പട്ന: ബിഹാർ സ്കൂൾ എക്സാമിനേഷൻ ബോർഡിന്റെ (BSEB) പന്ത്രണ്ടാം ക്ലാസ് പരീക്ഷാ കേന്ദ്രത്തിന് പുറത്ത് റിപ്പോർട്ടിംഗിനെത്തിയ വനിതാ മാധ്യമപ്രവർത്തകർക്ക് നേരെ പ്ലസ് ടു വിദ്യാർത്ഥികളുടെ അഴിഞ്ഞാട്ടം. പരീക്ഷാ റിവ്യൂ എടുക്കുന്നതിനിടെ വിദ്യാർത്ഥികൾ ഒത്തുചേർന്ന് മാധ്യമപ്രവർത്തകരെ ശാരീരികമായി ഉപദ്രവിക്കുകയും അധിക്ഷേപിക്കുകയും ചെയ്യുന്ന രണ്ട് വീഡിയോകളാണ് ഇപ്പോൾ സോഷ്യൽ മീഡിയയിൽ പ്രചരിക്കുന്നത്.

സംഭവിച്ചത് ഇങ്ങനെ:

ഒരു പരീക്ഷാ കേന്ദ്രത്തിന് പുറത്ത് വിദ്യാർത്ഥികളോട് സംസാരിക്കാൻ ശ്രമിക്കവേ, ഒരു വലിയ സംഘം വിദ്യാർത്ഥികൾ വനിതാ റിപ്പോർട്ടറെ വളയുകയായിരുന്നു. ഇവരെ തള്ളുകയും ശരീരത്തിൽ സ്പർശിക്കുകയും ചെയ്ത വിദ്യാർത്ഥികൾ റിപ്പോർട്ടിംഗ് തടസ്സപ്പെടുത്തി. "നിങ്ങളെപ്പോലെയുള്ളവർ കാരണമാണ് ബിഹാർ അപമാനിക്കപ്പെടുന്നത്" എന്ന് റിപ്പോർട്ടർ ദേഷ്യത്തോടെ പ്രതികരിക്കുന്നത് വീഡിയോയിൽ കാണാം.

Class 12th Students Misbehaved with a Reporter who came to take review of students after 12th Bihar Board Exam:
pic.twitter.com/goDPc3Eiki

— Ghar Ke Kalesh (@gharkekalesh) February 8, 2026

മറ്റൊരു വീഡിയോയിൽ, പരീക്ഷ എങ്ങനെയുണ്ടായിരുന്നു എന്ന ചോദ്യത്തിന് ഒരു വിദ്യാർത്ഥി നൽകിയ മറുപടി അങ്ങേയറ്റം ലജ്ജാകരമാണ്. "നിങ്ങളുടെ ഫോൺ നമ്പർ തരൂ, രാത്രിയിൽ നമുക്ക് വിശദമായി സംസാരിക്കാം" എന്നായിരുന്നു വിദ്യാർത്ഥിയുടെ പരിഹാസം. ഇത് കേട്ട് ചുറ്റുമുണ്ടായിരുന്ന മറ്റ് വിദ്യാർത്ഥികൾ ആർപ്പുവിളിക്കുകയും ബഹളം വെച്ച് റിപ്പോർട്ടറെ പരിഹസിക്കുകയും ചെയ്തു.

സോഷ്യൽ മീഡിയയിൽ പ്രതിഷേധം:

വീഡിയോ വൈറലായതോടെ ബിഹാറിലെ വിദ്യാഭ്യാസ നിലവാരത്തെയും വിദ്യാർത്ഥികളുടെ മനോഭാവത്തെയും കുറിച്ചുള്ള വലിയ ചർച്ചകൾക്കാണ് തുടക്കമായിരിക്കുന്നത്. "ഇവരാണോ ബിഹാറിന്റെ ഭാവി?" എന്ന ചോദ്യമാണ് പലരും ഉയർത്തുന്നത്. വിദ്യാഭ്യാസം എന്നത് കേവലം മാർക്ക് നേടുക മാത്രമല്ല, സ്ത്രീകളോടും സമൂഹത്തോടും മാന്യമായി പെരുമാറാനുള്ള പൗരബോധം കൂടിയാണെന്ന് നെറ്റിസൺസ് ചൂണ്ടിക്കാട്ടുന്നു. സംഭവത്തിൽ കുറ്റക്കാരായ വിദ്യാർത്ഥികൾക്കെതിരെ നടപടി വേണമെന്ന ആവശ്യവും ശക്തമാണ്.