ട്രംപ് ഭരണകൂടത്തിൻ്റെ ഗ്രീൻലാൻഡ് അധിനിവേശ മോഹങ്ങൾക്ക് കനത്ത തിരിച്ചടിയുമായി ദ്വീപിലെ രാഷ്ട്രീയ പാർട്ടികൾ ഒന്നടങ്കം രംഗത്തെത്തിയിരിക്കുകയാണ്. ഗ്രീൻലാൻഡ് പാർലമെൻ്റിലെ പ്രധാനപ്പെട്ട അഞ്ച് പാർട്ടികളാണ് തങ്ങളുടെ നിലപാട് വ്യക്തമാക്കി സംയുക്ത പ്രസ്താവന പുറത്തിറക്കിയത്.

അമേരിക്കൻ പ്രസിഡൻ്റ് ഡൊണാൾഡ് ട്രംപിൻ്റെ ഗ്രീൻലാൻഡ് മോഹങ്ങൾക്കെതിരെ ദ്വീപിലെ രാഷ്ട്രീയ നേതൃത്വം ഒറ്റക്കെട്ടായി നിലയുറപ്പിച്ചിരിക്കുകയാണ്. "ഞങ്ങൾക്ക് അമേരിക്കക്കാരാകാൻ താൽപ്പര്യമില്ല, ഡാനിഷ് ആകാനും ആഗ്രഹമില്ല; ഞങ്ങൾക്ക് ഗ്രീൻലാൻഡുകാരായി ജീവിച്ചാൽ മതി" എന്നാണ് അഞ്ച് രാഷ്ട്രീയ പാർട്ടികൾ സംയുക്തമായി പ്രഖ്യാപിച്ചത്. ഗ്രീൻലാൻഡ് പ്രധാനമന്ത്രി ജെൻസ് ഫ്രെഡറിക് നീൽസൻ്റെ നേതൃത്വത്തിലാണ് ഈ പ്രതിഷേധം.

ഗ്രീൻലാൻഡിൻ്റെ ഭാവി തീരുമാനിക്കേണ്ടത് അവിടുത്തെ ജനങ്ങൾ മാത്രമാണെന്നും പുറത്തുനിന്നുള്ള ഒരു രാജ്യത്തിൻ്റെയും ഇടപെടൽ അനുവദിക്കില്ലെന്നും പാർട്ടികൾ വ്യക്തമാക്കി.റഷ്യയോ ചൈനയോ ഗ്രീൻലാൻഡ് കൈക്കലാക്കാൻ അനുവദിക്കില്ലെന്നും, "നല്ല രീതിയിലോ അല്ലെങ്കിൽ കടുത്ത രീതിയിലോ" (The hard way) ലക്ഷ്യം കാണുമെന്നുമാണ് ട്രംപ് പ്രഖ്യാപിച്ചിരിക്കുന്നത്.ഡെൻമാർക്കിന് പുറമെ യുകെ, ഫ്രാൻസ്, ജർമ്മനി, ഇറ്റലി, പോളണ്ട്, സ്പെയിൻ എന്നീ രാജ്യങ്ങൾ ഗ്രീൻലാൻഡിന് പിന്തുണ പ്രഖ്യാപിച്ച് സംയുക്ത പ്രസ്താവന ഇറക്കിയിട്ടുണ്ട്.ഗ്രീൻലാൻഡിന് മേൽ അമേരിക്ക ഏതെങ്കിലും തരത്തിലുള്ള സൈനിക നീക്കം നടത്തിയാൽ അത് നാറ്റോ (NATO) സഖ്യത്തിൻ്റെ തകർച്ചയ്ക്ക് കാരണമാകുമെന്ന് ഡാനിഷ് പ്രധാനമന്ത്രി മെറ്റെ ഫ്രെഡറിക്സൺ മുന്നറിയിപ്പ് നൽകി.

അടുത്തിടെ വെനസ്വേലയിൽ നടത്തിയ സൈനിക ഇടപെടലുകൾക്ക് പിന്നാലെയാണ് ട്രംപ് ഗ്രീൻലാൻഡിന് മേൽ സമ്മർദ്ദം ശക്തമാക്കിയത്. എന്നാൽ 85 ശതമാനത്തിലധികം ഗ്രീൻലാൻഡ് നിവാസികളും അമേരിക്കയുടെ ഭാഗമാകാൻ താൽപ്പര്യമില്ലാത്തവരാണെന്ന് സർവ്വേകൾ സൂചിപ്പിക്കുന്നു.