ബംഗളുരു:  രാഷ്ട്രീയ തന്ത്രജ്ഞന്‍ സുനില്‍ കനഗോലുവിനെ മുഖ്യഉപദേശകനായി നിയമിച്ച് ഡി.കെ ശിവകുമാര്‍. കാബിനറ്റ് റാങ്കോടെയാണ് നിയമനം. പൊളിറ്റിക്കല്‍ കണ്‍സല്‍ട്ടന്‍സി സ്ഥാപനമായ ഇന്‍ക്ലൂസിവ് മൈന്‍ഡ്സിന്റെ തലവനായ കനഗോലു നേരത്തെ സിദ്ധരാമയ്യ മുഖ്യമന്ത്രിയായിരുന്നപ്പോഴും മുഖ്യ ഉപദേഷ്ടാവെന്ന റോളില്‍ പ്രവര്‍ത്തിച്ചിരുന്നു. 

കഴിഞ്ഞ കര്‍ണാടക നിയമസഭാ തെരഞ്ഞെടുപ്പ് കാലത്ത് കോണ്‍ഗ്രസ് പ്രചാരണത്തിന് രൂപം നല്‍കുന്നതില്‍ പ്രധാന പങ്കുവഹിച്ചയാളാണ് കനഗോലു. പേ സി എം' പ്രചാരണവും പാര്‍ട്ടി ഗ്യാരണ്ടികളും ഉള്‍പ്പെടെയുള്ള പ്രധാന പ്രചാരണ ആശയങ്ങള്‍ക്ക് പിന്നിലും അദ്ദേഹമാണ്. 

പ്രശാന്ത് കിഷോറിന്റെ നേതൃത്വത്തിലുള്ള സിറ്റിസണ്‍സ് ഫോര്‍ അക്കൗണ്ടഡബിള്‍ ഗവേണന്‍സ് എന്ന ടീമിലെ അംഗമായാണ് അദ്ദേഹം രാഷ്ട്രീയ രംഗത്തേക്ക് എത്തുന്നത്. 2014 ല്‍ മോദിക്കുവേണ്ടിയുള്ള പ്രചാരണങ്ങളില്‍ സജീവമായിരുന്നു. 

പിന്നീട് ബി.ജെ.പിയുടെ പ്രചാരണ പ്രവര്‍ത്തനങ്ങള്‍ക്കായി അസോസിയേഷന്‍ ഓഫ് ബ്രില്യന്റ് മൈന്‍ഡ് (എ.ബി.എം) എന്ന സംഘടനയ്ക്ക് രൂപം നല്‍കി. ഉത്തര്‍പ്രദേശ്, ഉത്തരാഖണ്ഡ്, ഗുജറാത്ത്, ഹിമാചല്‍പ്രദേശ് എന്നിവിടങ്ങളില്‍ ബി.ജെ.പിയുടെ വിജയത്തിനായി പ്രവര്‍ത്തിച്ചു. 2022 മെയ് മാസത്തിലാണ് കനഗോലു ഔദ്യോഗികമായി കോണ്‍ഗ്രസില്‍ ചേര്‍ന്നത്.

ഭരണനിര്‍വ്വഹണം, പൊതുജനസമ്പര്‍ക്കം, നയപരമായ ആശയവിനിമയം, ഭരണപരമായ പരിഷ്‌കാരങ്ങള്‍ എന്നിവയില്‍ ശിവകുമാര്‍ കനഗോലുവിന്റെ ഉപദേശം തേടിയേക്കും.  2028ലെ നിയമസഭാ തെരഞ്ഞെടുപ്പിലും കര്‍ണാടകയില്‍ വിജയം ഉറപ്പാക്കാവുന്ന വിധത്തിലായിരിക്കും കനഗോലുവിനെ ഉള്‍പ്പെടുത്തിയുള്ള ശിവകുമാറിന്റെ പ്രവര്‍ത്തനം.

Karnataka Deputy Chief Minister DK Shivakumar has appointed Kanagolu as his chief advisor, granting the position cabinet rank. The appointment is seen as a significant administrative decision within the state leadership, aiming to strengthen advisory support in governance and policy matters. The move highlights internal restructuring and strategic planning within the government framework.