ബഹ്‌റൈന്‍: ബഹ്‌റൈനില്‍ വ്യാജ അക്കാദമിക് സര്‍ട്ടിഫിക്കറ്റുകള്‍ നല്‍കിക്കൊണ്ട് പ്രവര്‍ത്തിച്ചിരുന്ന ഒരു സ്വകാര്യ വിദ്യാഭ്യാസ ഇന്‍സ്റ്റിറ്റ്യൂട്ടിന്റെ ഉടമയെ പബ്ലിക് പ്രോസിക്യൂഷന്‍ കസ്റ്റഡിയില്‍ എടുത്തു. വിദ്യാഭ്യാസ രംഗത്തെ നിയമലംഘനങ്ങള്‍ കണ്ടെത്തിയതിനെ തുടര്‍ന്നാണ് നടപടി.

വിദ്യാഭ്യാസ മന്ത്രാലയം നടത്തിയ പരിശോധനയില്‍, രാജ്യത്തെ ചില സ്‌കൂളുകളില്‍ ജോലി ചെയ്യുന്ന ജീവനക്കാര്‍ നിയമപരമല്ലാത്ത സര്‍ട്ടിഫിക്കറ്റുകള്‍ ഉപയോഗിച്ചാണ് നിയമനം നേടിയതെന്ന് കണ്ടെത്തുകയായിരുന്നു. ഇതോടെയാണ് സര്‍ട്ടിഫിക്കറ്റുകള്‍ നല്‍കിയ സ്ഥാപനത്തെക്കുറിച്ച് വിശദമായ അന്വേഷണം ആരംഭിച്ചത്.

അന്വേഷണത്തില്‍, ബന്ധപ്പെട്ട ഇന്‍സ്റ്റിറ്റ്യൂട്ട് വിദ്യാഭ്യാസ മന്ത്രാലയത്തിന്റെ ഔദ്യോഗിക അനുമതിയോ ലൈസന്‍സോ ഇല്ലാതെയാണ് പ്രവര്‍ത്തിച്ചിരുന്നതെന്നും, അക്കാദമിക് യോഗ്യതകള്‍ നല്‍കാനുള്ള അവകാശം സ്ഥാപനത്തിനില്ലായിരുന്നെന്നും വ്യക്തമായി. ഇതിന്റെ അടിസ്ഥാനത്തിലാണ് ഇന്‍സ്റ്റിറ്റ്യൂട്ട് ഉടമയായ ഒരു ഏഷ്യന്‍ പൗരനെ അറസ്റ്റ് ചെയ്തത്.

അഴിമതി വിരുദ്ധ വിഭാഗം, സാമ്പത്തിക-ഇലക്ട്രോണിക് കുറ്റാന്വേഷണ വിഭാഗം, വ്യവസായ-വാണിജ്യ മന്ത്രാലയം എന്നിവയുടെ സഹകരണത്തോടെ സ്ഥാപനത്തില്‍ പരിശോധന നടത്തി. അന്വേഷണ സംഘം ആവശ്യമായ രേഖകളും തെളിവുകളും ശേഖരിച്ചിട്ടുണ്ട്.

കേസുമായി ബന്ധപ്പെട്ട നിയമനടപടികള്‍ പുരോഗമിക്കുകയാണെന്നും, വ്യാജ സര്‍ട്ടിഫിക്കറ്റുകള്‍ ഉപയോഗിച്ചുള്ള നിയമനങ്ങള്‍ക്കെതിരെ ശക്തമായ നടപടികള്‍ സ്വീകരിക്കുമെന്നും അധികൃതര്‍ അറിയിച്ചു.

The Bahrain Public Prosecution has detained the owner of a private educational institute for issuing fake academic certificates and operating without a valid licence, following investigations by the Ministry of Education.