തൃശൂർ: റെയിൽവേ സേവനങ്ങളെല്ലാം ഒരൊറ്റ പ്ലാറ്റ്ഫോമിൽ എന്ന ആശയവുമായി ഇന്ത്യൻ റെയിൽവേ പുറത്തിറക്കിയ റെയിൽ വൺ ആപ്പിലെ കൃത്യതയില്ലായ്മ യാത്രക്കാർക്ക് തലവേദനയാകുന്നു. ടിക്കറ്റ് ബുക്കിങ്, തത്സമയ ട്രെയിൻ വിവരങ്ങൾ, തത്കാൽ സേവനങ്ങൾ എന്നിവ ഒരു പ്ലാറ്റ്ഫോമിൽ ലഭ്യമാക്കുമെന്ന് പ്രഖ്യാപിച്ച് 2025 ജൂലൈയിലാണ് റെയിൽവൺ ആപ്പ്  പുറത്തിറക്കിയത്. എന്നാൽ ഇതിൽ പലപ്പോഴും കൃത്യമായ വിവരങ്ങൾ  ലഭിക്കാത്തത് യാത്രക്കാരെ കുഴക്കുകയാണ്. 

ഭക്ഷണം ഓർഡർ ചെയ്യാനും ട്രെയിൻ വിവരങ്ങളറിയാനും ടിക്കറ്റ് ബുക്കിങ് നടത്താനും വ്യത്യസ്ത ആപ്പുകളായിരുന്നു മുമ്പ് ഉപയോഗിച്ചിരുന്നത്. എന്നാൽ, ഇതുനൊരു പരിഹാരമെന്ന നിലയിൽ സെന്റർ ഫോർ ഇൻഫർമേഷൻ സിസ്റ്റംസാണ്  പുതിയ ഏകീകൃത ആപ്പ് വികസിപ്പിച്ചത്. റിസർവ്, ജനറൽ, സീസൺ, പ്ലാറ്റ്‌ഫോം ടിക്കറ്റുകൾ എന്നിവയെല്ലാം ഒരുപോലെ ബുക്ക് ചെയ്യാമെന്നായിരുന്നു പറഞ്ഞിരുന്നത്. എന്നാൽ, ചിലസമയങ്ങളിൽ  ടിക്കറ്റുകൾ ബുക്ക് ചെയ്യാൻ കഴിയാത്ത സ്ഥിതിയുണ്ട്. ചില ട്രെയിനുകൾ ലഭ്യമല്ലെന്നാണ് ആപ്പിൽ കാണിക്കുമെങ്കിലും സ്റ്റേഷനിൽ നേരിട്ടെത്തിയാൽ ആ ട്രെയിനിൽ കയറി പോകാനാകും. തത്കാൽ ടിക്കറ്റ് ബുക്കിങ്ങിന് ഈ ആപ്പിനെ ആശ്രയിച്ചാൽ കുടുങ്ങുമെന്നും പരാതിയുണ്ട്. പണമടച്ച ശേഷം ആപ്പിൽ ലോഡിങ് സ്‌ക്രീൻ മാത്രമാണ് കാണാനാകുക. ടിക്കറ്റ് ലഭിച്ചതായി സ്ഥിരീകരണവും കിട്ടില്ല. ഇതോടെ പണം നഷ്ടപ്പെടുമോ എന്ന ആശങ്കയുയരും. ടിക്കറ്റ് ലഭിച്ചോ എന്നതിലും അനിശ്ചിതത്വമാകും.

അതേസമയം, സെർവർ തകരാറാണ് തടസങ്ങളുണ്ടാകുന്നതെന്നാണ് റെയിൽവേ പറയുന്നത്.