മനാമ: ഗൾഫ് മേഖലയിൽ ഇറാൻ ആക്രമണം ശക്തമാക്കുന്നു. ബഹ്‌റൈൻ തലസ്ഥാനമായ മനാമയിൽ ഹോട്ടലുകൾക്കും റെസിഡൻഷ്യൽ കെട്ടിടങ്ങൾക്കും നേരെയുണ്ടായ ഇറാനിയൻ മിസൈൽ ആക്രമണത്തിൽ നിന്ന് തങ്ങളുടെ നാവികസേനാ ഉദ്യോഗസ്ഥർ രക്ഷപ്പെട്ടത് തലനാരിഴയ്ക്കെന്ന് ഖത്തർ. ഇന്നാണ് മനാമയെ നടുക്കിയ ആക്രമണങ്ങൾ റിപ്പോർട്ട് ചെയ്തത്.

ജി.സി.സി (GCC) ഏകീകൃത മാരിടൈം ഓപ്പറേഷൻസ് സെന്ററിന്റെ ഭാഗമായി ബഹ്‌റൈനിൽ സേവനമനുഷ്ഠിക്കുന്ന ഖത്തർ നാവികസേനാ അംഗങ്ങൾ താമസിച്ചിരുന്ന കെട്ടിടങ്ങളെ ലക്ഷ്യമിട്ടായിരുന്നു ഇറാന്റെ ആക്രമണം. എന്നാൽ ഉദ്യോഗസ്ഥർക്ക് പരുക്കേൽക്കാതെ രക്ഷപ്പെടാനായെന്ന് ഖത്തർ വിദേശകാര്യ മന്ത്രാലയം സ്ഥിരീകരിച്ചു. സംഭവത്തെ ഖത്തർ ശക്തമായി അപലപിച്ചു.

മനാമയിലെ ഒരു ഹോട്ടലും രണ്ട് റെസിഡൻഷ്യൽ കെട്ടിടങ്ങളുമാണ് ഇറാൻ ലക്ഷ്യമിട്ടതെന്ന് ബഹ്‌റൈൻ ആഭ്യന്തര മന്ത്രാലയം വ്യക്തമാക്കി. ആക്രമണത്തെത്തുടർന്ന് ഒരു കെട്ടിടത്തിൽ തീപിടുത്തമുണ്ടായെങ്കിലും ആളപായമൊന്നും റിപ്പോർട്ട് ചെയ്തിട്ടില്ല.

ALSO READ: ഗള്‍ഫില്‍ തുടര്‍ച്ചയായ ആക്രമണങ്ങള്‍: മനാമയിലെ ഇസ്‌റാഈല്‍, റിയാദിലെ യു.എസ് എംബസികള്‍ക്ക് നേരെ ആക്രമണം; സഊദി എയര്‍ ബേസിലേക്ക് 3 ബാലിസ്റ്റിക് മിസൈലുകള്‍ | Iran - US -Israel War Live Updates

മേഖലയിൽ വ്യാപക ആക്രമണം

ബഹ്‌റൈനിലെ സർക്കാർ ഉടമസ്ഥതയിലുള്ള പ്രധാന എണ്ണ ശുദ്ധീകരണശാലയ്ക്ക് (Bapco) നേരെ കഴിഞ്ഞ ദിവസം ഇറാൻ നടത്തിയ ആക്രമണത്തിന് പിന്നാലെയാണിത്. ശനിയാഴ്ച ആരംഭിച്ച ഇറാന്റെ ആക്രമണപരമ്പരയിൽ ഗൾഫ് മേഖലയിൽ ഇതുവരെ 7 സാധാരണക്കാർ ഉൾപ്പെടെ 13 പേർ കൊല്ലപ്പെട്ടതായാണ് റിപ്പോർട്ടുകൾ.

അതേസമയം, കുവൈത്തിലുണ്ടായ ആക്രമണത്തിൽ നാലുപേർ ഉൾപ്പെടെ ആറ് യുഎസ് സൈനികർ കൊല്ലപ്പെട്ടതായി അമേരിക്ക അറിയിച്ചു. ഗൾഫ് രാജ്യങ്ങളെയും അന്താരാഷ്ട്ര സേനകളെയും ഒരുപോലെ ലക്ഷ്യമിട്ട് ഇറാൻ നടത്തുന്ന പ്രകോപനം മേഖലയെ വലിയൊരു യുദ്ധഭീതിയിലേക്ക് തള്ളിവിട്ടിരിക്കുകയാണ്.

an iran missile attack in Bahrain triggered tension as Qatar soldiers stationed in Manama reportedly escaped unharmed. authorities heightened security while monitoring the situation amid escalating regional conflict.