുപ്പ് അറിയിച്ചു. മഴ എത്തുമെങ്കിലും കേരളത്തിൽ ജാഗ്രതാ നിർദേശം പുറപ്പെടുവിച്ചിട്ടില്ല.

തെക്കൻ കേരളത്തിന് സമീപം തെക്ക് കിഴക്കൻ അറബിക്കടലിനു മുകളിൽ ചക്രവാതച്ചുഴി സ്ഥിതി ചെയ്യുന്നുണ്ട്. ഇതും മഴയ്ക്ക് കാരണമാകും. സംസ്ഥാനത്ത് ജനുവരി 9 മുതൽ 13 വരെ നേരിയ/ഇടത്തരം മഴയ്ക്ക് സാധ്യതയുള്ളതായി കേന്ദ്ര കാലാവസ്ഥ വകുപ്പ് നേരത്തെ അറിയിച്ചിരുന്നു. എങ്കിലും ജനുവരി 9 ന് കാര്യമായി മഴ ലഭിച്ചിട്ടില്ല.

ALSO READ: മലയാളികളെ വലയിട്ട് വൻ ഓൺലൈൻ ട്രേഡിങ് തട്ടിപ്പ്; കോഴിക്കോട് രണ്ടുപേരിൽനിന്ന് നഷ്ടപ്പെട്ടത് 2 കോടിയോളം രൂപ, കൊച്ചിയിൽ നഷ്ടം 3 കോടി!

അതിതീവ്ര ന്യൂനമർദ്ദത്തിന്റെ ഫലമായി ശക്തമായ കാറ്റിന് സാധ്യത ഉണ്ട്. തമിഴ്‌നാട് തീരം, ഗൾഫ് ഓഫ് മന്നാർ, അതിനോട് ചേർന്ന കന്യാകുമാരി പ്രദേശം എന്നിവിടങ്ങളിലാണ് കാറ്റ് പ്രതീക്ഷിക്കുന്നത്. മണിക്കൂറിൽ 45 മുതൽ 55 കിലോമീറ്റർ വരെയും ചില അവസരങ്ങളിൽ മണിക്കൂറിൽ 65 കിലോമീറ്റർ വരെയും വേഗതയിൽ കാറ്റ് വീശിയേക്കും. ഈ പ്രദേശങ്ങളിൽ കടൽ പ്രക്ഷുബ്ധമാകാനും സാധ്യതയുണ്ട്.