കോഴിക്കോട്: രാജ്യത്തെ ആരോഗ്യമേഖലയില്‍ പുതിയൊരു ചരിത്രം കുറിച്ചുകൊണ്ട്, ഇന്ത്യയിലെ ആദ്യത്തെ സമ്പൂര്‍ണ അവയവമാറ്റ ആശുപത്രിക്ക് (Organ Transplant Institute) കോഴിക്കോട് ഇന്ന് തുടക്കമാവുന്നു. വൈകുന്നേരം നടക്കുന്ന ചടങ്ങില്‍ മുഖ്യമന്ത്രി പിണറായി വിജയന്‍ പദ്ധതിയുടെ തറക്കല്ലിടല്‍ കര്‍മം നിര്‍വഹിക്കും. ആരോഗ്യവകുപ്പ് മന്ത്രി വീണ ജോര്‍ജ് ചടങ്ങില്‍ അധ്യക്ഷത വഹിക്കും.

കിഫ്ബിയുടെ (KIFBI) സാമ്പത്തിക സഹായത്തോടെ 617 കോടി രൂപ ചെലവഴിച്ചാണ് പദ്ധതി നടപ്പാക്കുന്നത്. കോഴിക്കോട് ചേവായൂരിലെ കുഷ്ഠരോഗാശുപത്രി (ത്വക്ക് രോഗാശുപത്രി) വളപ്പിലുള്ള 20 ഏക്കര്‍ സ്ഥലത്താണ് അത്യാധുനിക സൗകര്യങ്ങളോടെ ആശുപത്രി ഉയരുന്നത്.

എട്ട് നിലകളിലായി നിര്‍മിക്കുന്ന കെട്ടിടത്തില്‍ 500ലധികം കിടക്കകള്‍, അത്യാധുനിക ഐ.സി.യു (ICU), ഡയാലിസിസ് യൂണിറ്റുകള്‍, സ്‌പെഷ്യലൈസ്ഡ് ഓപ്പറേഷന്‍ തിയേറ്ററുകള്‍ എന്നിവയുണ്ടാകും. എല്ലാത്തരം അവയവമാറ്റ ശസ്ത്രക്രിയകളും ഒരൊറ്റ കുടക്കീഴില്‍ കൊണ്ടുവരികയും സാധാരണക്കാര്‍ക്ക് കുറഞ്ഞ ചെലവില്‍ ചികിത്സ ലഭ്യമാക്കുകയും ചെയ്യുന്നതാണ്.

 ALSO READ: സുരക്ഷാ മാനദണ്ഡങ്ങളിൽ വീഴ്ച; 74 സ്വകാര്യ സ്കൂളുകൾക്കെതിരെ നടപടിയുമായി സഊദി അറേബ്യ

നേട്ടങ്ങള്‍ 

നിലവില്‍ സ്വകാര്യ മേഖലയില്‍ വലിയ തുക നല്‍കേണ്ടി വരുന്ന അവയവമാറ്റ ശസ്ത്രക്രിയകളുടെ ചെലവ്, ഈ ഇന്‍സ്റ്റിറ്റ്യൂട്ട് വരുന്നതോടെ മൂന്നിലൊന്നായി കുറയുമെന്നാണ് സര്‍ക്കാര്‍ കണക്കുകൂട്ടുന്നത്. രോഗികള്‍ക്കുള്ള ചികിത്സയ്ക്ക് പുറമെ, ആരോഗ്യ പ്രവര്‍ത്തകര്‍ക്കായുള്ള പ്രത്യേക പരിശീലന കേന്ദ്രമായും ഗവേഷണ കേന്ദ്രമായും (Research & Training Cetnre) ഈ സ്ഥാപനം പ്രവര്‍ത്തിക്കും.

രണ്ട് ഘട്ടങ്ങളായിട്ടാണ് നിര്‍മാണ പ്രവര്‍ത്തനങ്ങള്‍ പൂര്‍ത്തിയാക്കാന്‍ ലക്ഷ്യമിടുന്നത്. കേരളത്തിന്റെ ആരോഗ്യമേഖലയിലെ അഭിമാന പദ്ധതിയായി മാറുന്ന ഈ ഇന്‍സ്റ്റിറ്റ്യൂട്ട്, അവയവമാറ്റ ശസ്ത്രക്രിയയുമായി ബന്ധപ്പെട്ട എല്ലാ ആധുനിക ചികിത്സകളും സാധാരണക്കാരിലേക്ക് എത്തിക്കാന്‍ സഹായിക്കും.

Chief Minister Pinarayi Vijayan is set to lay the foundation stone for India's first dedicated organ transplant hospital in Kozhikode, a ₹617-crore KIIFB-funded project aimed at providing advanced, affordable transplantation facilities under one roof.