പരപ്പനങ്ങാടി: റോഡരികിലെ തൊണ്ടിവാഹനങ്ങള്‍ നീക്കം ചെയ്യണമെന്ന കോടതി ഉത്തരവൊന്നും പരപ്പനങ്ങാടിക്ക് ബാധകമല്ലെന്ന നിലപാടിലാണ് അധികൃതര്‍. വിവിധ കേസുകളില്‍ പിടികൂടി കോടതിയില്‍ ഹാജരാക്കിയ തൊണ്ടിവാഹങ്ങളാണ് പൊലിസ് സ്റ്റേഷനു മുമ്പിലെ സംസ്ഥാനപാതയോരത്തെ ഇരുവശങ്ങളിലും നിര്‍ത്തിയിട്ടിരിക്കുന്നത്.
വര്‍ഷങ്ങളായി ഇവിടെ പിടിച്ചിട്ട വാഹനങ്ങളുടെ ബാഹുല്യം കാരണം പൊലിസ്ജീപ്പിനു പോലും സ്റ്റേഷന്‍ കോംപൗണ്ടില്‍ കയറാന്‍ കഴിയാത്ത അവസ്ഥയാണ്. ഇതേത്തുടര്‍ന്ന് ക്രെയിന്‍ ഉപയോഗിച്ച് വാഹനങ്ങളെല്ലാം ഒരുഭാഗത്ത് കൂട്ടിയിട്ടിരുന്നു. റോഡില്‍ പിടിചിട്ടവയും ഇതോടൊപ്പം കൂട്ടിയിട്ടു.
അതിനുശേഷം പിടികൂടിയ വാഹനങ്ങള്‍ റെയില്‍വേ മേല്‍പാല പരിസരത്തും കോടതിറോഡിലുമാണ് കൂട്ടിയിട്ടിരുന്നത്. പിടികൂടിയ ചരക്കു വാഹനങ്ങളിലേറെയും മണല്‍ലോറികളാണ്. ലേലംചെയ്തു ഒഴിവാക്കാനുള്ള നടപടിയും എവിടെയും എത്തിയിട്ടില്ല. സ്റ്റേഷന്‍ വളപ്പില്‍ കൂട്ടിയിട്ട വാഹനങ്ങള്‍ക്കിടയില്‍ പാമ്പുകളുടെയും തെരുവ്‌നായകളുടെയും സൈ്വര്യവിഹാര കേന്ദ്രമായി മാറിയിരിക്കുകയാണ്.
സ്വകാര്യവ്യക്തികളുടെ ഒഴിഞ്ഞ പറമ്പുകളില്‍ അവരുടെ സമ്മതത്തോടെ തൊണ്ടി വാഹനങ്ങള്‍ അവിടേക്ക് മാറ്റാനുള്ള ശ്രമം നടത്തിയെങ്കിലും പരാജയപ്പെട്ടു.
ആവശ്യംവരുമ്പോള്‍ സ്വന്തം സ്ഥലത്തുനിന്നു നിന്ന് വാഹനങ്ങള്‍ മാറ്റികിട്ടില്ലെന്ന ആശങ്കയാണ് ഭൂഉടമകളെ ഇതില്‍ നിന്നും പിന്തിരിപ്പിച്ചത്.