കോഴിക്കോട്: പെരുമണ്ണ ഗ്രാമപ്പഞ്ചായത്തില്‍ വള്ളിക്കുന്ന് അഞ്ചുമാവ് ഇളമനപ്പാടം എടച്ചേരിത്താഴത്ത് അനധികൃതമായി സൂക്ഷിച്ച 64 ഗ്യാസ് സിലിണ്ടറുകള്‍ പിടികൂടി. ജില്ലാ സപ്ലൈ ഓഫീസര്‍ ആര്‍. ബോബന്റെ നേതൃത്വത്തിലുള്ള സംഘമാണ് സിലിണ്ടറുകള്‍ പിടികൂടിയത്. രഹസ്യവിവരത്തെ തുടര്‍ന്ന് നടത്തിയ പരിശോധനയിലാണ് സ്വകാര്യ വ്യക്തിയുടെ ആളൊഴിഞ്ഞ പറമ്പില്‍ കൂട്ടിയിട്ട നിലയില്‍ സിലിണ്ടറുകള്‍ കണ്ടെത്തിയത്. 

60 കാലി സിലിണ്ടറുകളും, ഗ്യാസ് നിറച്ച നാല് സിലിണ്ടറുകളുമാണ് ഉണ്ടായിരുന്നത്്. പിടിച്ചെടുത്ത സിലിണ്ടറുകള്‍ സുരക്ഷിത കേന്ദ്രത്തിലേക്ക് മാറ്റി. ഒരു സുരക്ഷ മാനദണ്ഡങ്ങളും പാലിക്കാതെ ജനവാസ കേന്ദ്രത്തില്‍ ഗ്യാസ് സിലിണ്ടറുകള്‍ സൂക്ഷിച്ചവരെ കണ്ടെത്തി കര്‍ശന നിയമ നടപടികള്‍ സ്വീകരിക്കുമെന്ന് കോഴിക്കോട് ജില്ലാ സപ്ലൈ ഓഫിസര്‍ പറഞ്ഞു.

കോഴിക്കോട് താലൂക്ക് സപ്ലൈ ഓഫീസര്‍ അബ്ദുള്‍ ഗഫൂര്‍, കൊയിലാണ്ടി റേഷനിങ് ഇന്‍സ്പെക്ടര്‍ ശ്രീനിവാസന്‍, കോഴിക്കോട് താലൂക്ക് റേഷനിങ് ഇന്‍സ്പെക്ടര്‍മാരായ ബൈജു, ബവിത, ഷൈബ തുടങ്ങിയവരാണ് പരിശോധന സംഘത്തിലുണ്ടായിരുന്നത്.