ലണ്ടൻ:ഇംഗ്ലീഷ് ഫുട്ബോളിലെ ഇതിഹാസ താരം ഫ്രാങ്ക് ലാംപാർഡിന്റെ കീഴിൽ കോവെൻട്രി സിറ്റിക്ക് ചരിത്ര നേട്ടം. ബ്ലാക്ക്ബേൺ റോവേഴ്സിനെതിരായ നാടകീയമായ സമനിലയോടെ (1-1) കോവെൻട്രി സിറ്റി പ്രീമിയർ ലീഗിലേക്ക് സ്ഥാനക്കയറ്റം (Promotion) നേടി. നീണ്ട 25 വർഷത്തെ വനവാസത്തിന് ശേഷമാണ് 'സ്കൈ ബ്ലൂസ്' ഇംഗ്ലീഷ് ഫുട്ബോളിന്റെ വമ്പൻമാരുടെ തട്ടകത്തിലേക്ക് തിരിച്ചെത്തുന്നത്.

എവുഡ് പാർക്കിലെ നാടകീയ നിമിഷങ്ങൾ

ബ്ലാക്ക്ബേണിന്റെ തട്ടകമായ എവുഡ് പാർക്കിൽ ഒരു പോയിന്റ് നേടിയാൽ കോവെൻട്രിക്ക് പ്രീമിയർ ലീഗ് ഉറപ്പിക്കാമായിരുന്നു. എന്നാൽ തരംതാഴ്ത്തൽ ഒഴിവാക്കാൻ പൊരുതുന്ന ബ്ലാക്ക്ബേൺ രണ്ടാം പകുതിയിൽ ഗോൾ നേടി കോവെൻട്രിയെ ഞെട്ടിച്ചു. കളിയവസാനിക്കാൻ മിനിറ്റുകൾ മാത്രം ബാക്കിനിൽക്കെ 85-ാം മിനിറ്റിൽ ബോബി തോമസ് നേടിയ ഹെഡ്ഡർ ഗോൾ കോവെൻട്രിയുടെ വിധി മാറ്റിമറിച്ചു. സ്റ്റേഡിയത്തിലുണ്ടായിരുന്ന ഏഴായിരത്തോളം വരുന്ന കോവെൻട്രി ആരാധകർ ഈ ഗോളിന് പിന്നാലെ വന്യമായ ആഘോഷങ്ങളിലേക്ക് നീങ്ങി.

വിമർശകരുടെ വായടപ്പിച്ച് ലാംപാർഡ്

പരിശീലകനെന്ന നിലയിൽ തന്റെ പ്രതിച്ഛായ വീണ്ടെടുക്കാൻ ലാംപാർഡിന് ലഭിച്ച വലിയ വിജയമാണിത്.2024 നവംബറിൽ മാർക്ക് റോബിൻസിന് പകരക്കാരനായാണ് ലാംപാർഡ് ചുമതലയേറ്റത്.ആക്രമണ ഫുട്ബോൾ ശൈലിയിൽ ടീമിനെ കളിപ്പിച്ച് ടൂർണമെന്റിൽ ഏറ്റവും കൂടുതൽ ഗോളുകൾ നേടുന്ന ടീമായി അദ്ദേഹം കോവെൻട്രിയെ മാറ്റി.കഴിഞ്ഞ സീസണിലെ പ്ലേ-ഓഫ് തോൽവിയുടെ നിരാശയിൽ നിന്ന് ടീമിനെ ഉയർത്തിക്കൊണ്ടുവരാൻ ലാംപാർഡിന് സാധിച്ചു. 'സൂപ്പർ ഫ്രാങ്കി ലാംപാർഡ്' എന്ന മന്ത്രങ്ങളുമായാണ് ആരാധകർ പുതിയ ഹീറോയെ വരവേറ്റത്.

ദുരന്തങ്ങളിൽ നിന്ന് ഉദിച്ചുയർന്ന നീലപ്പട

2001-ൽ പ്രീമിയർ ലീഗിൽ നിന്ന് പുറത്തായതിന് ശേഷം കോവെൻട്രിക്ക് ഇത് അഗ്നിപരീക്ഷകളുടെ കാലമായിരുന്നു. സ്വന്തം സ്റ്റേഡിയത്തെ ചൊല്ലിയുള്ള തർക്കങ്ങളും ലീഗ് ടു (നാലാം ഡിവിഷൻ) വരെയുള്ള തകർച്ചയും ക്ലബ്ബ് അനുഭവിച്ചു. എന്നാൽ ലാംപാർഡിന്റെ കീഴിൽ നേടിയ ഈ സ്ഥിരത ക്ലബ്ബിന്റെ ചരിത്രത്തിലെ തന്നെ ഏറ്റവും വലിയ തിരിച്ചുവരവായി അടയാളപ്പെടുത്തുന്നു.

ഈ സമനിലയോടെ പോയിന്റ് പട്ടികയിൽ മൂന്നാം സ്ഥാനത്തുള്ള മിൽവാളിന് ഇനി കോവെൻട്രിയെ മറികടക്കാൻ കഴിയില്ല. ഷെഫീൽഡ് വെഡ്‌നസ്‌ഡേയ്‌ക്കെതിരായ കഴിഞ്ഞ മത്സരത്തിലെ തോൽവി മൂലം നീണ്ടുപോയ ആഘോഷങ്ങൾക്കാണ് വെള്ളിയാഴ്ച രാത്രി എവുഡ് പാർക്കിൽ തിരശ്ശീല വീണത്.