മസ്‌കറ്റ്: ഒമാനിലെ മരുഭൂമികളിലേക്കും ക്യാമ്പിംഗിനായുള്ള യാത്രകളിലേക്കും പോകുന്നവര്‍ കൂടുതല്‍ ജാഗ്രത പാലിക്കണമെന്ന് സിവില്‍ ഡിഫന്‍സ് ആന്‍ഡ് ആംബുലന്‍സ് അതോറിറ്റി (സി.ഡി.എ.എ) മുന്നറിയിപ്പ് നല്‍കി. അടുത്തിടെ മരുഭൂമി മേഖലകളില്‍ വിനോദയാത്രകളും ക്യാമ്പിംഗ് പ്രവര്‍ത്തനങ്ങളും വര്‍ധിച്ച സാഹചര്യത്തിലാണ് അധികൃതര്‍ മുന്നറിയിപ്പുമായി രംഗത്തെത്തിയത്.

മരുഭൂമിയിലെ കാലാവസ്ഥയില്‍ പെട്ടെന്ന് ഉണ്ടാകുന്ന മാറ്റങ്ങള്‍, വഴിതെറ്റല്‍, വാഹന തകരാര്‍, ജലക്ഷാമം എന്നിവ വലിയ അപകടങ്ങള്‍ക്ക് ഇടയാക്കാമെന്ന് CDAA വ്യക്തമാക്കി. അതിനാല്‍ യാത്രയ്ക്ക് മുമ്പ് ആവശ്യമായ തയ്യാറെടുപ്പുകള്‍ നിര്‍ബന്ധമാണെന്നും അധികൃതര്‍ ഓര്‍മ്മിപ്പിച്ചു. ക്യാമ്പിംഗിന് പോകുന്നവര്‍ മതിയായ കുടിവെള്ളം, ഭക്ഷണം, ആദ്യശുശ്രൂഷാ സാമഗ്രികള്‍, പൂര്‍ണമായി പ്രവര്‍ത്തിക്കുന്ന മൊബൈല്‍ ഫോണ്‍, ജിപിഎസ് സംവിധാനം എന്നിവ കൈവശം വയ്ക്കണം.

യാത്രയുടെ വിശദാംശങ്ങള്‍ മുന്‍കൂട്ടി കുടുംബാംഗങ്ങളെയോ അടുത്ത സുഹൃത്തുകളെയോ അറിയിക്കണമെന്നും, ഒറ്റയ്ക്ക് മരുഭൂമിയിലേക്ക് പോകുന്നത് ഒഴിവാക്കി സംഘമായി യാത്ര ചെയ്യുന്നതാണ് കൂടുതല്‍ സുരക്ഷിതമെന്നും മുന്നറിയിപ്പില്‍ പറയുന്നു. വാഹനങ്ങളുടെ സാങ്കേതിക അവസ്ഥ യാത്രയ്ക്ക് മുമ്പ് പരിശോധിക്കണമെന്നും അധികൃതര്‍ നിര്‍ദേശിച്ചു.

രാത്രികാല ക്യാമ്പിംഗിനിടെ തീപിടിത്ത സാധ്യത ഒഴിവാക്കാന്‍ തീ സുരക്ഷാ മാര്‍ഗനിര്‍ദേശങ്ങള്‍ കര്‍ശനമായി പാലിക്കണമെന്നും സി.ഡി.എ.എ വ്യക്തമാക്കി. തീ അണയ്ക്കാനുള്ള ഉപകരണങ്ങള്‍ തയ്യാറായിരിക്കണം. ക്യാമ്പിംഗ് അവസാനിപ്പിക്കുമ്പോള്‍ തീ പൂര്‍ണമായി അണച്ചിട്ടുണ്ടെന്ന് ഉറപ്പാക്കുകയും, പരിസരം ശുചിത്വത്തോടെ വിട്ടുപോകുകയും വേണം.

അപകടസാഹചര്യങ്ങളില്‍ അടിയന്തര സേവനങ്ങളെ വേഗത്തില്‍ ബന്ധപ്പെടാന്‍ കഴിയുന്ന വിധം ആവശ്യമായ നമ്പറുകള്‍ കൈവശം സൂക്ഷിക്കണമെന്നും അധികൃതര്‍ കൂട്ടിച്ചേര്‍ത്തു. പ്രകൃതിസൗന്ദര്യം ആസ്വദിക്കുന്നതോടൊപ്പം സ്വന്തം സുരക്ഷയ്ക്കും മുന്‍ഗണന നല്‍കണമെന്ന് സിവില്‍ ഡിഫന്‍സ് ആന്‍ഡ് ആംബുലന്‍സ് അതോറിറ്റി അറിയിച്ചു. അധികൃതര്‍ നല്‍കുന്ന നിര്‍ദേശങ്ങള്‍ പാലിക്കുന്നതിലൂടെ സുരക്ഷിതവും പ്രശ്‌നരഹിതവുമായ ക്യാമ്പിംഗ് അനുഭവം ഉറപ്പാക്കാനാകുമെന്നും സി.ഡി.എ.എ അറിയിച്ചു.

Oman’s Civil Defence and Ambulance Authority has urged campers and desert travellers to exercise extra caution, highlighting risks such as weather changes, vehicle breakdowns and lack of water.