തിരുവനന്തപുരം: സംസ്ഥാനത്തിന്റെ യഥാര്‍ഥ സാമ്പത്തിക സ്ഥിതി പൊതുജനങ്ങളെ ബോധ്യപ്പെടുത്തുന്നതിനായി 10 ദിവസത്തിനുള്ളില്‍ ധവളപത്രം പുറത്തിറക്കാന്‍ മുഖ്യമന്ത്രി വി.ഡി സതീശന്റെ നേതൃത്വത്തിലുള്ള പുതിയ സര്‍ക്കാര്‍ തീരുമാനിച്ചു. ഇതിന്റെ ഭാഗമായി മുന്‍ കാബിനറ്റ് സെക്രട്ടറി ഡോ. കെ.എം ചന്ദ്രശേഖര്‍ അധ്യക്ഷനായുള്ള വിദഗ്ധ സമിതി രൂപീകരിച്ചു. സമിതിയുടെ ആദ്യ യോഗം ഇന്ന് മുഖ്യമന്ത്രിയുടെ അധ്യക്ഷതയില്‍ ചേരും. പ്രതിപക്ഷ നേതാവായിരിക്കെ ഖജനാവ് ശൂന്യമാണെന്ന് വി.ഡി സതീശന്‍ ഉന്നയിച്ച ആക്ഷേപങ്ങളുടെ പശ്ചാത്തലത്തിലാണ് ഈ നീക്കം.

ആദ്യ മന്ത്രിസഭാ യോഗത്തിന് ശേഷം നടത്തിയ വാര്‍ത്താ സമ്മേളനത്തിലാണ് ധവളപത്രം ഇറക്കുമെന്ന പ്രഖ്യാപനം മുഖ്യമന്ത്രി നടത്തിയത്. സാമ്പത്തിക പ്രതിസന്ധികള്‍ക്കിടയിലും മുന്‍പ് നല്‍കിയ വാഗ്ദാനങ്ങളില്‍ നിന്ന് സര്‍ക്കാര്‍ പിന്നോട്ടില്ലെന്ന് അദ്ദേഹം ഉറപ്പുനല്‍കി.

ഇന്ദിരാ ഗ്യാരണ്ടിയും സ്ത്രീകള്‍ക്ക് കെ.എസ്.ആര്‍.ടി.സി ബസുകളില്‍ സൗജന്യ യാത്രയും സര്‍ക്കാര്‍ പ്രഖ്യാപിച്ചിട്ടുണ്ട്. ഇതിന് പുറമെ ആശാ വര്‍ക്കര്‍മാര്‍ക്ക് 3000 രൂപയുടെ താത്കാലിക വര്‍ധനവും അങ്കണവാടി ജീവനക്കാര്‍, പ്രീപ്രൈമറി അധ്യാപകര്‍ എന്നിവര്‍ക്ക് ആശ്വാസ ധനസഹായവും പ്രഖ്യാപിച്ചു. വിരമിക്കല്‍ ആനുകൂല്യങ്ങളുടെ സാമ്പത്തിക ബാധ്യത കണക്കാക്കാന്‍ മറ്റൊരു സമിതിയെയും ചുമതലപ്പെടുത്തിയിട്ടുണ്ട്. നിലവിലെ സാമ്പത്തിക ബാധ്യതകള്‍ പൂര്‍ണ്ണമായി പഠിച്ച ശേഷം ബാക്കി പ്രഖ്യാപനങ്ങളിലേക്ക് കടക്കാനാണ് സര്‍ക്കാരിന്റെ തീരുമാനം.

Chief Minister V.D. Satheesan has announced that a white paper on the state's financial status will be released within 10 days, following an assessment by an expert committee led by Dr. K.M. Chandrasekhar.