ന്യൂഡല്‍ഹി: തെരഞ്ഞെടുപ്പ് കമ്മീഷന്‍ സര്‍ക്കുലറില്‍ ബിജെപി സീല്‍ പതിച്ച സംഭവത്തില്‍ വിമര്‍ശന പോസ്റ്റുകള്‍ വ്യാപകമായി നീക്കം ചെയ്യപ്പെടുന്നു. ബിജെപിയും തെരഞ്ഞെടുപ്പ് കമ്മീഷനും ഒരേ ഓഫീസിലാണ് പ്രവര്‍ത്തിക്കുന്നതെന്ന് ആരോപിച്ച് കോണ്‍ഗ്രസ് പ്രചരിപ്പിച്ച എഐ വീഡിയോ സമൂഹമാധ്യമങ്ങളില്‍ നിന്ന് നീക്കി. കേരള പൊലിസിന്റെ നടപടിയിലാണ് വീഡിയോകളും, പ്രതിഷേധ പോസ്റ്റുകളും വ്യാപകമായി നീക്കുന്നത്. 

ദേശീയ തലത്തില്‍ കോണ്‍ഗ്രസും ഇന്ത്യ മുന്നണിയും തെരഞ്ഞെടുപ്പ് കമ്മീഷനെതിരെ പ്രതിഷേധം കടുപ്പിക്കുന്നതിനിടെയാണ് പൊലിസ് നടപടി. കമ്മീഷന്‍ പരസ്യമായി തെറ്റ് സമ്മതിച്ച സംഭവം സമൂഹമാധ്യമങ്ങളില്‍ പങ്കുവെച്ചവര്‍ക്കെതിരെ നടപടി എന്തിനെന്ന് പൊലിസ് ഇതുവരെ വ്യക്തമാക്കിയിട്ടില്ല. പോസ്റ്റുകള്‍ക്ക് പുറമെ വിവിധ രാഷ്ട്രീയ പാര്‍ട്ടികള്‍ പുറത്തിറക്കിയ വീഡിയോകളും നീക്കം ചെയ്യുകയാണ്. പരിശോധനയുടെ അടിസ്ഥാനത്തിലാണ് നടപടിയെന്നാണ് ഡിജിപി റവാഡ ചന്ദ്രശേഖറിന്റെ വാദം. എല്ലാവരും സഹകരിക്കണമെന്നും, തെരഞ്ഞെടുപ്പ് കമ്മീഷന്‍ പരാതി നല്‍കിയതായും അദ്ദേഹം പറഞ്ഞു. 

ALSO READ: ലോകം വൻ വ്യവസായ പ്രതിസന്ധിയിലേക്ക്; 70-കളേക്കാൾ വലിയ തകർച്ചയുണ്ടാകുമെന്ന് ഐസിസി മുന്നറിയിപ്പ് 

ഇതുവരെ അഞ്ഞൂറിലധികം സമൂഹമാധ്യമ ഹാന്‍ഡിലുകളില്‍ നിന്നുള്ള പോസ്റ്റുകള്‍ നീക്കാനാണ് പ്ലാറ്റ്‌ഫോമുകളോട് കേരള പൊലിസ് ആവശ്യപ്പെട്ടിട്ടുള്ളത്. 

അതേസമയം പൊലിസ് നടപടിയില്‍ പ്രതിഷേധവുമായി വിവിധ രാഷ്ട്രീയ പാര്‍ട്ടികള്‍ രംഗത്തെത്തി. സംഭവിച്ചത് പിഴവല്ലെന്നും ഗൂഢാലോചനയാണെന്നും പശ്ചിമബംഗാള്‍ മുഖ്യമന്ത്രി മമത ബാനര്‍ജി പറഞ്ഞു. എല്‍ഡിഎഫും, ബിജെപിയും ചേര്‍ന്ന ഗൂഢ സംഘമാണ് എല്ലാത്തിനും പിന്നിലെന്ന് കോണ്‍ഗ്രസ് നേതാക്കളും പറഞ്ഞു. വിഷയത്തില്‍ പ്രതിഷേധം കടുപ്പിക്കാനാണ് കോണ്‍ഗ്രസ് തീരുമാനം. കൂടുതല്‍ വീഡിയോകള്‍ പുറത്തിറക്കുമെന്നും കോണ്‍ഗ്രസ് അറിയിച്ചു.