ബേണ്‍: പശ്ചിമേഷ്യയില്‍ സംഘര്‍ഷം രൂക്ഷമാവുന്നതിനിടെ യു.എസ് യുദ്ധ വിമാനങ്ങള്‍ക്ക് തങ്ങളുടെ വ്യോമപാത വിലക്കി സ്വിറ്റ്സര്‍ലന്‍ഡ്. ഞായറാഴ്ച രണ്ട് യുഎസ് സൈനിക വിമാനങ്ങള്‍ക്കാണ് സ്വിറ്റ്സര്‍ലന്‍ഡ് അനുമതി നിഷേധിച്ചത്. തങ്ങള്‍ ഉയര്‍ത്തിപ്പിടിക്കുന്ന നിഷ്പക്ഷ നിലപാട് മുന്‍നിര്‍ത്തിയാണ് തീരുമാനമെന്ന് സ്വിസ് ഭരണകൂടം വ്യക്തമാക്കി.

സ്വിറ്റ്‌സര്‍ലന്‍ഡ് കടക്കണമെന്ന യു.എസ് രഹസ്യാന്വേഷണ വിമാനങ്ങളുടെ അഭ്യര്‍ത്ഥനകള്‍ നിരസിച്ചതായി സ്വിറ്റ്‌സര്‍ലന്‍ഡ് സര്‍ക്കാര്‍ അറിയിക്കുകയായിരുന്നു. അതേസമയം, രണ്ട് ഗതാഗത വിമാനങ്ങള്‍ ഉള്‍പ്പെടെ മറ്റ് മൂന്ന് വിമാനങ്ങള്‍ക്ക് ഫെഡറല്‍ അതോറിറ്റി അനുമതി നല്‍കിയതായും റിപ്പോര്‍ട്ടുകള്‍ പറയുന്നു. 

ALSO READ: ഹോര്‍മുസിലേക്ക് യുദ്ധക്കപ്പലുകള്‍ അയക്കാന്‍ ലോകരാജ്യങ്ങളോട് ആവശ്യപ്പെട്ട് ട്രംപ്; സുരക്ഷ' ഉറപ്പാക്കാനെന്ന് വിശദീകരണം

അതിനിടെ, ഹോര്‍മുസിലേക്ക് 10 പടക്കപ്പലുകള്‍ അയക്കുമെന്ന വാര്‍ത്ത നിഷേധിച്ച് ഫ്രാന്‍സ് രംഗത്തെത്തി. ഫ്രാന്‍സും ചൈനയും ഉള്‍പ്പെടെ രാജ്യങ്ങള്‍ ഹോര്‍മുസ് സംരക്ഷിക്കാന്‍ വരുമെന്ന് പ്രതീക്ഷിക്കുന്നതായി നേരത്തെ ട്രംപ് പറഞ്ഞിരുന്നു. തങ്ങളുടെ പടക്കപ്പലുകള്‍ കിഴക്കന്‍ മെഡിറ്ററേനിയന്‍ കടലില്‍ തുടരുകയാണെന്നും ഹോര്‍മുസിലേക്ക് അയച്ചിട്ടില്ലെന്നും ഫ്രഞ്ച് വിദേശകാര്യ മന്ത്രാലയം വിശദമാക്കി. പ്രതിരോധം, സുരക്ഷ എന്നിവയാണ് ഫ്രഞ്ച് നിലപാടെന്ന് ചൂണ്ടിക്കാട്ടിയ വിദേശകാര്യ മന്ത്രാലയം ഭീതി പരത്തല്‍ നിര്‍ത്തണമെന്നും മന്ത്രാലയം ആവശ്യപ്പെട്ടു.

