തൃശൂര്‍: കമ്പോളത്തില്‍ അധിഷ്ഠിതമായ ഒരു സദാചാരസംഹിത പ്രാവര്‍ത്തികമാക്കാനാണ് മതങ്ങള്‍ പോലും സ്ത്രീകളെ പ്രേരിപ്പിക്കുന്നതെന്ന് സാഹിത്യ അക്കാദമി വൈസ് പ്രസിഡന്റ് ഡോ. ഖദീജ മുംതാസ്. സ്ത്രീ എഴുത്തിലും ജീവിതത്തിലും എന്ന വിഷയത്തില്‍ സദസ്സ് സാഹിത്യ വേദി സംഘടിപ്പിച്ച കാരൂര്‍ സ്മൃതി പ്രഭാഷണം നിര്‍വഹിക്കുകയായിരുന്നു അവര്‍.
കമ്പോളത്തിന്റെ പുതുപ്രവണതകളെ നിറവേറ്റുകയാണ് സ്ത്രീയുടെ ഉത്തരവാദിത്വം എന്നതാണ് പുതിയ സംസ്‌കാരം പഠിപ്പിക്കുന്നത്. ഇതിലൂടെ രാഷ്ട്രീയ നേട്ടമുണ്ടാക്കാനാണ് മതങ്ങള്‍പോലും ശ്രമിക്കുന്നത്. സ്വതന്ത്രമായ സംസ്‌കാരം രൂപപ്പെടുത്താനും സ്വന്തം നിലയില്‍ തന്നെ ഒരപരജീവിതം കെട്ടിപ്പടുക്കാനും സ്ത്രീയെ പ്രാപ്തരാക്കുകയാണ് സാഹിത്യം ചെയ്യുന്നത്. സ്തീസാഹിത്യമായാലും പുരുഷ സാഹിത്യമായാലും അടഞ്ഞ ജീവിതങ്ങളെ തുറന്നു വിടുകയാണ് ചെയ്യുന്നതെന്ന് അവര്‍ പറഞ്ഞു.
സദസ്സ് പ്രസിഡന്റ് ഡോ. സി.എന്‍ പരമേശ്വരന്‍ അധ്യക്ഷനായി. തുടര്‍ന്ന് ടി.കെ ശങ്കരനാരായണന്റെ ഫാര്‍മ മാര്‍ക്കറ്റ് എന്ന നോവലിനെക്കുറിച്ച് ചര്‍ച്ച നടന്നു. ഡോ. പി.ഗീത പുസ്തകം പരിചയപ്പെടുത്തി. ഡോ. സുപ്രിയ, ബോബന്‍ കൊള്ളന്നൂര്‍, ടി.കെ ശങ്കരനാരായണന്‍, മധു നുറുങ്ങ്, ജേക്കബ് ബെഞ്ചമിന്‍ എന്നിവര്‍ പ്രസംഗിച്ചു.