കുട്ടികള്‍ക്കും മുതിര്‍ന്നവര്‍ക്കുമൊക്കെ ഒരുപോലെ പ്രിയപ്പെട്ടതാണ് പീനട്ട് ബട്ടര്‍. ഒട്ടും മായമില്ലാതെ നമുക്കിത് വീട്ടില്‍ തന്നെ ഇനി തയ്യാറാക്കാം. കടകളില്‍ നിന്ന് വാങ്ങുന്ന പീനട്ട് ബട്ടറില്‍ അടങ്ങിയിരിക്കുന്ന പ്രിസര്‍വേറ്റീവുകളെയും അമിതമായ പഞ്ചസാരയെയും ഭയക്കാതെ, ശുദ്ധമായ നിലക്കടല ഉപയോഗിച്ച് മിനിറ്റുകള്‍ക്കുള്ളില്‍ ഇത് ഉണ്ടാക്കിയെടുക്കാം. ബ്രെഡിനൊപ്പമോ ചപ്പാത്തിക്കൊപ്പമോ ഒക്കെ ചേര്‍ത്ത് കഴിക്കാന്‍ പറ്റിയ ഈ പ്രോട്ടീന്‍ കലവറ എങ്ങനെയുണ്ടാക്കാം എന്ന് നോക്കാം.

 

ആവശ്യമായ സാധനങ്ങള്‍

നിലക്കടല (തൊലി കളയാത്തത്): 2 കപ്പ് 

ഉപ്പ്- ഒരു നുള്ള്

ഓയില്‍ - (സണ്‍ഫ്‌ലവര്‍ ഓയിലോ പീനട്ട് ഓയിലോ): 2 ടീസ്പൂണ്‍

തേന്‍ അല്ലെങ്കില്‍ പഞ്ചസാര-  മധുരം വേണമെന്നുണ്ടെങ്കില്‍ മാത്രം ആവശ്യത്തിന്.

തയ്യാറാക്കുന്ന വിധം

ആദ്യമായി നിലക്കടല ഒരു പാനിലിട്ട് ചെറിയ തീയില്‍ നന്നായി വറുത്തെടുക്കുക. കരിഞ്ഞുപോവാതെ ശ്രദ്ധിക്കണം.

വറുത്ത കടല ചൂടാറിയ ശേഷം അതിന്റെ തൊലി പൂര്‍ണ്ണമായും കളയുക.

 ALSO READ: ഇത് വേറെ ലെവല്‍ ടേസ്റ്റ്, പക്ഷെ പണി കിട്ടുമോ..? ഇന്റര്‍നെറ്റില്‍ തരംഗമാകുന്ന 'എഗ്ഗ് കോഫി' കുടിക്കുന്നവര്‍ ഇതറിയുക

ഈ കടല ഒരു മിക്‌സി ജാറിലിട്ട് ഒന്ന് മുതല്‍ രണ്ട് മിനിറ്റ് വരെ നന്നായി കറക്കിയെടുക്കുക. ഇടയ്ക്ക് മിക്‌സി നിര്‍ത്തി സ്പൂണ്‍ കൊണ്ട് ഒന്ന് ഇളക്കി കൊടുക്കണം.

കടല പൊടിഞ്ഞ് എണ്ണമയം വരുന്നത് കാണാം. ഈ സമയത്ത് ഇതിലേക്ക് ആവശ്യത്തിന് ഉപ്പും എണ്ണയും ചേര്‍ക്കാം.

 

നിങ്ങള്‍ക്ക് മധുരമുള്ള പീനട്ട് ബട്ടറാണ് വേണ്ടതെങ്കില്‍ ഈ ഘട്ടത്തില്‍ തേനോ പഞ്ചസാരയോ ചേര്‍ക്കാവുന്നതാണ്.

നല്ല ക്രീമി പരുവമാകുന്നത് വരെ മിക്‌സിയില്‍ അടിച്ചെടുക്കുക.

തയ്യാറാക്കിയ പീനട്ട് ബട്ടര്‍ വായു കടക്കാത്ത ഒരു കുപ്പിയിലാക്കി സൂക്ഷിക്കാം. ഫ്രിഡ്ജില്‍ വയ്ക്കുകയാണെങ്കില്‍ ഒരാഴ്ചയോളം ഇതിന്റെ ഗുണം നഷ്ടപ്പെടാതെ ഇരിക്കും. പ്രകൃതിദത്തമായ രീതിയില്‍ തയ്യാറാക്കുന്നതിനാല്‍ കുട്ടികള്‍ക്ക് മിതമായി അളവില്‍ ധൈര്യമായി നല്‍കാവുന്ന പോഷകാഹാരമാണിത്.

 

Learn how to make creamy and nutritious peanut butter at home in just 5 minutes using simple ingredients like roasted peanuts and a bit of oil.