പശ്ചിമേഷ്യയില്‍ യുദ്ധം രൂക്ഷമായി തുടരവേ എരിതീയില്‍ എണ്ണയൊഴിക്കുന്ന നീക്കവുമായി യു.എസ് പ്രസിഡന്റ് ഡൊണാള്‍ഡ് ട്രംപ് രംഗത്തെത്തിയിരുന്നു. തന്ത്രപ്രധാനമായ ഹോര്‍മുസ് കടലിടുക്ക് അന്താരാഷ്ട്ര കപ്പല്‍ ഗതാഗതത്തിനായി തുറന്നിരിക്കുന്നുണ്ടെന്ന് ഉറപ്പാക്കാന്‍ യുദ്ധക്കപ്പലുകള്‍ വിന്യസിക്കണമെന്ന് ലോകരാജ്യങ്ങളോട് ആവശ്യപ്പെട്ടിരിക്കുകയാണ് ട്രംപ്. ലോകരാജ്യങ്ങളെ സംഘര്‍ഷത്തിലേക്ക് വലിച്ചിഴക്കുന്നതാണ് ട്രംപിന്റെ നീക്കം. 

തടസ്സം ബാധിച്ച നിരവധി രാജ്യങ്ങള്‍ക്ക് ഈ പാത സുരക്ഷിതമാക്കുന്നതില്‍ അമേരിക്കയ്‌ക്കൊപ്പം ചേരാനാകുമെന്നാണ്  ട്രംപ് തന്റെ സോഷ്യല്‍ മീഡിയ പോസ്റ്റില്‍ പറയുന്നത്. 

ALSO READ: ഹോർമുസ് കടലിടുക്ക് തുറന്നു; പക്ഷേ അമേരിക്കയ്ക്കും ഇസ്റാഈലിനും വിലക്ക്: ഇറാൻ നിലപാട് വ്യക്തമാക്കി

'ചൈന, ഫ്രാന്‍സ്, ജപ്പാന്‍, ദക്ഷിണ കൊറിയ, യുണൈറ്റഡ് കിംഗ്ഡം എന്നിവയുള്‍പ്പെടെ നിരവധി രാജ്യങ്ങള്‍ക്ക് കടലിടുക്ക് 'തുറന്നതും സുരക്ഷിതവുമായി' നിലനിര്‍ത്താന്‍ അമേരിക്കയുമായി ഏകോപിപ്പിച്ച് മേഖലയിലേക്ക് നാവിക കപ്പലുകള്‍ അയയ്ക്കാം' ട്രംപ് സോഷ്യല്‍ മീഡിയയില്‍ പോസ്റ്റ് ചെയ്ത സന്ദേശത്തില്‍ പറയുന്നു.

ഇറാനെ എല്ലാ വിധത്തിലും തകര്‍ത്തുകഴിഞ്ഞുവെന്നും ട്രംപ് അവകാശപ്പെടുന്നു.

'ഇറാനെ യു.എസ് സൈനികമായും സാമ്പത്തികമായും എല്ലാ തരത്തിലും പരാജയപ്പെടുത്തുകയും പൂര്‍ണമായും നശിപ്പിക്കുകയും ചെയ്തിട്ടുണ്ട്. എന്നാല്‍, ഹോര്‍മുസ് കടലിടുക്ക് വഴി എണ്ണ എത്തിക്കുന്ന രാജ്യങ്ങള്‍ ഈ പാതയില്‍ സുരക്ഷിതത്വം ഉറപ്പാക്കണം. ഇവിടെ ഞങ്ങളുടെ എല്ലാ സഹായവും തീര്‍ച്ചയായും ഉണ്ടാവും. എല്ലാം സുഗമമായി നടക്കുന്നുണ്ടെന്ന് ഉറപ്പാക്കാന്‍ യു.എസ് മറ്റ് രാജ്യങ്ങളെ ഏകോപിപ്പിക്കും. ഇതൊരു കൂട്ടായ പ്രവര്‍ത്തനമായിരിക്കണം. അത് ലോകത്തിന് സുരക്ഷയും സമാധാനവും ഉറപ്പാക്കും' -ട്രംപ് സോഷ്യല്‍ മീഡിയ പോസ്റ്റില്‍ പറയുന്നത്.

switzerland refuses airspace access to us military aircraft citing neutrality as west asia conflict escalates. meanwhile france denies reports of sending warships to the strait of hormuz after donald trump urged global nations to deploy naval forces.