ദുബൈ: പശ്ചിമേഷ്യയിലെ സംഘര്‍ഷങ്ങളെത്തുടര്‍ന്ന് യുഎഇയിലെ സ്‌കൂള്‍ ബോര്‍ഡ് പരീക്ഷകള്‍ വ്യാപകമായി റദ്ദാക്കിയ പശ്ചാത്തലത്തില്‍, വിദ്യാര്‍ത്ഥികള്‍ക്ക് സഹായവുമായി രാജ്യത്തെ സര്‍വ്വകലാശാലകള്‍. ഉന്നതവിദ്യാഭ്യാസ പ്രവേശനം തടസ്സപ്പെടാതിരിക്കാന്‍ അഡ്മിഷന്‍ നടപടികള്‍ ഓണ്‍ലൈനിലേക്ക് മാറ്റുകയും ഇളവുകള്‍ പ്രഖ്യാപിക്കുകയും ചെയ്തിട്ടുണ്ട്.
ഇന്ത്യന്‍ (CBSE/CISCE), ബ്രിട്ടീഷ് (Cambridge/ Pearson Edexcel/OxfordAQA), ഐ.ബി (IB) തുടങ്ങിയ പ്രമുഖ ബോര്‍ഡുകളെല്ലാം പരീക്ഷകള്‍ റദ്ദാക്കുകയോ മൂല്യനിര്‍ണ്ണയ രീതിയില്‍ മാറ്റം വരുത്തുകയോ ചെയ്തിരുന്നു. ഇതോടെ പന്ത്രണ്ടാം ക്ലാസ് വിദ്യാര്‍ത്ഥികളുടെ ഉപരിപഠന സാധ്യതകള്‍ അനിശ്ചിതത്വത്തിലായ സാഹചര്യത്തിലാണ് സര്‍വ്വകലാശാലകളുടെ ഇടപെടല്‍.

പ്രധാന നടപടികള്‍:

പ്രിഡിക്റ്റഡ് സ്‌കോറുകള്‍: മുന്‍പത്തെ പ്രകടനത്തിന്റെ അടിസ്ഥാനത്തിലുള്ള സ്‌കോറുകള്‍ (Predicted Scores) പ്രവേശനത്തിനായി സ്വീകരിക്കും.
സമയപരിധി നീട്ടി: അപേക്ഷാ സമര്‍പ്പണത്തിനുള്ള അവസാന തീയതികളില്‍ ഇളവ് അനുവദിച്ചു.
സ്‌കോളര്‍ഷിപ്പുകള്‍: സാമ്പത്തിക ബുദ്ധിമുട്ട് നേരിടുന്ന കുടുംബങ്ങളെ സഹായിക്കാന്‍ പ്രത്യേക സ്‌കോളര്‍ഷിപ്പ് ഫണ്ടുകള്‍ പ്രഖ്യാപിച്ചു.
ഓണ്‍ലൈന്‍ സേവനങ്ങള്‍: അഡ്മിഷന്‍ സംബന്ധമായ സംശയങ്ങള്‍ പരിഹരിക്കാന്‍ വെര്‍ച്വല്‍ ഓപ്പണ്‍ ഡേകളും വെബിനാറുകളും സംഘടിപ്പിക്കുന്നു.
വിദ്യാര്‍ത്ഥികളുടെ നിയന്ത്രണത്തിന് അപ്പുറമുള്ള സാഹചര്യങ്ങള്‍ അവരുടെ വിദ്യാഭ്യാസത്തെ ബാധിക്കരുതെന്നും നിലവിലെ പ്രതിസന്ധി പരിഗണിച്ച് പ്രവേശനത്തിനായി ബദല്‍ മാര്‍ഗങ്ങള്‍ ഞങ്ങള്‍ ഒരുക്കിയിട്ടുണ്ടെന്നും ദുബൈയിലെ കര്‍ട്ടന്‍ സര്‍വ്വകലാശാല പ്രോ വൈസ് ചാന്‍സലര്‍ പ്രൊഫ. അമ്മാര്‍ കക്ക പറഞ്ഞു. 
കര്‍ട്ടന്‍ സര്‍വ്വകലാശാല ഉള്‍പ്പെടെയുള്ള പ്രമുഖ സ്ഥാപനങ്ങള്‍ പ്രിഡിക്റ്റഡ് ഗ്രേഡുകള്‍ സ്വീകരിച്ചുകൊണ്ട് അഡ്മിഷന്‍ നടപടികള്‍ പൂര്‍ണ്ണതോതില്‍ തുടരുകയാണ്. വിദ്യാര്‍ത്ഥികളുടെ ഭാവി സുരക്ഷിതമാക്കാന്‍ പ്രതിജ്ഞാബദ്ധമാണെന്നും അധികൃതര്‍ വ്യക്തമാക്കി.

 Amid the widespread cancellation of school board examinations in the UAE amid regional tensions, universities in the country have responded swiftly, pivoting admission processes online and rolling out a raft of student-friendly measures to ensure no one loses their place in higher education.