കാസര്‍കോട്: ത്യാഗത്തിന്റെയും സമര്‍പ്പണത്തിന്റെയും സ്മരണകളുണര്‍ത്തി നാടെങ്ങും ബലിപെരുന്നാള്‍ ആഘോഷിച്ചു. പള്ളികളിലും ഈദ്ഗാഹുകളിലും നടന്ന പെരുന്നാള്‍ നിസ്‌കാരത്തില്‍ ആയിരക്കണക്കിനാളുകള്‍ പങ്കെടുത്തു. സ്രഷ്ടാവിന്റെ മഹത്വം വാഴ്ത്തി എങ്ങും തഖ്ബീര്‍ ധ്വനികള്‍ ഉയര്‍ന്നു. രാവിലെ 10 മണിവരെ പെരുന്നാള്‍ നിസ്‌കാരം നടന്നു. മഹല്ലുകള്‍ ഒറ്റയ്ക്കും കൂട്ടായും ബലിയര്‍പ്പണം നടത്തി.
തിങ്കളാഴ്ച രാവിലെ മുതല്‍ വിവിധ മസ്ജിദുകളില്‍ ഈദ് നിസ്‌കാരങ്ങളും ഖുത്ബയും നടന്നു. ജില്ലയിലെ നൂറുകണക്കിന് മസ്ജിദുകളില്‍ നടന്ന ഈദ് നിസ്‌കാരത്തിലും ഖുത്ബയിലും പതിനായിരങ്ങള്‍ സംബന്ധിച്ചു. പെരുന്നാള്‍ നിസ്‌കാരങ്ങള്‍ക്ക് പ്രമുഖ പണ്ഡിതര്‍ നേതൃത്വം നല്‍കി.
തളങ്കര മാലിക് ദിനാറില്‍ ഖത്വീബ് മജിദ് ബാഖവി നിസ്‌കാരത്തിന് നേതൃത്വം നല്‍കി. തായലങ്ങാടി ഖിളിര്‍ ജുമാ മസ്ജിദ്, നെല്ലിക്കുന്ന് മുഹുയിദ്ദീന്‍ ജുമാ മസ്ജിദ്, കണ്ണാടിപ്പള്ളി, കാഞ്ഞങ്ങാട് ടൗണ്‍ ജുമാ മസ്ജിദ്, നിലേശ്വരം ജുമാമസ്ജിദ്, നായന്മാര്‍മൂല ജുമാ മസ്ജിദ്, ചെര്‍ക്കള ജുമാമസ്ജിദ്, ചെറുവത്തൂര്‍ ടൗണ്‍ ജുമാമസ്ജിദ്, ബദിയടുക്ക ജുമാമസ്ജിദ്, തൃക്കരിപ്പൂര്‍ ജുമാമസ്ദിദ് എന്നിവിടങ്ങളിലും മലയോരതീരദേശ മേഖലയിലും മഞ്ചേശ്വരം ഭാഗങ്ങളിലും പ്രത്യേക ബലി പെരുന്നാള്‍ നിസ്‌കാരം നടന്നു. പ്രവാചകന്‍ ഇബ്രാഹിം നബി ദൈവത്തിന്റെ ആജ്ഞ പ്രകാരം മകന്‍ ഇസ്മയിലിനെ ബലി കൊടുക്കാന്‍ തയാറായതിന്റെ ഓര്‍മ്മ പുതുക്കലാണ് വിശ്വാസികള്‍ക്ക് ബലി പെരുന്നാള്‍. പ്രവാചകന്‍ ഇബ്രാഹിമിന്റെ ത്യാഗസ്മരണയില്‍ മഹല്ലുകളില്‍ ഒറ്റയ്ക്കും ഏഴുപേര്‍ ചേര്‍ന്നും ബലിയര്‍പ്പണം നടത്തി. മാംസം പാവങ്ങള്‍ക്കും ബന്ധുക്കള്‍ക്കും വിതരണം ചെയ്തു.ബലിപെരുന്നാള്‍ ആഘോഷം സമാധാനപരവും അച്ചടക്കത്തോടെയുമായിരിക്കണമെന്ന് ജമാഅത്ത് കമ്മിറ്റികള്‍ വിശ്വാസികളോട് ഉത്‌ബോധിപ്പിച്ചിരുന്നു. ഈ നിര്‍ദേശം പൂര്‍ണമായും ഉള്‍ക്കൊണ്ട് ആഘോഷം സമാധാനപൂര്‍ണമാക്കി വിശ്വാസികള്‍ മാതൃക കാണിച്ചു.
കാഞ്ഞങ്ങാട്: മകനെ ബലിയറുക്കാന്‍ സന്നദ്ധത കാട്ടിയ പ്രവാചകന്‍ ഇബ്രാഹിമിന്റെ  ത്യാഗസ്മരണയില്‍ നാടെങ്ങും ബലി പെരുന്നാള്‍ ആഘോഷിച്ചു.  തക്ക്ബീറിന്റെ മന്ത്രധ്വനികള്‍ മുഴക്കി പെരുന്നാള്‍ ദിനത്തില്‍ പള്ളികളിലേക്കും, ഈദ്ഗാഹുകളിലേക്കും  നീങ്ങിയ വിശ്വാസികള്‍ പരസ്പരം ആശ്ലേഷിച്ചും ആശംസകള്‍ അര്‍പ്പിച്ചുമാണ് പിരിഞ്ഞത്.
രാജ്യാതിര്‍ത്തികള്‍ക്കുമപ്പുറം വര്‍ഗീയതക്കും വിഭാഗീയതക്കും വംശീയതക്കെതിരായ സന്ദേശമാണ് വിശുദ്ധ ഹജ്ജിന്റെ ഒത്തുചേരല്‍. നിസാര പ്രശ്‌നങ്ങള്‍ക്ക് തര്‍ക്കിക്കാതെ സാമൂഹ്യ പ്രതിബദ്ധതയുള്ള സമൂഹത്തിന്റെ പുനസൃഷ്ടിക്കായി പ്രവര്‍ത്തിക്കാന്‍ വിശ്വാസികള്‍ പ്രതിജ്ഞാബദ്ധരാകണമെന്ന് ഖത്വീബുമാര്‍ പറഞ്ഞു. കോട്ടച്ചേരി  നൂര്‍ മസ്ജിദില്‍ അബ്ദുല്‍ ഗഫൂര്‍ മൗലവി കീച്ചേരി, ബദ് രിയ മസ്ജിദില്‍ റഷീദ് സഅദി, മുബാറക് മസ്ജിദില്‍ മഹമൂദ് ജീലാനി ബാഖവിയും,അതിഞ്ഞാല്‍ ജുമാമസ്ജിദില്‍ ഷറഫുദ്ധീന്‍ ബാഖവി, പുതിയകോട്ട ജുമാമസ്ജിദില്‍ ഒ.പി.അബ്ദുല്ല സഖാഫി, നോര്‍ത്ത് ചിത്താരി ജുമാ മസ്ജിദില്‍ അഷ്‌റഫ് മിസ്ബാഹി,കുണിയ  ജുമാ മസ്ജിദില്‍ അബ്ദുല്‍ഖാദര്‍ ബാഖവി നദ് വി പെരുന്നാള്‍ സന്ദേശത്തിനും,നിസ്‌കാരത്തിനും നേതൃത്വം നല്‍കി.