നെടുമ്പാശ്ശേരി: ഓട്ടോറിക്ഷാ ഡ്രൈവര്‍മാര്‍ ഓട്ടം വരാന്‍ വിസമ്മതിച്ചത് മൂലമാണ് ചികിത്സ ലഭിക്കാതെ വീട്ടമ്മ മരിക്കാനിടയായതെന്നാരോപിച്ച് ബി.ജെ.പി പ്രവര്‍ത്തകര്‍ ചെങ്ങമനാട് ജംഗ്ഷനിലെ ഓട്ടോസ്റ്റാന്റ് ഉപരോധിക്കുകയും സര്‍വീസ് തടയുകയും ചെയ്തു. കുറ്റക്കാരായ ഓട്ടോ ഡ്രൈവര്‍മാരുടെ പേരില്‍ നടപടി ആവശ്യപ്പെട്ടായിരുന്നു സമരം. കഴിഞ്ഞ ദിവസം കുളിമുറിയില്‍ കുഴഞ്ഞ് വീണതിനെ തുടര്‍ന്ന് ചികില്‍ത്സ ലഭിക്കാന്‍ താമസം നേരിട്ടത് മൂലം  ചെങ്ങമനാട്  കോവാട്ട് വീട്ടില്‍ രാമകൃഷ്ണന്റെ ഭാര്യ സുമമാണ് (48) ചാലാക്ക മെഡിക്കല്‍ കോളജ് ആശുപത്രിയില്‍ മരണപ്പെട്ടത്.
സുമം കുഴഞ്ഞ് വീഴുമ്പോള്‍ വീട്ടില്‍ പെണ്‍മക്കള്‍ മാത്രമാണ് ഉണ്ടായിരുന്നത്. ഇവരുടെ കരച്ചില്‍ കേട്ട് ഓടിയെത്തിയ അയല്‍വാസിയാണ് ആശുപത്രിയില്‍ കൊണ്ടുപോകാന്‍ ചെങ്ങമനാട് ഓട്ടോ സ്റ്റാന്‍ഡില്‍ പൊതുവായി ഏര്‍പ്പെടുത്തിയിട്ടുള്ള ഫോണില്‍ വിളിച്ചത്. ഉള്‍വഴിയിലൂടെ ഓട്ടോ കൊണ്ടുവരാന്‍ കഴിയില്ലെന്നും രോഗിയെ റോഡില്‍ എത്തിക്കാനുമായിരുന്നു ഓട്ടോ ഡ്രൈവറുടെ മറുപടി. തുടര്‍ന്ന് മെയിന്‍ റോഡില്‍ എത്തിച്ച് ഏറെ നേരം കാത്ത് നിന്നെങ്കിലും ഓട്ടോ വന്നില്ല.
തുടര്‍ന്ന് പാലപ്രശ്ശേരി ഭാഗത്ത് നിന്ന് വരികയായിരുന്ന ഓട്ടോയില്‍ കയറ്റി ആശുപത്രിയിലെത്തിച്ചെങ്കിലും മരണം സംഭവിക്കുകയായിരുന്നു. പിന്നീട് നാട്ടുകാരുടെ പ്രതിഷേധത്തത്തെുടര്‍ന്ന്  ഓട്ടോ ഡ്രൈവര്‍മാര്‍ ചെങ്ങമനാട് പൊലീസ് സ്റ്റേഷനിലെത്തി ഖേദം പ്രകടിപ്പിക്കുകയും മേലില്‍ ഇത്തരം സംഭവം ആവര്‍ത്തിക്കാതിരിക്കാന്‍ ജാഗ്രത പുലര്‍ത്തുമെന്ന് എസ്.ഐ മുന്‍പാകെ ഉറപ്പ് നല്‍കുകയും ചെയ്തിരുന്നു.
എന്നാല്‍ ഇതില്‍ തൃപ്തരാകാതെയാണ് ഇന്നലെ രാവിലെ ബി.ജെ.പി.പ്രവര്‍ത്തകര്‍ സര്‍വീസ് തടയുകയും ചെയ്തത്. പഞ്ചായത്തംഗങ്ങളായ എം.ബി.രവി, എം.എസ്.ലിമ, നേതാക്കളായ മിഥുന്‍ ചെങ്ങമനാട്, സി.സുമേഷ്, എ.കെ.രതീഷ്,പി.വേണു, എം.ആര്‍.രാധാകൃഷ്ണന്‍,ധനുഷ് തുടങ്ങിയവര്‍ നേതൃത്വം നല്‍കി.
അതേസമയം സംഭവം മനപ്പൂര്‍വമുണ്ടായതല്ലെന്നും അസ്വാഭാവികമായുണ്ടായ സംഭവത്തില്‍ സ്വയം ഖേദിക്കുന്നതായും സ്റ്റാന്‍ഡ് ലീഡര്‍ എം.പി സുരേഷും യൂനിയന്‍ സെക്രട്ടറി ഇ.ടി.സുഭാഷും പറഞ്ഞു.