അബുദബി: സ്കൂളുകളിൽ കൃത്രിമബുദ്ധി (AI) ഉപയോഗിക്കുന്നതിന് കർശന നിയന്ത്രണങ്ങളുമായി യുഎഇ വിദ്യാഭ്യാസ മന്ത്രാലയം. 13 വയസ്സിൽ താഴെയുള്ള കുട്ടികൾ പഠന ആവശ്യങ്ങൾക്കായി എഐ ജനറേറ്റീവ് ഉപകരണങ്ങൾ ഉപയോഗിക്കുന്നത് പൂർണ്ണമായും നിരോധിച്ചു. അക്കാദമിക് മൂല്യങ്ങൾ സംരക്ഷിക്കുന്നതിനും വിദ്യാർത്ഥികളുടെ സുരക്ഷ ഉറപ്പാക്കുന്നതിനുമായി 'ക്ലാസ് മുറികളിലെ എഐ ഉപയോഗം 2026' എന്ന പേരിൽ മന്ത്രാലയം പുതിയ മാനുവൽ പുറത്തിറക്കി.

13 വയസ്സിന് താഴെയുള്ള കുട്ടികൾക്കും ഏഴ് വയസ്സിന് താഴെയുള്ള ഗ്രേഡുകളിൽ പഠിക്കുന്നവർക്കും ChatGPT ഉൾപ്പെടെയുള്ള എഐ ജനറേറ്റീവ് ആപ്പുകൾ ഉപയോഗിക്കാൻ അനുവാദമില്ല. കുട്ടികളുടെ സ്വാഭാവിക സർഗ്ഗാത്മകതയും സ്വതന്ത്ര ചിന്താശേഷിയും സംരക്ഷിക്കാനായാണ് പുതിയ തീരുമാനം.

അസൈൻമെന്റുകൾ, പ്രോജക്റ്റുകൾ, റിപ്പോർട്ടുകൾ എന്നിവ തയ്യാറാക്കാൻ എഐ ഉപയോഗിക്കുന്നത് വെളിപ്പെടുത്തിയില്ലെങ്കിൽ അത് ഗുരുതരമായ ചട്ടലംഘനമായി കണക്കാക്കും. ഔദ്യോഗിക പരീക്ഷകളിലും മൂല്യനിർണ്ണയങ്ങളിലും എഐ ഉപയോഗിക്കുന്നത് പൂർണ്ണമായും വിലക്കിയിട്ടുണ്ട്.

ALSO READ: ഇന്ത്യയിലെ എഐ ഉച്ചകോടിയിൽ പങ്കെടുക്കുന്ന യുഎഇ പ്രതിനിധി സംഘത്തെ അബുദബി കിരീടാവകാശി ശൈഖ് ഖാലിദ് ബിൻ മുഹമ്മദ് നയിക്കും

അധ്യാപകരുടെ നേരിട്ടുള്ള മേൽനോട്ടത്തിൽ മാത്രമേ ഉയർന്ന ക്ലാസുകളിലെ വിദ്യാർത്ഥികൾക്ക് എഐ ഉപയോഗിക്കാൻ അനുവാദമുള്ളൂ. എഐ നൽകുന്ന വിവരങ്ങളുടെ കൃത്യതയും വിശ്വാസ്യതയും ഉറപ്പുവരുത്തേണ്ട ഉത്തരവാദിത്തം അധ്യാപകർക്കും വിദ്യാർത്ഥികൾക്കുമായിരിക്കും.

വിദ്യാർത്ഥികളുടെയോ അധ്യാപകരുടെയോ സ്വകാര്യ വിവരങ്ങൾ (പേര്, ഫോട്ടോ, വീഡിയോ തുടങ്ങിയവ) എഐ പ്ലാറ്റ്‌ഫോമുകളിൽ അപ്‌ലോഡ് ചെയ്യുന്നതും മന്ത്രാലയം നിരോധിച്ചു. രാജ്യത്തിന്റെ സാംസ്കാരികവും മതപരവുമായ മൂല്യങ്ങൾക്ക് നിരക്കാത്ത ഉള്ളടക്കങ്ങൾ നിർമ്മിക്കുന്നതിനോ, വിദ്വേഷ പ്രസംഗങ്ങൾക്കും സൈബർ ഭീഷണികൾക്കും സാങ്കേതികവിദ്യ ഉപയോഗിക്കുന്നതിനോ എതിരെ കർശനമായ മുന്നറിയിപ്പുണ്ട്.

സ്കൂളുകളിലെ ഫയർവാളുകൾ മറികടക്കുന്നതിനോ, നിരോധിച്ച പ്ലാറ്റ്‌ഫോമുകൾ ഉപയോഗിക്കാൻ വിപിഎൻ (VPN) സഹായം തേടുന്നതിനോ അനുവാദമില്ല. ഡീപ്ഫേക്ക് വീഡിയോകൾ നിർമ്മിക്കുന്നതും പകർപ്പവകാശമുള്ള വസ്തുക്കൾ അനുമതിയില്ലാതെ പ്രചരിപ്പിക്കുന്നതും ശിക്ഷാർഹമായ കുറ്റമായിരിക്കും.

വിദ്യാഭ്യാസ നിലവാരം ഉയർത്തുന്നതിനൊപ്പം സാങ്കേതികവിദ്യയുടെ ദുരുപയോഗം തടയാനും ഈ പുതിയ ചട്ടക്കൂട് സഹായിക്കുമെന്ന് മന്ത്രാലയം വ്യക്തമാക്കി. അധ്യാപനത്തിന് പകരമാകുന്നതിനേക്കാൾ, പഠനത്തെ സഹായിക്കുന്ന ഒരു ഉപകരണം മാത്രമായി എഐ ഉപയോഗിക്കപ്പെടണമെന്നാണ് യുഎഇ ലക്ഷ്യമിടുന്നത്.

the new regulations in the uae impose strict limits on artificial intelligence use in schools, banning students under 13 years from accessing ai tools while ensuring safer digital learning environments nationwide across the education sector.