ഹരാരെ: അണ്ടർ-19 ലോകകപ്പ് ഫൈനലിൽ ഇംഗ്ലണ്ടിനെതിരെ 80 പന്തിൽ 175 റൺസ് നേടി ക്രിക്കറ്റ് ലോകത്തെ വിസ്മയിപ്പിച്ച വൈഭവ് സൂര്യവംശി ഇനി ജൂനിയർ ലോകകപ്പ് കളിക്കില്ല. 14 വയസ്സും 317 ദിവസവും മാത്രം പ്രായമുള്ള ഈ ബിഹാർ സ്വദേശിക്ക് സാങ്കേതികമായി 2028-ലെയും 2030-ലെയും അണ്ടർ-19 ലോകകപ്പുകളിൽ കളിക്കാൻ അർഹതയുണ്ട്. എന്നാൽ ബിസിസിഐയുടെ കർശനമായ പുതിയ നിയമങ്ങളാണ് വൈഭവിനെ ഇതിൽ നിന്നും തടയുന്നത്.

എന്താണ് ഈ നിയമം?

2026-ൽ ബിസിസിഐ വർക്കിംഗ് കമ്മിറ്റി നടപ്പിലാക്കിയ പുതിയ പരിഷ്‌കാരം അനുസരിച്ച്, ഒരു കളിക്കാരന് ഒരു തവണ മാത്രമേ അണ്ടർ-19 ലോകകപ്പിൽ ഇന്ത്യയെ പ്രതിനിധീകരിക്കാൻ സാധിക്കൂ.

പ്രായപരിധി ബാക്കിയുണ്ടെങ്കിലും ഒരു ലോകകപ്പ് കളിച്ചു കഴിഞ്ഞാൽ പിന്നീട് ആ താരത്തെ ജൂനിയർ ലോകകപ്പിലേക്ക് പരിഗണിക്കില്ല.ജൂനിയർ ക്രിക്കറ്റ് സിസ്റ്റത്തിൽ പരമാവധി രണ്ട് സീസണുകൾ മാത്രമേ ഒരു താരത്തിന് അനുവദിക്കൂ.

രാഹുൽ ദ്രാവിഡിന്റെ നിലപാട്

മുൻ ഇന്ത്യൻ പരിശീലകനും എൻസിഎ തലവനുമായിരുന്ന രാഹുൽ ദ്രാവിഡിന്റെ നിരീക്ഷണങ്ങളാണ് ബിസിസിഐയെ ഇത്തരമൊരു തീരുമാനത്തിലേക്ക് നയിച്ചത്. ജൂനിയർ ക്രിക്കറ്റിൽ പ്രായം കുറച്ചു കാട്ടുന്ന (Age-fudging) പ്രവണതയെ ദ്രാവിഡ് ശക്തമായി എതിർത്തിരുന്നു.

"ജൂനിയർ ക്രിക്കറ്റിലെ വഞ്ചന കുട്ടികളെ പിന്നീട് വലിയ അഴിമതികളിലേക്ക് നയിക്കും. 14-ാം വയസ്സിൽ പ്രായം തിരുത്തുന്ന ഒരു കുട്ടി 25-ാം വയസ്സിൽ ഒത്തുകളിയിലേക്കും അഴിമതിയിലേക്കും തിരിയാൻ സാധ്യതയുണ്ട്," എന്നായിരുന്നു ദ്രാവിഡിന്റെ പ്രശസ്തമായ നിരീക്ഷണം.

മുൻകാലങ്ങളിൽ രവീന്ദ്ര ജഡേജ (2006, 2008), സർഫറാസ് ഖാൻ (2014, 2016) തുടങ്ങിയവർ ഒന്നിലധികം ലോകകപ്പുകൾ കളിച്ചിട്ടുണ്ടെങ്കിലും, പുതിയ താരങ്ങൾക്ക് അവസരം ഉറപ്പാക്കാനാണ് ബിസിസിഐ ഇപ്പോൾ ഈ നിയന്ത്രണം കൊണ്ടുവന്നിരിക്കുന്നത്.

റെക്കോർഡുകളുടെ 'സൂര്യവംശി'

ഇംഗ്ലണ്ടിനെതിരായ ഫൈനലിൽ വൈഭവ് കുറിച്ച ചില റെക്കോർഡുകൾ:

• അതിവേഗ സെഞ്ച്വറി: 

അണ്ടർ-19 ലോകകപ്പ് ചരിത്രത്തിലെ രണ്ടാമത്തെ അതിവേഗ സെഞ്ച്വറി (55 പന്തിൽ).

• കൂടുതൽ സിക്‌സറുകൾ: 

ഒരു ഇന്നിംഗ്‌സിൽ 15 സിക്‌സറുകൾ.

• യുവ താരം: 

ലിസ്റ്റ്-എ ക്രിക്കറ്റിൽ സെഞ്ച്വറി നേടുന്ന ഏറ്റവും പ്രായം കുറഞ്ഞ താരം.

അടുത്ത ലക്ഷ്യം സീനിയർ ടീം?

അണ്ടർ-19 ലോകകപ്പ് കിരീടവും പ്ലെയർ ഓഫ് ദ ടൂർണമെന്റ് പുരസ്‌കാരവും നേടിയ വൈഭവ് ഇനി സീനിയർ ടീമിലേക്കുള്ള ചുവടുവെപ്പിലാകും. എന്നാൽ ഐസിസിയുടെ നിയമപ്രകാരം അന്താരാഷ്ട്ര ക്രിക്കറ്റ് കളിക്കാൻ 15 വയസ്സ് പൂർത്തിയാകണം. 2026 മാർച്ച് 27-ന് വൈഭവിന് 15 വയസ്സ് തികയുന്നതോടെ താരത്തിന് ഇന്ത്യൻ സീനിയർ ടീമിലേക്ക് വാതിൽ തുറക്കപ്പെടും.