നാദാപുരം: വിവാഹച്ചടങ്ങിനിടെ രണ്ടാം ക്ലാസ് വിദ്യാർത്ഥിനിയെ ലൈംഗികമായി ഉപദ്രവിച്ച കേസിൽ പ്രതിക്ക് കഠിനതടവും പിഴയും വിധിച്ച് കോടതി. പേരാമ്പ്ര കൽപത്തൂർ സ്വദേശി തട്ടാൻകണ്ടി കോളനിയിൽ ദാമോദരനെയാണ് നാദാപുരം പോക്‌സോ കോടതി ശിക്ഷിച്ചത്. ആറ് വർഷം കഠിനതടവിനും 10,000 രൂപ പിഴയൊടുക്കാനുമാണ് വിധി. പിഴത്തുക അടച്ചില്ലെങ്കിൽ പ്രതി അധിക ശിക്ഷ അനുഭവിക്കേണ്ടി വരും.

പേരാമ്പ്ര അഞ്ചാംപീടികയിലെ ഒരു കല്യാണ വീട്ടിൽ വെച്ചായിരുന്നു കേസിനാസ്പദമായ സംഭവം നടന്നത്. വിവാഹച്ചടങ്ങിൽ പങ്കെടുക്കാൻ എത്തിയ പെൺകുട്ടിയെ പ്രതി ലൈംഗിക ഉദ്ദേശത്തോടെ അതിക്രമത്തിന് വിധേയയാക്കുകയായിരുന്നു. ജനത്തിരക്കുള്ള വിവാഹവേദിയിൽ വെച്ച് നടന്ന അതിക്രമം വീട്ടുകാരുടെ ശ്രദ്ധയിൽ പെട്ടിരുന്നില്ല. എന്നാൽ, തനിക്കുണ്ടായ ദുരനുഭവം കുട്ടി പിന്നീട് സ്കൂളിലെ അധ്യാപികയോട് വെളിപ്പെടുത്തിയതോടെയാണ് വിവരം പുറത്തറിയുന്നത്.

ALSO READ: ലേഖനം എഴുതിയതിന് പ്രതികാര നടപടി: കെഎസ്ആർടിസി ജീവനക്കാരന്റെ സ്ഥലംമാറ്റം ഹൈക്കോടതി റദ്ദാക്കി

കുട്ടിയിൽ നിന്നും വിവരം അറിഞ്ഞ സ്കൂൾ അധികൃതർ ഒട്ടും വൈകാതെ തന്നെ പേരാമ്പ്ര പൊലിസിനെ വിവരം അറിയിച്ചു. സ്കൂളിൽ നിന്നും ലഭിച്ച ഗൗരവകരമായ വിവരത്തിന്റെ അടിസ്ഥാനത്തിൽ പൊലിസ് ഉദ്യോഗസ്ഥർ പെൺകുട്ടിയുടെ വീട്ടിലെത്തി വിശദമായ മൊഴി രേഖപ്പെടുത്തി കേസ് രജിസ്റ്റർ ചെയ്യുകയായിരുന്നു. കുട്ടിയുടെ വെളിപ്പെടുത്തലാണ് ക്രൂരത പുറംലോകമറിഞ്ഞതിനും നിയമനടപടികൾക്കും വഴിയൊരുക്കിയത്.

പേരാമ്പ്ര എസ്.ഐ സജി അഗസ്റ്റിൻ, എ.എസ്.ഐ ശ്രീജ എന്നിവരുടെ നേതൃത്വത്തിലാണ് കേസിന്റെ അന്വേഷണം നടന്നത്. കൃത്യമായ തെളിവുകൾ ശേഖരിച്ചും സമയബന്ധിതമായി കുറ്റപത്രം സമർപ്പിച്ചും പോലീസ് അന്വേഷണം പൂർത്തിയാക്കി. കുട്ടികൾക്കെതിരായ അതിക്രമമായതിനാൽ അതീവ ഗൗരവത്തോടെയാണ് അന്വേഷണസംഘം ഓരോ ഘട്ടവും കൈകാര്യം ചെയ്തത്.

നാദാപുരം പോക്‌സോ കോടതിയിൽ നടന്ന വിചാരണാവേളയിൽ പ്രോസിക്യൂഷൻ ഒൻപത് സാക്ഷികളെ വിസ്തരിക്കുകയും 14 പ്രധാന രേഖകൾ ഹാജരാക്കുകയും ചെയ്തു. പ്രോസിക്യൂഷൻ ഹാജരാക്കിയ ശാസ്ത്രീയവും സാഹചര്യപരവുമായ തെളിവുകൾ പ്രതിക്കെതിരായ കുറ്റം തെളിയിക്കുന്നതിൽ നിർണ്ണായകമായി. സ്പെഷ്യൽ പബ്ലിക് പ്രോസിക്യൂട്ടർ മനോജ് അരൂർ ആണ് പ്രോസിക്യൂഷന് വേണ്ടി ഹാജരായത്. 

A local court in Nadapuram has sentenced a man from Perambra to six years of rigorous imprisonment for sexually assaulting a second-grade student. The incident occurred during a wedding ceremony at Perambra Anjampiedika, where the convict, Damodaran, targeted the young girl.