തിരുവനന്തപുരം: മുഖ്യമന്ത്രി സ്ഥാനത്തെ ചൊല്ലി കോണ്‍ഗ്രസില്‍ നടക്കുന്ന ചര്‍ച്ചകള്‍ക്കെതിരെ കെ.മുരളീധരന്‍. തെരഞ്ഞെടുപ്പ് ഫലം വരുന്നതിന് മുന്‍പേ മുഖ്യമന്ത്രി സ്ഥാനത്തെ ചൊല്ലി നടക്കുന്ന ചര്‍ച്ചകള്‍ അനാവശ്യമാണെന്ന് അദ്ദേഹം ചൂണ്ടിക്കാട്ടി. വെറുതെ നാട്ടുകാരെക്കൊണ്ട് പറയിപ്പിക്കരുതെന്നും അദ്ദേഹം കൂട്ടിച്ചേര്‍ത്തു. 

സംഘനൃത്തം ചെയ്യേണ്ടിടത്ത് ആരും ഒറ്റക്ക് നൃത്തം ചെയ്യേണ്ടതില്ല. ആരെയും അനുകൂലിച്ച് ഈ അവസരത്തില്‍ പോസ്റ്റ് ഇടുന്നത് ശരിയല്ല. ഇപ്പോള്‍ നടക്കുന്ന ചര്‍ച്ചകള്‍ അനവസരത്തില്‍ ആണെന്നും കെ.മുരളീധരന്‍ പറഞ്ഞു. മുഖ്യമന്ത്രിയെ തീരുമാനിക്കാന്‍ കൃത്യമായ നടപടിക്രമങ്ങളുണ്ടെന്നും അദ്ദേഹം കൂട്ടിച്ചേര്‍ത്തു. 

ALSO READ: കെ.സിയെ പോലെ ദീർഘദൃഷ്ടിയുള്ള നേതാവിനെ കേരളത്തിന് ആവശ്യമുണ്ട്; കെ.സി വേണു​ഗോപാലിനെ പുകഴ്ത്തി കെ സുധാകരൻ

ഇലക്ഷന്‍ റിസള്‍ട്ട് വന്നതിനുശേഷം, എം.എല്‍.എമാരുടെ യോഗം ചേര്‍ന്ന് വേണം പാര്‍ലമെന്ററി പാര്‍ട്ടി നേതാവിനെ തീരുമാനിക്കാന്‍. ഫലം നാലാം തീയതി വൈകുന്നേരത്തോടെ  വ്യക്തമാകും. അതുവരെ ഇത്തരം അനാവശ്യ ബഹളങ്ങള്‍ ഒഴിവാക്കണം- അദ്ദേഹം പറഞ്ഞു. ഒരു ടീമായാണ് ഈ തെരഞ്ഞെടുപ്പില്‍ യു.ഡി.എഫ് പ്രവര്‍ത്തിച്ചത്. മുസ്‌ലിം ലീഗ് ഉള്‍പ്പെടെയുള്ള ഘടകകക്ഷികള്‍ക്ക് തുല്യ പങ്കുണ്ട്. അതുകൊണ്ട് ഏകപക്ഷീയമായ അവകാശവാദങ്ങള്‍ ഉചിതമല്ലെന്നും അദ്ദേഹം ചൂണ്ടിക്കാട്ടി. 

congress leader k muraleedharan criticises early discussions over the chief minister post, stating that such debates are unnecessary before election results and stressing that the decision must follow proper procedures.