ചെന്നൈ: ലോക്‌സഭാ തെരഞ്ഞെടുപ്പിന് മുന്നോടിയായി പ്രധാനമന്ത്രി നരേന്ദ്ര മോദി തമിഴ്‌നാട്ടില്‍ പ്രചാരണത്തിനെത്തിയാല്‍ അത് ഡി.എം.കെയ്ക്ക് ഗുണകരമാകുമെന്ന്  എം.കെ സ്റ്റാലിന്‍. ഇന്ത്യ ടുഡേയ്ക്ക് നല്‍കിയ അഭിമുഖത്തിലാണ് മുഖ്യമന്ത്രിയുടെ പ്രതികരണം. പുതുച്ചേരിയിലും തമിഴ്‌നാട്ടിലുമായി ഡി.എം.കെ- ഇന്ത്യ മുന്നണി സഖ്യം 40 സീറ്റുകള്‍ നേടി വിജയിക്കുമെന്നും സ്റ്റാലിന്‍ പറഞ്ഞു. 

ബി.ജെ.പിയുടെ കള്ളക്കളികളെ കുറിച്ച് തമിഴ്‌നാട്ടിലെ ജനങ്ങള്‍ക്ക് നല്ല ബോധ്യമുണ്ട്. മോദി പ്രഭാവം എന്ന സംഭവം തമിഴ്‌നാട്ടിലില്ല. ബി.ജെ.പിക്ക് തമിഴ്‌നാട്ടില്‍ ശക്തിയുണ്ടെന്ന് കാണിക്കുന്നതൊക്കെ ബി.ജെ.പിയുടെ വെറും നാടകം മാത്രമാണ്. മത്സരം ഡി.എം.കൈയും എ.ഐ.ഡി.എം.കെയും തമ്മിലാണ്. ഇവര്‍ രണ്ട് പേരും മത്സരിക്കുന്നത് രണ്ടാം സ്ഥാനത്തേക്കാണെന്ന് മാത്രം,' സ്റ്റാലിന്‍ പറഞ്ഞു. 

വരുന്ന ലോക്‌സഭാ തെരഞ്ഞെടുപ്പില്‍ ഇന്‍ഡ്യ മുന്നണി അധികാരത്തില്‍ വരുമെന്നും സ്റ്റാലിന്‍ കൂട്ടിച്ചേര്‍ത്തു. 

നേരത്തെ സംസ്ഥാനങ്ങളോടുള്ള കേന്ദ്ര അവഗണനയ്‌ക്കെതിരെയും സ്റ്റാലിന്‍ രംഗത്തെത്തിയിരുന്നു. അടിയന്തിര ഘട്ടത്തില്‍ കേന്ദ്രസഹായം ചോദിക്കുമ്പോള്‍ ഒരു ബന്ധവുമില്ലാത്ത കണക്കുകളാണ് പറയുന്നതെന്നും, ധനകാര്യ മന്ത്രി നിര്‍മല സീതാരാമന്‍ ബ്ലേഡ് പലിശക്കാരെപ്പോലെ പെരുമാറുകയാണെന്നും സ്റ്റാലിന്‍ പറഞ്ഞിരുന്നു. 

'ജനങ്ങള്‍ക്ക് ദുരിതാശ്വാസ സഹായം നല്‍കുന്നതിനെ ഭിക്ഷയെന്നാണ് നിര്‍മല സീതാരാമന്‍ വിശേഷിപ്പിക്കുന്നത്. തമിഴ്‌നാട് സര്‍ക്കാര്‍ വിദേശത്ത് നിന്ന് സ്വീകരിക്കുന്ന വായ്പയെ ധനമന്ത്രി കേന്ദ്രസഹായമായി ചിത്രീകരിക്കുകയാണ്,' സ്റ്റാലി പറഞ്ഞിരുന്നു.

ചെന്നൈയിലെ തെരഞ്ഞെടുപ്പ് പ്രചരണ യോഗത്തിലായിരുന്നു സ്റ്റാലിന്റെ പ്രതികരണം.