കണ്ണൂർ: ഓടിക്കൊണ്ടിരിക്കുന്ന ട്രെയിനിൽ നിന്നും തെറിച്ചുവീണ് 18 വയസ്സുകാരന് ദാരുണാന്ത്യം. കാസർകോഡ് ജില്ലയിലെ ബദിയടുക്ക നരംപാടി സ്വദേശിയായ ഇബ്രാഹിം അൽത്താഫ് ആണ് മരിച്ചത്. 18 വയസായിരുന്നു. കണ്ണൂർ-തലശ്ശേരി റെയിൽവേ സ്റ്റേഷനുകൾക്കിടയിലെ ഓടിക്കൊണ്ടിരിക്കുന്ന ട്രെയിനിൽ നിന്നുമായിരുന്നു ഇബ്രാഹിം അൽത്താഫ് തെറിച്ചുവീണത്. ഇന്ന് പുലർച്ചെ 6.45ഓടെയായിരുന്നു അപകടം നടന്നത്.

കഴിഞ്ഞ ദിവസം നാല് സുഹൃത്തുക്കൾക്കൊപ്പമാണ്‌ അൽത്താഫ് കോഴിക്കോട്ടേക്ക് വിനോദയാത്ര പോയിരുന്നത്. കോഴിക്കോട് നിന്നും സുഹൃത്തുക്കൾക്കൊപ്പം മലബാർ   എക്സ്പ്രസിൽ കാസർകോഡിലേക്ക് തിരിച്ചു വരുന്ന വഴിയായിരുന്നു അപകടം സംഭവിച്ചത്. 

തുടർന്ന് റെയിൽവേ പൊലിസും നാട്ടുകാരും ചേർന്ന് അൽത്താഫിനെ ആശുപത്രിയിൽ എത്തിച്ചെങ്കിലും മരണം സംഭവിക്കുകയായിരുന്നു. മൃതദേഹം കണ്ണൂർ ആശുപത്രി മോർച്ചറിയിലേക്ക് മാറ്റി.  സംഭവത്തിൽ കണ്ണൂർ ടൗൺ പോലിസ് അസ്വാഭാവിക മരണത്തിന് കേസെടുത്ത് അന്വേഷണം തുടങ്ങി.