കേപ് കനാവറല്‍: മനുഷ്യനെ ചന്ദ്രന്റെ ഭ്രമണപഥത്തിലേക്ക് എത്തിക്കാനുള്ള നാസയുടെ അഭിമാന പദ്ധതിയായ ആര്‍ട്ടിമെസ് 2 വിക്ഷേപണത്തിന്. നാളെ പുലര്‍ച്ചെ ഇന്ത്യന്‍ സമയം 3.54നാണ് വിക്ഷേപണം നിശ്ചയിച്ചിട്ടുള്ളത്. ഫ്‌ളോറിഡയിലെ കേപ് കനാവറിലെ വിക്ഷേപണത്തറയില്‍ നിന്നാണ് പേടകം കുതിച്ചുയരുക. 

50 വര്‍ഷങ്ങള്‍ക്ക് ശേഷമാണ് നാസ മനുഷ്യരെയും വഹിച്ചുള്ള ചാന്ദ്ര ദൗത്യത്തിന് ഒരുങ്ങുന്നത്. മുന്‍പ് 1972ലെ അപ്പോളോ ദൗത്യത്തിലാണ് മനുഷ്യന്‍ അവസാനമായി ചന്ദ്രന്റെ ഭ്രമണപഥത്തില്‍ എത്തിയത്. അതുകൊണ്ട് തന്നെ ലോകം ആകാംശയോടെ കാത്തിരിക്കുന്ന വിക്ഷേപണത്തിനാണ് നാളെ ഫ്‌ളോറിഡ സാക്ഷ്യം വഹിക്കുക. 
ALSO READ: റിയാദ് യൂണിവേഴ്സിറ്റി ഓഫ് ആർട്‌സിലേക്ക് മേയ് മാസം മുതൽ അപേക്ഷിക്കാം; ക്ലാസുകൾ സെപ്റ്റംബറിൽ ആരംഭിക്കും

നാല് ബഹിരാകാശ സഞ്ചാരികളാണ് ആര്‍ട്ടിമെസ് 2 പദ്ധതിയിലുള്ളത്. ചന്ദ്രനെ ചുറ്റിവരുന്ന പത്ത് ദിവസത്തെ ദൗത്യമാണ് ആര്‍ട്ടിമെസ് 2. വിക്ഷേപണത്തിനായി രണ്ട് മണിക്കൂര്‍ നീളുന്ന സമയപരിധിയാണ് നാസ അനുവദിച്ചിരിക്കുന്നത്. വിക്ഷേപണ സമയത്ത് 80 ശതമാനവും കാലാവസ്ഥ അനുകൂലമായിരിക്കുമെന്ന് നാസയുടെ കാലാവസ്ഥ വിഭാഗമായ 45ാം വെതര്‍ സ്‌ക്വാഡ്രണ്‍ അറിയിച്ചു. 

അതേസമയം ഫ്‌ളോറിഡ തീരത്തെ അന്തരീക്ഷത്തിലെ മാറ്റങ്ങള്‍ നാസ സൂക്ഷ്മമായി നിരീക്ഷിച്ച് വരികയാണ്. ഏപ്രില്‍ മാസത്തെ പ്രത്യേക മഴയും ക്യുമുലസ് മേഘങ്ങളും വിക്ഷേപണത്തിന് വെല്ലുവിളിയായേക്കും. സ്ഥിതിഗതികള്‍ നിരീക്ഷിച്ച് വരികയാണെന്ന് നാസ അറിയിച്ചു. 

വിക്ഷേപണ കേന്ദ്രത്തിലെ കാലാവസ്ഥയ്ക്ക് പുറമെ അറ്റ്‌ലാന്റിക് സമുദ്രത്തിലെ പേടകം തിരിച്ചിറങ്ങുന്ന ഭാഗത്തെ സാഹചര്യങ്ങളും സൗരവികിരണങ്ങളും സംഘം വിലയിരുത്തുന്നുണ്ട്. ഇന്ന് വിക്ഷേപണം നടന്നില്ലെങ്കില്‍ ഏപ്രില്‍ രണ്ടുമുതല്‍ ആറ് വരെയുള്ള തീയതികള്‍ നാസ കരുതിവെച്ചിട്ടുണ്ട്.