ഗുവാഹതി: അസം മുഖ്യമന്ത്രി ഹിമന്ത ബിശ്വ ശര്‍മ്മ തുടര്‍ച്ചയായി നടത്തുന്ന വിദ്വേഷ പ്രസംഗങ്ങള്‍ക്കെതിരേ സ്വമേധയാ  കേസെടുക്കണമെന്നാവശ്യപ്പെട്ട് നാല്‍പ്പതിലധികം പൗരപ്രമുഖര്‍ ഗുവാഹത്തി ഹൈക്കോടതിയെ സമീപിച്ചു. മുഖ്യമന്ത്രി ഭരണഘടനാ വിരുദ്ധമായ പ്രസ്താവനകള്‍ നടത്തുന്നുവെന്നും പ്രത്യേക വിഭാഗത്തെ ലക്ഷ്യമിട്ട് അധിക്ഷേപങ്ങള്‍ ചൊരിയുന്നുവെന്നും ചൂണ്ടിക്കാട്ടി ചീഫ് ജസ്റ്റിസ് അശുതോഷ് കുമാറിന് കത്ത് നല്‍കി.

ബംഗാള്‍ വംശജരായ മുസ്ലിംകളെ (മിയ വിഭാഗം) ലക്ഷ്യമിട്ട് മുഖ്യമന്ത്രി നടത്തിക്കൊണ്ടിരിക്കുന്ന പ്രസ്താവനകള്‍ ഭരണഘടന ഉറപ്പുനല്‍കുന്ന തുല്യതയ്ക്കും മാന്യമായി ജീവിക്കാനുള്ള അവകാശത്തിനും മേലുള്ള കടന്നുകയറ്റമാണെന്ന് കത്തില്‍ പറയുന്നു.

മിയ വിഭാഗക്കാര്‍ക്ക് അവരുടെ തൊഴിലിന് അര്‍ഹമായ കൂലി നല്‍കരുതെന്നും അവരെ പ്രയാസപ്പെടുത്തണമെന്നും മുഖ്യമന്ത്രി ആഹ്വാനം ചെയ്തതായി കത്തില്‍ ചൂണ്ടിക്കാട്ടുന്നു. വോട്ടര്‍പട്ടിക പുതുക്കുന്ന വേളയില്‍ പ്രത്യേക വിഭാഗത്തിന്റെ വോട്ടുകള്‍ ഒഴിവാക്കാന്‍ പാര്‍ട്ടി പ്രവര്‍ത്തകര്‍ക്ക് നിര്‍ദേശം നല്‍കിയത് ഭരണഘടനാ ലംഘനമാണ്. സത്യപ്രതിജ്ഞാ ലംഘനമാണ് മുഖ്യമന്ത്രി ഇതിലൂടെ നടത്തിയിരിക്കുന്നത്. വിദ്വേഷ പ്രസംഗങ്ങള്‍ക്കെതിരായ സുപ്രിംകോടതിയുടെ ഉത്തരവുകള്‍ അസമില്‍ ലംഘിക്കപ്പെടുന്നുവെന്നും കത്തില്‍ വ്യക്തമാക്കുന്നു.

പ്രമുഖ പണ്ഡിതന്‍ ഡോ. ഹിരേന്‍ ഗൊഹൈന്‍, മുന്‍ അസം ഡി.ജി.പി ഹരേകൃഷ്ണ ഡേക്ക, ഗുവാഹത്തി മുന്‍ ആര്‍ച്ച് ബിഷപ്പ് തോമസ് മേനംപറമ്പില്‍, രാജ്യസഭാ എം.പി അജിത് കുമാര്‍ ഭൂയാന്‍ എന്നിവരുള്‍പ്പെടെ മുന്‍ ഐ.എ.എസ് ഉദ്യോഗസ്ഥരും മുതിര്‍ന്ന പത്രപ്രവര്‍ത്തകരും സാമൂഹിക പ്രവര്‍ത്തകരുമായ 43 പ്രമുഖരാണ് കത്തില്‍ ഒപ്പിട്ടിരിക്കുന്നത്.