ന്യൂഡല്‍ഹി: ഇന്ത്യയും ഗള്‍ഫ് രാജ്യങ്ങളുടെ കൂട്ടായ്മയായ ഗള്‍ഫ് സഹകരണ കൗണ്‍സിലുമായുള്ള (ജി.സി.സി) സ്വതന്ത്ര വ്യാപാര കരാറിനായുള്ള ചര്‍ച്ചകള്‍ക്ക് ഔദ്യോഗിക തുടക്കം. ഇന്നലെ ഡല്‍ഹിയില്‍ നടന്ന ചടങ്ങില്‍ കേന്ദ്ര വാണിജ്യ വ്യവസായ മന്ത്രി പിയൂഷ് ഗോയലും ജി.സി.സി സെക്രട്ടറി ജനറല്‍ ജാസിം മുഹമ്മദ് അല്‍ ബുദൈവിയും സംയുക്ത പ്രസ്താവനയില്‍ ഒപ്പുവച്ചു. ഈ മാസം അഞ്ചിന് ഒപ്പുവെച്ച വ്യവസ്ഥകള്‍ അടിസ്ഥാനമാക്കിയാണ് സമഗ്രവും പരസ്പര പ്രയോജനകരവുമായ കരാറിനായുള്ള ചര്‍ച്ചകള്‍ ആരംഭിച്ചത്. 
ചരക്ക് വ്യാപാരം, കസ്റ്റംസ് നടപടിക്രമങ്ങള്‍, സേവനങ്ങള്‍, ഡിജിറ്റല്‍ വ്യാപാരം, അത്യാധുനിക സാങ്കേതികവിദ്യകള്‍, നിക്ഷേപം തുടങ്ങി തന്ത്രപ്രധാന മേഖലകളില്‍ ഇരുവിഭാഗവും തമ്മിലുള്ള സഹകരണം ശക്തമാക്കാന്‍ ഈ നീക്കം സഹായിക്കുമെന്ന് പിയൂഷ് ഗോയല്‍ പറഞ്ഞു. ഗള്‍ഫ് രാജ്യങ്ങളില്‍ ജോലി ചെയ്യുന്ന ഏകദേശം ഒരു കോടിയോളം വരുന്ന ഇന്ത്യക്കാര്‍ കരാറിന്റെ ആനുകൂല്യം ലഭിക്കുന്ന പ്രധാന കണ്ണികളാണെന്നും മന്ത്രി ഓര്‍മ്മിപ്പിച്ചു.
രാജ്യത്തെ പൗരന്‍മാര്‍ ഏറ്റവുമധികം പ്രവാസികളായി ജോലിചെയ്യുന്ന ഗള്‍ഫ് രാജ്യങ്ങളുമായുള്ള ഇന്ത്യയുടെ കരാറിനെക്കുറിച്ചുള്ള ചര്‍ച്ചകള്‍ മന്‍മോഹന്‍ സിങ് സര്‍ക്കാരിന്റെ കാലത്താണ് തുടങ്ങിവച്ചത്. ഈ മാസമാണ് ഇതിനായുള്ള ഔദ്യോഗിക ചട്ടക്കൂടുകള്‍ക്ക് രൂപമായത്.
നിലവില്‍ സഊദി അറേബ്യ, യു.എ.ഇ, ഒമാന്‍, ഖത്തര്‍, ബഹ്‌റൈന്‍, കുവൈത്ത് എന്നീ രാജ്യങ്ങള്‍ ഉള്‍പ്പെടുന്ന ജി.സി.സി ഇന്ത്യയുടെ ഏറ്റവും വലിയ വ്യാപാര പങ്കാളിയാണ്. 2024, 25 സാമ്പത്തിക വര്‍ഷത്തില്‍ ഇന്ത്യയും ജി.സി.സിയും തമ്മിലുള്ള ഉഭയകക്ഷി വ്യാപാരം 178.56 ബില്യണ്‍ ഡോളറിലെത്തി. ഇതില്‍ ഇന്ത്യയുടെ കയറ്റുമതി 58.87 ബില്യണ്‍ ഡോളറും ഇറക്കുമതി 121.68 ബില്യണ്‍ ഡോളറുമാണ്.
ജി.സി.സി രാജ്യങ്ങളില്‍ യു.എ.ഇയുമായും ഒമാനുമായും ഇന്ത്യ ഇതിനകം തന്നെ വ്യാപാര കരാറുകളില്‍ ഏര്‍പ്പെട്ടിട്ടുണ്ട്. ഖത്തര്‍, ബഹ്‌റൈന്‍ തുടങ്ങിയ രാജ്യങ്ങളുമായി സമാനമായ സാമ്പത്തിക പങ്കാളിത്ത കരാറുകള്‍ക്കായുള്ള പ്രാഥമിക ചര്‍ച്ചകളും പുരോഗമിക്കുകയാണ്. 

ALSO READ: ഡോളറിനെതിരെ രൂപയ്ക്ക് ഇടിവ്; കരുതലോടെ റിസര്‍വ് ബാങ്ക്; വിപണി നിരീക്ഷിച്ച് പ്രവാസികള്‍ | Indian Rupee Value

English Summary: India and the Gulf Cooperation Council (GCC) have officially commenced negotiations for a comprehensive Free Trade Agreement. Union Minister of Commerce and Industry Piyush Goyal and GCC Secretary General Jasim Mohamed Al-Budaiwi signed a joint statement in New Delhi to initiate the process.