ദുബൈ: ഹോർമുസ് കടലിടുക്കിൽ കപ്പലുകൾക്ക് നേരെ നടക്കുന്ന ആക്രമണങ്ങളും ഗതാഗത തടസ്സവും ആഗോള സാമ്പത്തിക വ്യവസ്ഥയെ ഗുരുതരമായ പ്രതിസന്ധിയിലേക്ക് തള്ളിവിടുന്നതായി മുന്നറിയിപ്പ്. നിലവിൽ 22 കപ്പലുകൾ ആക്രമിക്കപ്പെടുകയും ഏകദേശം 800 വാണിജ്യ കപ്പലുകൾ കടലിടുക്കിൽ കുടുങ്ങിക്കിടക്കുകയുമാണെന്ന് യുഎഇ വ്യവസായ, നൂതന സാങ്കേതിക മന്ത്രിയും അഡ്‌നോക് (ADNOC) ഗ്രൂപ്പ് സിഇഒയുമായ ഡോ. സുൽത്താൻ ബിൻ അഹമ്മദ് അൽ ജാബിർ വെളിപ്പെടുത്തി.

ലോകത്തെ ഏറ്റവും പ്രധാനപ്പെട്ട വ്യാപാര പാതകളിലൊന്നായ ഹോർമുസ് കടലിടുക്കിലൂടെയുള്ള ഊർജ്ജ പ്രവാഹത്തിന്റെ 20 ശതമാനവും നിലവിൽ തടസ്സപ്പെട്ടിരിക്കുകയാണ്. കുടുങ്ങിക്കിടക്കുന്ന 800 കപ്പലുകളിൽ 400 എണ്ണവും എണ്ണ ടാങ്കറുകളാണ്. സുരക്ഷാ ഭീഷണിയെത്തുടർന്ന് ഏകദേശം 20,000 നാവികർക്ക് ഈ മേഖലയിലൂടെ സഞ്ചരിക്കാൻ കഴിയാത്ത സാഹചര്യമാണുള്ളത്.

ALSO READ: ദുബൈ ആർടിഎ ആപ്പും വെബ്‌സൈറ്റും പണിമുടക്കി; പാർക്കിംഗ് ഫീസും വാഹന രജിസ്ട്രേഷനും തടസ്സപ്പെട്ടു, പ്രതിസന്ധിയിലായി വാഹന ഉടമകൾ

ഹോർമുസ് കടലിടുക്കിലെ നിയന്ത്രണം കേവലം പ്രാദേശിക പ്രശ്നമല്ലെന്നും അത് ലോകത്തിന്റെ സാമ്പത്തിക ജീവനാഡിയെ ബാധിക്കുന്ന ഭീഷണിയാണെന്നും അൽ ജാബിർ വ്യക്തമാക്കി. വിതരണം തടസ്സപ്പെടുന്നത് ആഗോള വിപണിയിൽ എണ്ണവില ഉയരാൻ കാരണമാകും. ഇത് ഗാർഹിക ചെലവുകളെയും നിർമ്മാണ മേഖലയെയും ബാധിക്കും.

കടലിടുക്ക് വഴിയുള്ള കയറ്റുമതിയുടെ 80 ശതമാനവും ഏഷ്യൻ രാജ്യങ്ങളിലേക്കാണ്. അതിനാൽ ഈ മേഖലയാണ് കൂടുതൽ ഭീഷണി നേരിടുന്നത്.

ഹോർമുസ് കടലിടുക്ക് ഇറാൻ ഒരിക്കലും ഔദ്യോഗികമായി അടച്ചിട്ടില്ലെങ്കിലും, ഗതാഗതം കർശനമായി നിയന്ത്രിക്കപ്പെടുന്നത് വഴി പ്രായോഗികമായി അത് അടഞ്ഞ നിലയിലാണെന്ന് അൽ ജാബിർ ചൂണ്ടിക്കാട്ടി. "നിയന്ത്രിക്കപ്പെട്ട പാത എന്നാൽ തുറന്ന പാതയല്ല" എന്ന് അദ്ദേഹം ലിങ്ക്ഡ്ഇൻ പോസ്റ്റിലൂടെ വ്യക്തമാക്കി. ഈ സാഹചര്യം ലോകത്തിന് താങ്ങാൻ കഴിയില്ലെന്നും കടലിടുക്ക് നിരുപാധികം തുറക്കണമെന്നും അദ്ദേഹം ആവശ്യപ്പെട്ടു.

സുരക്ഷ ഉറപ്പാക്കിക്കൊണ്ട് ഉൽപ്പാദനവും കയറ്റുമതിയും പുനഃസ്ഥാപിക്കാൻ അഡ്‌നോക് ഉൾപ്പെടെയുള്ള ഊർജ്ജ ഉൽപ്പാദകർ തയ്യാറെടുക്കുകയാണെന്നും അദ്ദേഹം കൂട്ടിച്ചേർത്തു.