ഫൈസാബാദ് (പട്ടിക്കാട്): അഭിനവ ചിന്താധാരകളിലേക്ക് സമുദായത്തെ പോവാൻ അനുവദിക്കാതെ തിരുനബി(സ)യുടെ കാലത്തെ തനിമ നിലനിറുത്തുകയാണ് സമസ്ത കേരള ജംഇയ്യത്തുൽ ഉലമ നിർവഹിക്കുന്ന ദൗത്യമെന്ന് പാണക്കാട് സയ്യിദ് സാദിഖലി ശിഹാബ് തങ്ങൾ. പട്ടിക്കാട് ജാമിഅ നൂരിയ്യയുടെ വാർഷിക സമാപന സമ്മേളനത്തിൽ അധ്യക്ഷത വഹിച്ച് സംസാരിക്കുകയായിരുന്നു അദ്ദേഹം.

ജാമിഅ സനദ് ദാന സമ്മേളനത്തിൽ എം.ടി അബ്ദുല്ല മുസ് ലിയാർ പ്രാർഥന നടത്തുന്നു

ഇസ് ലാമിന്റെ തനിമ നഷ്ടപ്പെടാതെ തലമുറകളിലേക്ക് പകരുകയാണ് സമസ്തയുടെ ലക്ഷ്യം. അതിലേക്ക് പണ്ഡിതൻമാരെ വാർത്തെടുക്കുകയാണ് ജാമിഅ നൂരിയ്യ ചെയ്യുന്നത്. ഉലമാ-ഉമറാ ബന്ധത്തിന്റെ സംഗമ വേദിയാണ് ജാമിഅ നൂരിയ്യ. ചേർന്നു നിൽപ്പാണ് സമുഹത്തിനു കരണീയം. കേരളത്തിൽ ഇന്നു കാണുന്ന പുരോഗതി ഈ ശക്തമായ ബന്ധത്തിന്റെ അനന്തര ഫലമാണ്. ദീനിന്റെ പവിത്രതക്കു ഭംഗം വരുത്തുന്നതായ ചിദ്രത ഉണ്ടാവാതെ നോക്കണം. പൂർവ്വികർ കാണിച്ചു തന്ന മാതൃകയതാണ്. ആത്മീയമായ കരുത്താണ് മുസ് ലിം സമൂഹത്തെ ശക്തിപ്പെടുത്തുന്നതെന്നും സാദിഖലി തങ്ങൾ പറഞ്ഞു.

ജാമിഅ നൂരിയ്യ സമാപന സമ്മേളന വേദിയിൽ സമസ്ത കേരളാ ജംഇയ്യത്തുൽ ഉലമാ പ്രസിഡൻ്റ് സയ്യിദ് മുഹമ്മദ് ജിഫ്‌രി മുത്തുക്കോയ തങ്ങളെ ജാമിഅ പ്രസിഡൻ്റ് പാണക്കാട് സയ്യിദ് സാദിഖലി ശിഹാബ് തങ്ങൾ സ്വീകരിക്കുന്നു. എം.ടി അബ്ദുല്ല മുസ്‌ലിയാർ, കോട്ടുമല മൊയ്തീൻ കുട്ടി മുസ്‌ലിയാർ, പി.കെ കുഞ്ഞാലിക്കുട്ടി, പി.വി അബ്ദുൽ വഹാബ് എം.പി, അബ്ദു സമദ് സമദാനി എം.പി എന്നിവർ സമീപം