കോഴിക്കോട്: തടവുകാരെ കോടതികളിലേക്ക് കൊണ്ടുപോകുമ്പോഴുള്ള വെല്ലുവിളികളും സാമ്പത്തിക നഷ്ടവും കണക്കിലെടുത്ത് ജയിലുകളെയും കോടതികളെയും ബന്ധിപ്പിച്ചുള്ള കൂടുതൽ വിഡിയോ കോൺഫറൻസിങ് യൂനിറ്റുകൾ സ്ഥാപിക്കുന്നു. വിവിധ ജില്ലകളിലായുള്ള 18 ജയിലുകളിലാണ് നിലവിലുള്ളതിന് പുറമേ 21 പുതിയ വിഡിയോ കോൺഫറൻസിങ് യൂനിറ്റുകൾ കൂടി സജ്ജമാക്കുന്നത്. തവനൂർ സെൻട്രൽ ജയിലിലേക്ക് രണ്ട് യൂനിറ്റും കോട്ടയം ആലപ്പുഴ ജില്ലാ ജയിലുകളിലേക്ക് രണ്ട് യൂനിറ്റ് വീതവുമാണ് നിലവിലുള്ളതിന് പുറമെ അനുവദിക്കുന്നത്. 

കോഴിക്കോട്, പാലക്കാട്, മാനന്തവാടി, കണ്ണൂർ, കൊല്ലം, എറണാകുളം, ഇടുക്കി എന്നിവിടങ്ങളിലെ ജില്ലാജയിലുകളിലും ഓരോ യൂനിറ്റ് അധികമായി വരും. തലശേരി, മഞ്ചേരി, പൊൻകുന്നം, ഇരിങ്ങാലക്കുട, മൂവാറ്റുപുഴ, നെയ്യാറ്റിൻകര എന്നിവിടങ്ങളിലെ സ്‌പെഷൽ സബ്ജയിലുകളിലും മട്ടാഞ്ചേരി സബ്ജയിലും എറണാകുളം ബോസ്റ്റൽ സ്‌കൂളിലും നിലവിലുള്ളതിന് പുറമെ ഒന്നുകൂടി അധികമായി സ്ഥാപിക്കും. ഇതിനായി 95 ലക്ഷം രൂപ സർക്കാർ അനുവദിച്ചു. ഏറെ തടവുകാരുള്ള ജയിലുകളിൽ നിരവധി പേരെ ഒരേ സമയത്ത് കോടതി നടപടികൾക്ക് ഓൺലൈനായി ഹാജരാക്കേണ്ടി വരുന്നതിലുള്ള സാങ്കേതിക തടസങ്ങൾ ഒന്നിലധികം വിഡിയോ കോൺഫറൻസിങ് യൂനിറ്റുകൾ വരുന്നതിലൂടെ ഒഴിവായി കിട്ടും.

ALSO READ: ബം​ഗാൾ ഉൾക്കടലിന് മുകളിൽ ന്യൂനമർദ്ദം; മഴ കനക്കും; ജാ​ഗ്രത നിർദേശം  

തടവുകാരുടെ വിചാരണയുമായി ബന്ധപ്പെട്ടും കസ്റ്റഡി അപേക്ഷയുമായി ബന്ധപ്പെട്ടുമെല്ലാം ജയിലുകളിൽ നിന്ന് ഇവരെ കോടതിയിലെത്തിക്കുക ഏറെ വെല്ലുവിളിയാണ്. ഇതിനായി ഒരു ദിവസം തന്നെ നിരവധി പൊലിസുകാരുടെ സേവനമാണ് ആവശ്യമായി വരുന്നത്. ക്രമസമാധാന വിഷയങ്ങളുൾപ്പെടെയുണ്ടാകുമ്പോൾ ഇത്തരത്തിലുള്ള എസ്‌കോർട്ട് ഡ്യൂട്ടി സേനയെ പ്രതികൂലമായി ബാധിക്കാറുണ്ട്.

കൂടാതെ മയക്കുമരുന്ന് കേസുകളിൽ പ്രതികളായുള്ള തടവുകാർ പലപ്പോഴും കോടതികളിൽ കൊണ്ടുപോയി തിരുച്ചുവരുമ്പോൾ ലഹരി വസ്തുക്കൾ ശരീരത്തിന്റെ രഹസ്യ ഭാഗങ്ങളിൽ ഒളിപ്പിച്ച് ജയിലുകളിൽ എത്തിക്കാറുണ്ട്. ഇത്തരം പ്രശ്‌നങ്ങളും വലിയ ചെലവും ഒഴിവാക്കാനാണ് ജയിലുകളെയും കോടതികളെയും ബന്ധിപ്പിച്ചുള്ള വിഡിയോ കോൺഫറൻസിങ് സംവിധാനം ആരംഭിച്ചത്.

2020ൽ ആദ്യ ഘട്ടത്തിൽ തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം ജില്ലകളിലെ 13 ജയിലുകളിലാണ് ഈ സംവിധാനം ഏർപ്പെടുത്തിയിരിക്കുന്നത്. പിന്നീട് മറ്റു ജയിലുകളിൽ കൂടി വിഡിയോ കോൺഫറൻസിങ് യൂനിറ്റ് ആരംഭിച്ചു. നിലവിൽ ജയിലുകളുടെ ആധുനികവത്കരണവുമായി ബന്ധപ്പെട്ടാണ് സൗകര്യങ്ങൾ കൂട്ടാൻ തീരുമാനിച്ചത്.