മസ്‌കത്ത്: ഒമാനില്‍ വീട്ടുജോലി ചെയ്യുന്ന തൊഴിലാളികളുടെ അവകാശങ്ങള്‍ കര്‍ശനമായി പാലിക്കപ്പെടണമെന്ന് തൊഴില്‍ വകുപ്പ് മന്ത്രി പറഞ്ഞു. വീട്ടുജോലി തൊഴിലാളികള്‍ക്കും വ്യക്തമായ നിയമപരമായ അവകാശങ്ങളുണ്ടെന്നും, അവ സംരക്ഷിക്കുക തൊഴിലുടമകളുടെ ഉത്തരവാദിത്തമാണെന്നും മന്ത്രി വ്യക്തമാക്കി.

വേതനം സമയത്തിന്‍ നല്‍കുക, മതിയായ വിശ്രമസമയം ഉറപ്പാക്കുക, അവധി നല്‍കുക, താമസവും ഭക്ഷണവും പോലുള്ള അടിസ്ഥാന സൗകര്യങ്ങള്‍ ഒരുക്കുക തുടങ്ങിയ കാര്യങ്ങള്‍ നിയമപ്രകാരം നിര്‍ബന്ധമാണെന്ന് അധികൃതര്‍ അറിയിച്ചു. ഈ ചട്ടങ്ങള്‍ ലംഘിക്കുന്ന തൊഴിലുടമകള്‍ക്കെതിരെ നടപടി ഉണ്ടാകുമെന്നും മന്ത്രാലയം മുന്നറിയിപ്പ് നല്‍കി.

ALSO READ: ഒമാനില്‍ തൊഴില്‍ നിയമലംഘനം; 31,000-ത്തിലേറെ പേര്‍ക്ക് നടപടി

വീട്ടുജോലി ചെയ്യുന്ന തൊഴിലാളികള്‍ നേരിടുന്ന പരാതികള്‍ ഗൗരവത്തോടെ പരിഗണിക്കുമെന്നും, നിയമലംഘനങ്ങള്‍ കണ്ടെത്തിയാല്‍ ഉടനെ ഇടപെടല്‍ ഉണ്ടാകുമെന്നും മന്ത്രി അറിയിച്ചു. അടുത്തിടെ നടപ്പാക്കിയ തൊഴില്‍ നിയമ ഭേദഗതികള്‍ വീട്ടുജോലി തൊഴിലാളികള്‍ക്ക് കൂടുതല്‍ വ്യക്തമായ സംരക്ഷണമാണ് നല്‍കുന്നതെന്നും അധികൃതര്‍ വ്യക്തമാക്കി.

രാജ്യത്തിന്റെ സാമൂഹിക ജീവിതത്തില്‍ നിര്‍ണായക പങ്ക് വഹിക്കുന്നവരാണ് വീട്ടുജോലി തൊഴിലാളികള്‍. അവരുടെ മാന്യതയും അവകാശങ്ങളും സംരക്ഷിക്കപ്പെടണം എന്നതാണ് സര്‍ക്കാരിന്റെ നിലപാടെന്ന് മന്ത്രി കൂട്ടിച്ചേര്‍ത്തു.

Oman’s Labour Minister has stressed that the rights of domestic workers must be respected, urging employers to ensure fair treatment, timely wages, rest periods and proper living conditions.