ന്യൂഡല്‍ഹി: ബലാത്സംഗ കേസിലെ വിചാരണ തടയണമെന്ന് ആവശ്യപ്പെട്ട് മോന്‍സന്‍ മാവുങ്കല്‍ സുപ്രിംകോടതിയില്‍. കേസിലെ പരാതിക്കാരിയെ പ്രായപൂര്‍ത്തിയാകാത്തപ്പോള്‍ പീഡിപ്പിച്ചെന്ന കേസില്‍ താന്‍ ശിക്ഷ അനുഭവിക്കുകയാണെന്നും അതേ പരാതിക്കാരിയെ പ്രായപൂര്‍ത്തിയായപ്പോള്‍ പീഡിപ്പിച്ചെന്ന മറ്റൊരു കേസില്‍ ശിക്ഷ വിധിക്കാനാകില്ലെന്നുമാണ് മോണ്‍സണ്‍ സമര്‍പ്പിച്ച ഹരജിയിലെ വാദം. ഈ ആവശ്യം നേരത്തെ ഹൈക്കോടതി തള്ളിയതിന് പിന്നാലെയാണ് അഭിഭാഷകന്‍ പി വിഷ്ണു മോണ്‍സണായി ഹരജി സമര്‍പ്പിച്ചത്.

ALSO READ: സി.ജെ റോയിയുടെ മരണം: പ്രത്യേക അന്വേഷണ സംഘം ഇന്ന് കൊച്ചിയില്‍

വീട്ടുജോലിക്കാരിയുടെ മകളെ പ്രായപൂര്‍ത്തിയാകുന്നതിനു മുന്‍പ് പീഡിപ്പിച്ച് ഗര്‍ഭിണിയാക്കുകയും ഗര്‍ഭം അലസിപ്പിക്കുകയും ചെയ്തു എന്ന കേസില്‍ എറണാകുളം പോക്‌സോ കോടതി മോന്‍സനെ ജീവപര്യന്തം തടവിനു ശിക്ഷിച്ചിരുന്നു. നിലവില്‍ പ്രായപൂര്‍ത്തിയതിന് ശേഷം പീഡിപ്പിച്ചതിനാണ് പൊലിസ് രണ്ടാമത്തെ ബലാത്സംഗ കേസ് രജിസ്റ്റര്‍ ചെയ്തത്. ഈ കേസില്‍ വിചാരണ നേരിടണമെന്ന ഹൈക്കോടതി ഉത്തരവിനെതിരെയാണ് മോന്‍സന്‍ സുപ്രീം കോടതിയെ സമീപിച്ചിരിക്കുന്നത്.