ദുബൈ: വിശുദ്ധ റമദാന്‍ മാസത്തിന്റെ ആദ്യ ദിനമായ ഇന്ന് രാവിലെ ഷാര്‍ജയെയും ദുബൈയെയും ബന്ധിപ്പിക്കുന്ന പ്രധാന റോഡുകളില്‍ കനത്ത ഗതാഗതക്കുരുക്ക് അനുഭവപ്പെട്ടു. പ്രവൃത്തി സമയത്തിലും സ്‌കൂള്‍ സമയത്തിലും വന്ന മാറ്റവും വിവിധയിടങ്ങളിലുണ്ടായ വാഹനാപകടങ്ങളുമാണ് ഗതാഗതം സ്തംഭിക്കാന്‍ കാരണമായത്.
റമദാന്‍ ദിനചര്യകളിലേക്കുള്ള പെട്ടെന്നുള്ള മാറ്റം രാവിലെ ഒരേസമയം വാഹനങ്ങള്‍ നിരത്തിലിറങ്ങാന്‍ കാരണമായി. ഇത്തിഹാദ് റോഡ്, അല്‍ വഹ്ദ സ്ട്രീറ്റ് എന്നിവിടങ്ങളിലാണ് ഏറ്റവും വലിയ തടസ്സങ്ങള്‍ റിപ്പോര്‍ട്ട് ചെയ്തത്. ഗൂഗിള്‍ മാപ്‌സിലെ വിവരങ്ങള്‍ പ്രകാരം ഈ പാതകളില്‍ ഉണ്ടായ ചെറിയ അപകടങ്ങള്‍ വാഹനങ്ങളുടെ വേഗത കുറയാന്‍ കാരണമായി. ഷെയ്ഖ് മുഹമ്മദ് ബിന്‍ സായിദ് റോഡിലെ ഷാര്‍ജ ഇന്‍ഡസ്ട്രിയല്‍ ഏരിയ ഭാഗത്തും വലിയ തിരക്ക് അനുഭവപ്പെട്ടു.
ഇതര പാതകളായ മലീഹ സ്ട്രീറ്റ്, എമിറേറ്റ്‌സ് റോഡ് എന്നിവടങ്ങളിലും അല്‍ ബദീഅ് ഭാഗത്ത് വന്‍ തിരക്ക് ദൃശ്യമായി. E11, E311 റോഡുകള്‍ക്ക് പകരമായി ഉപയോഗിക്കുന്ന ഈ പാതകളിലും വാഹനങ്ങളുടെ അമിത പ്രവാഹം തടസ്സങ്ങള്‍ സൃഷ്ടിച്ചു.

സുരക്ഷിതമായി ഡ്രൈവ് ചെയ്യുക: ദുബൈ പോലീസ്

നോമ്പ് എടുക്കുന്നവര്‍ വാഹനമോടിക്കുമ്പോള്‍ കൂടുതല്‍ ശ്രദ്ധിക്കണമെന്ന് ദുബൈ പോലീസ് നിര്‍ദ്ദേശിച്ചു. 'പുണ്യമാസം ആരംഭിക്കുമ്പോള്‍, ലക്ഷ്യസ്ഥാനത്ത് സുരക്ഷിതമായി എത്താന്‍ ആവശ്യമായ സമയം കണക്കാക്കി യാത്ര തുടങ്ങുക. സുരക്ഷിതമായ ഡ്രൈവിംഗ് ശീലങ്ങള്‍ റമദാനിലുടനീളം എല്ലാവര്‍ക്കും അപകടരഹിതമായ യാത്ര ഉറപ്പാക്കും,' പോലീസ് സോഷ്യല്‍ മീഡിയ വഴി അറിയിച്ചു.

ശ്രദ്ധിക്കേണ്ട കാര്യങ്ങള്‍:

* അപകട സാധ്യത: ഉറക്കക്കുറവ്, നിര്‍ജ്ജലീകരണം, കുറഞ്ഞ രക്തസമ്മര്‍ദ്ദം എന്നിവ ഡ്രൈവര്‍മാരുടെ ഏകാഗ്രതയെ ബാധിക്കാന്‍ സാധ്യതയുണ്ട്. റമദാന്‍ ആദ്യ വാരങ്ങളില്‍ അപകടങ്ങള്‍ കൂടാന്‍ ഇത് കാരണമാകാറുണ്ട്.
* മുന്‍കരുതല്‍: യാത്രകളില്‍ കൃത്യമായ സമയക്രമം പാലിക്കുക. സീറ്റ് ബെല്‍റ്റ് നിര്‍ബന്ധമായും ധരിക്കുക.
* വേഗത വേണ്ട: കുറച്ച് മിനിറ്റുകള്‍ വൈകി എത്തുന്നത് കുഴപ്പമില്ലെന്ന് കരുതുക. അമിതവേഗതയും മുന്‍പിലെ വാഹനത്തോട് ചേര്‍ത്തോടിക്കുന്നതും (Tailgating) ഒഴിവാക്കുക.
* ക്ഷീണം തോന്നിയാല്‍: വാഹനമോടിക്കുമ്പോള്‍ ക്ഷീണമോ ഉറക്കമോ തോന്നിയാല്‍ ഉടന്‍ വാഹനം സുരക്ഷിതമായ ഒരിടത്തേക്ക് മാറ്റി നിര്‍ത്തി വിശ്രമിക്കുക. ഇഫ്താര്‍ സമയത്തിന് തൊട്ടുമുന്‍പുള്ള യാത്രകള്‍ പരമാവധി ഒഴിവാക്കാന്‍ ശ്രമിക്കുക.

Summary:
Commuters traveling between Sharjah and Dubai faced significant delays on the first morning of Ramadan due to a concentrated surge in vehicles and several minor road accidents. The congestion was primarily attributed to the shift in office and school timings, which condensed the morning peak hour traffic.