ഹൈദരാബാദ്: പ്രണയബന്ധത്തെ എതിർത്ത മാതാപിതാക്കളെ നഴ്‌സായ മകൾ അമിത അളവിൽ മരുന്ന് കുത്തിവെച്ച് കൊലപ്പെടുത്തി. തെലങ്കാനയിലെ വികാരാബാദിലാണ് നാടിനെ ഞെട്ടിച്ച സംഭവം നടന്നത്. സ്വകാര്യ ആശുപത്രിയിൽ നഴ്‌സായി ജോലി ചെയ്യുന്ന നക്കല സുരേഖ (20) ആണ് ഈ ക്രൂരകൃത്യം ചെയ്തത്.

കൊലപാതകത്തിലേക്ക് നയിച്ച സാഹചര്യം

സുരേഖയുടെ പ്രണയബന്ധത്തെ മാതാപിതാക്കൾ ശക്തമായി എതിർത്തിരുന്നു. ഇതേച്ചൊല്ലി വീട്ടിൽ നിരന്തരം കലഹങ്ങൾ പതിവായിരുന്നുവെന്ന് അയൽവാസികൾ പൊലിസിന് മൊഴി നൽകിയിട്ടുണ്ട്. തന്റെ ബന്ധം മാതാപിതാക്കൾ ഒരിക്കലും അംഗീകരിക്കില്ലെന്ന് ഉറപ്പായതോടെയാണ് അവരെ ഇല്ലാതാക്കാൻ സുരേഖ തീരുമാനിച്ചത്.

മരുന്ന് മോഷണം: 

താൻ ജോലി ചെയ്യുന്ന ആശുപത്രിയിൽ നിന്നാണ് സുരേഖ മാരകമായ മരുന്നുകൾ മോഷ്ടിച്ചത്. ഇതിനായി നാല് കുപ്പി മരുന്നുകൾ ഇവർ സംഘടിപ്പിച്ചു.ഈ മരുന്ന് ഉയർന്ന അളവിൽ ദമ്പതികളുടെ ശരീരത്തിൽ പ്രവേശിച്ചതോടെ ഇവർ വീട്ടിൽ കുഴഞ്ഞുവീഴുകയായിരുന്നു.

അറസ്റ്റും തുടർനടപടികളും

മാതാപിതാക്കളെ ആശുപത്രിയിൽ എത്തിച്ചെങ്കിലും അപ്പോഴേക്കും മരണം സംഭവിച്ചിരുന്നു. മരണത്തിൽ സംശയം തോന്നിയ ഡോക്ടർ പൊലിസിൽ വിവരം അറിയിച്ചതോടെയാണ് കൊലപാതക വിവരം പുറത്തുവന്നത്.

തുടർന്ന് നടന്ന ചോദ്യം ചെയ്യലിൽ സുരേഖ കുറ്റം സമ്മതിച്ചു. പ്രണയത്തിന് മാതാപിതാക്കൾ വിലങ്ങുതടിയായതാണ് കൊലപാതകത്തിന് കാരണമെന്ന് ഇവർ മൊഴി നൽകി. ഈ കൊലപാതകം ആസൂത്രണം ചെയ്യുന്നതിലോ നടപ്പിലാക്കുന്നതിലോ സുരേഖയുടെ കാമുകനോ മറ്റേതെങ്കിലും വ്യക്തികളോ സഹായിച്ചിട്ടുണ്ടോ എന്ന കാര്യത്തിൽ പൊലിസ് അന്വേഷണം ഊർജിതമാക്കിയിട്ടുണ്ട്.