തിരുവനന്തപുരം: കിളിമാനൂരിൽ ദമ്പതികളുടെ മരണത്തിനിടയാക്കിയ വാഹനാപകടക്കേസിലെ ഒന്നാം പ്രതി കാരക്കോണം സ്വദേശി വിഷ്ണു പിടിയിലായി. ഒളിവിലായിരുന്ന ഇയാളെ കഴിഞ്ഞ രാത്രി നെയ്യാറ്റിൻകരയിൽ നിന്നാണ് ആറ്റിങ്ങൽ ഡിവൈഎസ്പിയുടെ നേതൃത്വത്തിലുള്ള പ്രത്യേക സ്ക്വാഡ് പിടികൂടിയത്. അപകടം നടന്ന് 20 ദിവസങ്ങൾക്ക് ശേഷമാണ് മുഖ്യപ്രതി പൊലിസിന്റെ വലയിലാകുന്നത്.

സംഭവത്തിന്റെ പശ്ചാത്തലം

ജനുവരി 3-ന് വൈകിട്ട് സംസ്ഥാന പാതയിലെ പാപ്പാലയിലാണ് നാടിനെ നടുക്കിയ അപകടമുണ്ടായത്. കിളിമാനൂർ കുന്നുമ്മൽ സ്വദേശികളായ രജിത്തും (41) ഭാര്യ അംബികയും (36) സഞ്ചരിച്ചിരുന്ന സ്കൂട്ടറിന് പിന്നിൽ വിഷ്ണു ഓടിച്ച അമിതവേഗതയിലെത്തിയ ഥാർ ജീപ്പ് ഇടിക്കുകയായിരുന്നു.

അപകടത്തിന് പിന്നാലെ നിർത്താതെ പോയ ജീപ്പ് നാട്ടുകാർ പിന്തുടർന്ന് പിടികൂടി വിഷ്ണുവിനെ പൊലിസിൽ ഏൽപ്പിച്ചിരുന്നു.എന്നാൽ, നിസ്സാര വകുപ്പുകൾ ചുമത്തി വിഷ്ണുവിനെ പൊലിസ് അന്ന് തന്നെ സ്റ്റേഷൻ ജാമ്യത്തിൽ വിട്ടയച്ചു.ചികിത്സയിലിരിക്കെ ജനുവരി 7-ന് അംബികയും, കഴിഞ്ഞ ദിവസം രജിത്തും മരണപ്പെട്ടതോടെയാണ് കേസിൽ ജാമ്യമില്ലാ വകുപ്പുകൾ ചുമത്തിയത്. അപ്പോഴേക്കും പ്രതി ഒളിവിൽ പോയിരുന്നു.

അന്വേഷണത്തിലെ വീഴ്ചയും നടപടിയും

പ്രതിയെ വിട്ടയച്ചതിലും അന്വേഷണം വൈകിപ്പിച്ചതിലും പൊലിസിനെതിരെ വ്യാപക പ്രതിഷേധം ഉയർന്നിരുന്നു. മരിച്ച ദമ്പതികളുടെ പിഞ്ചുമക്കളെയും കൊണ്ട് നാട്ടുകാർ കിളിമാനൂർ സ്റ്റേഷന് മുന്നിൽ നടത്തിയ സമരം വലിയ ചർച്ചയായിരുന്നു. ഇതേത്തുടർന്ന്:

മൂന്ന് പൊലിസുകാർക്ക് സസ്പെൻഷൻ: 

കിളിമാനൂർ എസ്.എച്ച്.ഒ ഡി. ജയൻ, എസ്.ഐമാരായ അരുൺ, ഷജീം എന്നിവരെ സർവീസിൽ നിന്നും സസ്പെൻഡ് ചെയ്തു.വിഷ്ണുവിനെ ഒളിവിൽ പോകാൻ സഹായിച്ച സുഹൃത്ത് ആദർശിനെ കഴിഞ്ഞ ദിവസം പൊലിസ് അറസ്റ്റ് ചെയ്തിരുന്നു.കഴിഞ്ഞ ദിവസം വിഷ്ണുവിന്റെ മുൻകൂർ ജാമ്യാപേക്ഷ കോടതി തള്ളിയതിന് പിന്നാലെയാണ് പൊലിസ് ഇയാളെ പിടികൂടിയത്.

ദുരൂഹതകൾ ബാക്കി

അപകടസമയത്ത് വാഹനത്തിൽ വിഷ്ണുവിനെ കൂടാതെ മറ്റ് രണ്ട് പേർ കൂടി ഉണ്ടായിരുന്നതായും, അവരെ സംരക്ഷിക്കാനാണ് പൊലിസ് ആദ്യം ശ്രമിച്ചതെന്നും ബന്ധുക്കൾ ആരോപിക്കുന്നുണ്ട്. കൂടാതെ, തൊണ്ടിമുതലായി പൊലിസ് കസ്റ്റഡിയിലുണ്ടായിരുന്ന ജീപ്പ് ദുരൂഹ സാഹചര്യത്തിൽ കത്തിനശിച്ചതും തെളിവ് നശിപ്പിക്കാനുള്ള ശ്രമമാണെന്ന ആക്ഷേപം ശക്തമാണ്.