തിരുവനന്തപുരം: ആറ്റുകാല പൊങ്കാല ഡ്യൂട്ടികളുമായി സഹകരിക്കുമെന്ന് നെടുമങ്ങാട് ജില്ലാ ആശുപത്രിയിൽ സമരം ചെയ്യുന്ന കെജിഎംഒഎ ഡോക്ടർമാർ. തിരുവനന്തപുരം ജില്ല ജനറൽ ബോഡിയിൽ നടന്ന ചർച്ചയിലാണ് തീരുമാനം ഉണ്ടായത്. എന്നാൽ ജില്ലയിലെ നിസ്സഹകരണ സമരം തുടരുമെന്നും സംഘടന വ്യക്തമാക്കി. 

അതേസമയം ഡ്യൂട്ടിയിൽ ഉണ്ടായിരുന്ന വനിത ഡോക്ടർക്ക് നേരെ ഉണ്ടായ ക്രൂരമായ ആക്രമണത്തെ സംഘടന ശക്തമായി അപലപിക്കുന്നുവെന്നും ആരോഗ്യ പ്രവർത്തകർക്കെതിരായ അതിക്രമങ്ങളോടെ ഒരുതരത്തിലുള്ള വിട്ടുവീഴ്ചക്കും സംഘടന തയ്യാറല്ലെന്നും വിദഗ്ധസമിതിയുടെ റിപ്പോർട്ട് പോലും പരിഗണിക്കാതെ ഡോക്ടറെ സസ്പെൻഡ് ചെയ്ത സർക്കാർ നടപടിയും അംഗീകരിക്കാനാവില്ലെന്നും സംഘടന വ്യക്തമാക്കി. ആശുപത്രി ആക്രമണത്തിന് ഉത്തരവാദികളായ ബാക്കിയുള്ള കുറ്റവാളികളെ കൂടി ഉടനെ തന്നെ അറസ്റ്റ് ചെയ്തില്ലെങ്കിൽ വരുന്ന ദിവസങ്ങളിൽ സമരം കൂടുതൽ ശക്തമാക്കുമെന്നും സംഘടന അറിയിച്ചു. 

നെടുമങ്ങാട് ജില്ല ആശുപത്രിയിൽ നവജാതശിശു മരിച്ചത് ഡോ. ബിന്ദു സുന്ദറിന്റെ ഭാഗത്തുനിന്നുണ്ടായ ചികിത്സാ പിഴവ് കൊണ്ടാണെന്ന് ആരോപിച്ചുകൊണ്ട് കുടുംബം രംഗത്തെത്തിയിരുന്നു.  ഇതിനു പിന്നാലെ ആശുപത്രിയുടെ നേരെ പ്രതിഷേധവുമായി എത്തിയത് ആൾക്കൂട്ട ആക്രമണത്തിന്റെ തലത്തിലേക്ക് മാറിയെന്നും സൂപ്രണ്ടായ ഡോ. സുമയ്ക്ക് ഗുരുതരമായ പരുക്ക് പറ്റിയെന്നും ചൂണ്ടിക്കാട്ടിയാണ് കെജിഎംഒഎ ജില്ലയിൽ പ്രതിഷേധം നടത്തിയത്.