കോഴിക്കോട്: താമരശേരി ചുരം ഒന്‍പതാം വളവിലെ നവീകരണ പ്രവര്‍ത്തികള്‍ നടക്കുന്ന സാഹചര്യത്തില്‍ ഭാര വാഹനങ്ങള്‍ക്ക് നിയന്ത്രണം ഏര്‍പ്പെടുത്തി. സുരക്ഷയും ഗതാഗത സൗകര്യവും ഉറപ്പാക്കുന്നതിനായാണ് ജില്ല കളക്ടര്‍ സ്‌നേഹില്‍ കുമാര്‍ സിങ്ങിന്റെ അധ്യക്ഷതയില്‍ ചേര്‍ന്ന യോഗം നിയന്ത്രണങ്ങള്‍ ഏര്‍പ്പെടുത്തിയത്. 

ചുരത്തില്‍ മള്‍ട്ടി ആക്‌സില്‍ വാഹനങ്ങള്‍ക്ക് കര്‍ശന നിയന്ത്രണമാണ് ഏര്‍പ്പെടുത്തിയത്. വലിയ വാഹനങ്ങള്‍ ചുരത്തില്‍ കുടുങ്ങുന്നത് നിര്‍മാണ പ്രവര്‍ത്തികളെയും മറ്റ് യാത്രക്കാരെയും ബാധിക്കുന്നത് ഒഴിവാക്കാനാണിത്. ചുരത്തില്‍ വാഹനങ്ങള്‍ കേടാവുകയോ അപകടങ്ങള്‍ സംഭവിക്കുകയോ ചെയ്താല്‍ ഗതാഗത തടസം നീക്കുന്നതിനായി ഒന്‍പതാം വളവ് കേന്ദ്രീകരിച്ച് ക്രെയിന്‍ സൗകര്യം ഉറപ്പാക്കാന്‍ യോഗം നിര്‍ദേശം നല്‍കി. 

ALSO READ: വഖ്ഫ് ബോർഡ് കടുത്ത സാമ്പത്തിക പ്രതിസന്ധിയിൽ; അർഹമായ ഫണ്ട് അനുവദിക്കാതെ സംസ്ഥാന സർക്കാർ 

പ്രവൃത്തി നടക്കുന്ന സമയങ്ങളില്‍ ക്രെയിന്‍ സേവനം ലഭ്യമായിരിക്കും. കൂടാതെ അടിയന്തര സാഹചര്യങ്ങളില്‍ സഹായത്തിനായി പൊലിസ്, ഫയര്‍ഫോഴ്‌സ്, ജില്ല എമര്‍ജന്‍സി ഓപ്പറേഷന്‍ സെന്റര്‍ എന്നിവരുടെ ഫോണ്‍ നമ്പറുകള്‍ ഉള്‍പ്പെടുത്തിയ ബോര്‍ഡുകള്‍ സ്ഥാപിക്കും. ആറ്, ഏഴ്, എട്ട്, ഒന്‍പത് വളവുകളിലാണ് ഹെല്‍പ് ലൈന്‍ നമ്പറുകള്‍ പ്രദര്‍ശിപ്പിക്കുക. യോഗത്തില്‍ താമരശേരി ഡി.വൈ.എസ്.പി അലവി, ദുരന്തനിവാരണ ഡെപ്യൂട്ടി കലക്ടര്‍ എം രേഖ, തഹസില്‍ദാര്‍ സി. സുബൈര്‍, ജില്ല ഫയര്‍ ഓഫീസര്‍ അഷറഫലി, പിഡബ്ല്യൂഡി എക്‌സിക്യൂട്ടീവ് എഞ്ചിനീയര്‍ വികെ ഹാഷിം, എം രാജീവ്, ഡോ മഞ്ജു, എംഎ ഗഫൂര്‍, പി അശ്വതി എന്നിവര്‍ പങ്കെടുത്തു.

heavy vehicle restrictions were imposed at thamarassery churam due to renovation works to ensure safety and traffic management.