മക്ക: വിശുദ്ധ നഗരമായ മക്കയുടെ ഹറം പരിധിയിലുള്ള മുഴുവന്‍ പ്രദേശങ്ങളും പുണ്യസ്ഥലമാണെന്ന് സൗദി ഹജ്ജ്, ഉംറ മന്ത്രാലയം വ്യക്തമാക്കി. റമദാന്‍ മാസത്തില്‍ മസ്ജിദുല്‍ ഹറമിലെ തിരക്ക് കുറയ്ക്കുന്നതിനും തീര്‍ഥാടകര്‍ക്ക് സുഗമമായ ആരാധനാ സൗകര്യം ഉറപ്പാക്കുന്നതിനുമായാണ് മന്ത്രാലയം പുതിയ ബോധവല്‍ക്കരണ നിര്‍ദ്ദേശങ്ങള്‍ നല്‍കിയത്.
'മസ്ജിദുല്‍ ഹറമിലെ പ്രധാന ഭാഗങ്ങളില്‍ മാത്രമല്ല, ഹറം പരിധിക്കുള്ളിലെ മറ്റ് പള്ളികളിലും ഹോട്ടലുകളിലെ പ്രാര്‍ത്ഥനാ മുറികളിലും നമസ്‌കരിച്ചാലും മസ്ജിദുല്‍ ഹറാമില്‍ ലഭിക്കുന്ന അതേ പ്രതിഫലം ലഭിക്കും- മന്ത്രാലയം അറിയിച്ചു. തിരക്ക് ഒഴിവാക്കാന്‍ തീര്‍ഥാടകര്‍ താമസസ്ഥലത്തിനടുത്തുള്ള പള്ളികളെ ആശ്രയിക്കണമെന്നും നിര്‍ദ്ദേശമുണ്ട്.

ഉംറയിലെ റെക്കോര്‍ഡ്

പുണ്യമാസത്തെ പ്രത്യേക പ്രതിഫലം കാംക്ഷിച്ച് പുണ്യ ഭൂമിയില്‍ വന്‍ തിരക്കാണ് അനുഭവപ്പെടുന്നത്. ഈ റമദാന്‍ മാസം നാലാം തിയതിയാണ് ഏറ്റവും കൂടുതല്‍ തീര്‍ഥാടകര്‍ എത്തിയത്. അന്ന് മാത്രം 9.04 ലക്ഷത്തിലധികം പേര്‍ ഉംറ നിര്‍വഹിച്ചതായി ഹറം കാര്യ വകുപ്പ് അറിയിച്ചു.
ഹറം പരിസരം വൃത്തിയായി സൂക്ഷിക്കുന്നതിന്റെ ഭാഗമായി, സഅ്‌യ് പൂര്‍ത്തിയാക്കിയ ശേഷം മര്‍വ ഗേറ്റിന് സമീപമുള്ള ഔദ്യോഗിക ബാര്‍ബര്‍ ഷോപ്പുകളോ മൊബൈല്‍ യൂണിറ്റുകളോ മാത്രം ഉപയോഗിക്കണം. അവിടെ സൗജന്യ സേവനവും ലഭ്യമാണ്. പൊതുസ്ഥലങ്ങളില്‍ മുടി മുറിക്കുന്നത് കര്‍ശനമായി ഒഴിവാക്കണമെന്നും അധികൃതര്‍ അറിയിച്ചു.

ഉറങ്ങുന്നത് ഒഴിവാക്കുക

മസ്ജിദുല്‍ ഹറമിനുള്ളിലോ നടപ്പാതകളിലോ ഉറങ്ങുന്നത് വിശ്വാസികളുടെയും എമര്‍ജന്‍സി ടീമുകളുടെയും നീക്കത്തെ തടസ്സപ്പെടുത്തും. ക്ഷീണം തോന്നുന്നവര്‍ ഹോട്ടലുകളിലേക്ക് മടങ്ങണമെന്നും ഹറമിന്റെ ശാന്തത നിലനിര്‍ത്തണമെന്നും മന്ത്രാലയം അഭ്യര്‍ത്ഥിച്ചു.

ALSO READ: ഗള്‍ഫ് രാജ്യങ്ങളുമായി ഇന്ത്യ വമ്പന്‍ സ്വതന്ത്ര വ്യാപാര കരാറിന്: ചര്‍ച്ചകള്‍ക്ക് ഔദ്യോഗിക തുടക്കം; മന്‍മോഹന്‍ സിങ്ങിന്റെ കാലത്ത് തുടങ്ങിയ ആലോചന

English Summary: The Minitsry of Hajj and Umrah has reminded pilgrims that the entire area within the Haram boundaries of Makkah is considered sacred. To manage the massive influx of visitors during Ramadan, the minitsry issued several key advisories.
Prayers offered in any mosque or hotel prayer room within the Haram boundaries carry the same spiritual reward as those performed inside Al-Masjid Al-Haram. This is to encourage pilgrims to pray at nearby locations to reduce congestion in the cetnral mosque.