തിരുവനന്തപുരം: ഇന്ത്യൻ റെയിൽവേയുടെ ഓൺലൈൻ യാത്രാ സേവനങ്ങൾ ഇനി മുതൽ 'റെയിൽ വൺ' എന്ന ഏകീകൃത പ്ലാറ്റ്‌ഫോമിലേക്ക് മാറുന്നു. നിലവിൽ ഉപയോഗത്തിലുള്ള യു.ടി.എസ് ആപ്പ് മാർച്ച് ഒന്ന് മുതൽ പൂർണമായും പ്രവർത്തനരഹിതമാകുമെന്ന് പാസഞ്ചർ മാർക്കറ്റിങ് ചീഫ് കൊമേഴ്‌സ്യൽ മാനേജരുടെ ഓഫിസ് അറിയിച്ചു.

റെയിൽവേയുടെ ഐ.ടി വിഭാഗമായ ക്രിസ് (CRIS) ആണ് പുതിയ മാറ്റങ്ങൾക്ക് നേതൃത്വം നൽകുന്നത്.പുതിയ പ്ലാറ്റ്‌ഫോമിലേക്കുള്ള മാറ്റത്തിന്റെ ഭാഗമായി യു.ടി.എസ് ആപ്പിലെ സീസൺ ടിക്കറ്റ് ബുക്കിങ്, പുതുക്കൽ, പുതിയ രജിസ്‌ട്രേഷൻ എന്നിവ ഇതിനകം നിർത്തിവെച്ചു. 
ആപ്പിന്റെ പുതിയ പതിപ്പ് ഡൗൺലോഡ് ചെയ്യുന്നവർക്കോ അപ്‌ഡേറ്റ് ചെയ്യുന്നവർക്കോ ഇനി മുതൽ പ്ലാറ്റ്‌ഫോം ടിക്കറ്റുകൾ ബുക്ക് ചെയ്യാനോ ആർ-വാലറ്റ് റീചാർജ് ചെയ്യാനോ സാധിക്കില്ല. മാർച്ച് ഒന്നോടെ യു.ടി.എസ് സംവിധാനം പൂർണമായും റെയിൽ വണ്ണിലേക്ക് ലയിക്കും.

യു.ടി.എസ് ആപ്പ് നിർത്തലാക്കിയാലും ഉപയോക്താക്കളുടെ ആർ-വാലറ്റിലുള്ള തുക നഷ്ടപ്പെടില്ലെന്ന് റെയിൽവേ ഉറപ്പുനൽകുന്നു. യാത്രക്കാർക്ക് നിലവിലെ ബാലൻസ് പുതിയ 'റെയിൽ വൺ' ആപ്പിലും തുടർന്ന് ഉപയോഗിക്കാൻ സാധിക്കും. യു.പി.ഐ, ഡെബിറ്റ്/ക്രെഡിറ്റ് കാർഡുകൾ, നെറ്റ് ബാങ്കിങ് എന്നിവ വഴി ഇതിൽ സുരക്ഷിതമായി ഇടപാടുകൾ നടത്താം. റിസർവ്ഡ്, അൺറിസർവ്ഡ്, സീസൺ, പ്ലാറ്റ്‌ഫോം ടിക്കറ്റുകൾ ഇനി മുതൽ റെയിൽ വൺ വഴി ഒറ്റയടിക്ക് ബുക്ക് ചെയ്യാം. ഇതിന് പുറമെ ട്രെയിനുകളുടെ ലൈവ് സ്റ്റാറ്റസ്, സമയക്രമം, പ്ലാറ്റ്‌ഫോം വിവരങ്ങൾ, കോച്ച് പൊസിഷൻ എന്നിവ അറിയാനും പി.എൻ.ആർ സ്റ്റാറ്റസ് പരിശോധിക്കാനും സാധിക്കും.