കോഴിക്കോട്: കോഴിക്കോട് മെഡിക്കല്‍ കോളജ് മാതൃശിശു സംരക്ഷണ കേന്ദ്രത്തില്‍ (IMCH) പ്രസവത്തിനെത്തിയ വനിതാ ഡോക്ടറോട് ഡ്യൂട്ടിയിലുണ്ടായിരുന്ന പിജി ഡോക്ടര്‍ മോശമായി പെരുമാറിയതായി സ്ഥിരീകരണം. സംഭവത്തില്‍ മെഡിക്കല്‍ കോളജ് സൂപ്രണ്ട് സംസ്ഥാന മനുഷ്യാവകാശ കമ്മീഷന് റിപോര്‍ട്ട് സമര്‍പ്പിച്ചു. മലപ്പുറം സ്വദേശിയായ വനിതാ ഡോക്ടര്‍ നല്‍കിയ പരാതിയിലാണ് ഇപ്പോള്‍ നടപടിയുണ്ടായിരിക്കുന്നത്.

2022 ഓഗസ്റ്റ് 17നാണ് മലപ്പുറം സ്വദേശിയായ ഡോക്ടര്‍ക്ക് പ്രസവത്തിനായി ആശുപത്രിയില്‍ എത്തിയപ്പോള്‍ ദുരനുഭവം ഉണ്ടായത്. പ്രസവമുറിയില്‍ കൂട്ടിരിപ്പുകാരെ നിയോഗിക്കുന്നതുമായി ബന്ധപ്പെട്ട തര്‍ക്കമാണ് മോശം പെരുമാറ്റത്തിലേക്ക് നയിച്ചത്. ഒന്നാം വര്‍ഷ പിജി വിദ്യാര്‍ഥിയായ ഡോക്ടറാണ് രോഗിയായ ഡോക്ടറോട് അധിക്ഷേപകരമായ രീതിയില്‍ സംസാരിച്ചത്.

ഡ്യൂട്ടിയിലുണ്ടായിരുന്ന പിജി ഡോക്ടറുടെ ഭാഗത്തുനിന്ന് വീഴ്ചയുണ്ടായതായി ഐഎംസിഎച്ച് സൂപ്രണ്ട് മനുഷ്യാവകാശ കമ്മീഷനെ അറിയിച്ചു. ആരോപണവിധേയയായ ഡോക്ടറോട് ആശുപത്രി അധികൃതര്‍ ഔദ്യോഗികമായി വിശദീകരണം ആവശ്യപ്പെട്ടിട്ടുണ്ട്. മനുഷ്യാവകാശ കമ്മീഷന്റെ ഇടപെടലിനെത്തുടര്‍ന്ന് വിഷയത്തില്‍ തുടരന്വേഷണവും അച്ചടക്ക നടപടികളും സ്വീകരിച്ചു വരികയാണ്. മെഡിക്കല്‍ രംഗത്ത് പ്രവര്‍ത്തിക്കുന്നവര്‍ക്ക് നേരെ സഹപ്രവര്‍ത്തകരില്‍ നിന്ന് തന്നെ ഇത്തരം അനുഭവങ്ങള്‍ ഉണ്ടാകുന്നത് ഗൗരവകരമാണെന്ന് മനുഷ്യാവകാശ കമ്മീഷന്‍ നിരീക്ഷിച്ചു.

ALSO READ: കെഎസ്ആര്‍ടിസി കണ്ടക്ടര്‍ക്ക് യാത്രക്കാരന്റെ കടിയേറ്റു; പ്രതി പിടിയില്‍

Kozhikode Medical College Superintendent submits report to Human Rights Commission confirming a PG doctor's misconduct towards a fellow doctor during her delivery.