ന്യൂഡൽഹി: ടി20 ലോകകപ്പിൽ നിന്ന് പാകിസ്ഥാൻ പിന്മാറുമെന്ന അഭ്യൂഹങ്ങൾക്കിടയിൽ, പാകിസ്ഥാൻ ക്രിക്കറ്റ് ബോർഡിനെ (PCB) ട്രോളി ഐസ്‌ലൻഡ് ക്രിക്കറ്റ്. ബംഗ്ലാദേശിനോട് ഐക്യദാർഢ്യം പ്രഖ്യാപിച്ച് പാകിസ്ഥാൻ ടൂർണമെന്റ് ബഹിഷ്കരിച്ചേക്കുമെന്ന വാർത്തകളോടാണ് ഐസ്‌ലൻഡ് പരിഹാസരൂപേണ പ്രതികരിച്ചത്.

ഐസ്‌ലൻഡിന്റെ 'ഓഫർ'

പാകിസ്ഥാൻ ലോകകപ്പിൽ നിന്ന് പിന്മാറാൻ തീരുമാനിക്കുകയാണെങ്കിൽ ആ സ്ഥാനം ഏറ്റെടുക്കാൻ തങ്ങൾ തയ്യാറാണെന്നാണ് ഐസ്‌ലൻഡ് ക്രിക്കറ്റ് സോഷ്യൽ മീഡിയയിലൂടെ വ്യക്തമാക്കിയത്. എന്നാൽ അതിനൊരു നിബന്ധനയും അവർ മുന്നോട്ടുവെക്കുന്നു:

"ലോകകപ്പിലെ പങ്കാളിത്ത കാര്യത്തിൽ പാകിസ്ഥാൻ എത്രയും വേഗം തീരുമാനമെടുക്കണം. ഫെബ്രുവരി രണ്ടാം തീയതി അവർ പിന്മാറുകയാണെങ്കിൽ ഉടൻ തന്നെ വിമാനം കയറാൻ ഞങ്ങൾ തയ്യാറാണ്. എന്നാൽ തീരുമാനം നീണ്ടുപോയി ഫെബ്രുവരി ഏഴിന് കൊളംബോയിൽ എത്തുക എന്നത് വിമാന ഷെഡ്യൂളുകൾ കാരണം വലിയ വെല്ലുവിളിയാണ്. മാത്രമല്ല, ഞങ്ങളുടെ ഓപ്പണിങ് ബാറ്റർക്ക് ഉറക്കമില്ലായ്മയുടെ പ്രശ്നവുമുണ്ട്." - ഐസ്‌ലൻഡ് ക്രിക്കറ്റ് കുറിച്ചു.

ബംഗ്ലാദേശിന്റെ പിന്മാറ്റവും പാകിസ്ഥാന്റെ പ്രതിഷേധവും

ഇന്ത്യയിൽ നടക്കുന്ന ടൂർണമെന്റിൽ നിന്ന് ബംഗ്ലാദേശ് പിന്മാറിയതാണ് സംഭവങ്ങളുടെ തുടക്കം. സുരക്ഷാ കാരണങ്ങളാൽ മത്സരങ്ങൾ ഇന്ത്യക്ക് പുറത്തേക്ക് മാറ്റണമെന്ന ബംഗ്ലാദേശിന്റെ ആവശ്യം ഐസിസി തള്ളിയതോടെയാണ് അവർ പിന്മാറ്റം പ്രഖ്യാപിച്ചത്.

ബംഗ്ലാദേശിന് പകരം സ്‌കോട്ട്‌ലൻഡിനെ ടൂർണമെന്റിൽ ഉൾപ്പെടുത്താൻ ഐസിസി തീരുമാനിച്ചു.

പാകിസ്ഥാന്റെ നിലപാട്: 

ബംഗ്ലാദേശിനോടുള്ള ഐസിസിയുടെ സമീപനത്തിൽ പ്രതിഷേധിച്ച് പാകിസ്ഥാനും ലോകകപ്പ് ബഹിഷ്കരിക്കുമെന്ന് ഭീഷണി മുഴക്കിയിരുന്നു. ഇന്ത്യയ്‌ക്കെതിരായ മത്സരം മാത്രം ബഹിഷ്കരിക്കാനുള്ള ആലോചനയും പാകിസ്ഥാൻ നടത്തുന്നുണ്ട്.ബഹിഷ്കരണ നീക്കവുമായി മുന്നോട്ട് പോയാൽ കടുത്ത നടപടികൾ നേരിടേണ്ടി വരുമെന്ന് ഐസിസി പാകിസ്ഥാന് മുന്നറിയിപ്പ് നൽകിയിട്ടുണ്ട്.

ഐസിസിയുമായുള്ള ഈ തർക്കം മുറുകുന്നതിനിടയിലാണ് ഐസ്‌ലൻഡ് ക്രിക്കറ്റിന്റെ രസകരമായ ഈ ഇടപെടൽ.