മലപ്പുറം: ഭക്ഷ്യവകുപ്പിനു കീഴില്‍ നിയോജക മണ്ഡലാടിസ്ഥാനത്തില്‍ ഭക്ഷ്യസുരക്ഷാ ഓഫിസുകള്‍ തുടങ്ങാന്‍ തീരുമാനമായിട്ടു മാസങ്ങളായെങ്കിലും ഇവയ്ക്കു കെട്ടിടങ്ങളായില്ല. ഭക്ഷ്യവസ്തുക്കളുമായി ബന്ധപ്പെട്ട പരിശോധനകള്‍ കര്‍ശനമാക്കുന്നതന്റെ ഭാഗമായാണ് ജില്ലയില്‍ 16 നിയോജക മണ്ഡലങ്ങളിലും സബ് ഓഫിസുകള്‍ തുടങ്ങാന്‍ ഉത്തരവായിരുന്നത്.
ജില്ലയിലെ ആയിരക്കണക്കിനു ഭക്ഷണശാലകളിലും മറ്റു കച്ചവട സ്ഥാപനങ്ങളിലും ഭക്ഷ്യസുരക്ഷാ വകുപ്പിന്റെ നേതൃത്വത്തില്‍ പരിശോധന നടക്കാറുണ്ട്. ജില്ലാ ഭക്ഷ്യസുരക്ഷാ ഓഫിസിലെ ഉദ്യോഗസ്ഥരാണ് പരിശോധനയ്ക്കു നേതൃത്വം നല്‍കാറുള്ളത്. എന്നാല്‍, ഉദ്യോഗസഥരുടെ അഭാവംമൂലം ഈ പരിശോധ പലപ്പോഴും കര്‍ശനമായി നടക്കാറില്ല. ഇതിനു പരിഹാരാമായാണ് നിയോജക മണ്ഡലാടിസ്ഥാനത്തില്‍ ഭക്ഷ്യസുരക്ഷാ ഓഫിസുകള്‍ തുടങ്ങാന്‍ ധാരണയായിരുന്നത്.
അതേസമയം, ഓഫിസുകളിലേക്കുള്ള വിവിധ തസ്തികകളിലേക്കു ജീവനക്കാര്‍ എത്തിത്തുടങ്ങിയിട്ടുണ്ട്. നാലിടങ്ങളില്‍ മാത്രമാണ് ഇതുവരെ കെട്ടിടം കണ്ടെത്തിയിട്ടുള്ളത്. ഓഫിസര്‍മാരെത്തിയാല്‍ ഇരിക്കാന്‍പോലും സ്ഥലമില്ലെന്നതാണ് അവസ്ഥ. ജില്ലാ ഓഫിസും മലപ്പുറം സര്‍ക്കിള്‍ ഓഫിസും സിവില്‍സ്റ്റേഷനിലെ ഒരു കെട്ടിടത്തിലാണുള്ളത്. 16 ഓഫിസുകളിലേക്കുള്ള ക്ലര്‍ക്കുമാര്‍ എത്തിയതോടെത്തന്നെ ഓഫിസില്‍ നിന്നുതിരിയാന്‍ ഇടമില്ല. സര്‍ക്കാര്‍ നല്‍കുന്ന വാടകയ്ക്കു മുറി കിട്ടാനില്ലാത്തതിനാലാണ് ഓഫിസ് തുടങ്ങാന്‍ സാധിക്കാത്തതെന്നാണ് അധികൃതരുടെ വിശദീകരണം.
ഭക്ഷ്യസുരക്ഷാ വിഭാഗത്തില്‍ കാലങ്ങളായി തുടരുന്ന ജീവനക്കാരുടെ ക്ഷാമത്തിനു പരിഹാരമുണ്ടാകാത്തതിനാല്‍ ഫീല്‍ഡ് പരിശോധനകളെയും കാര്യമായി ബാധിക്കുന്നുണ്ട്. ജില്ലയ്ക്ക് ആവശ്യമുള്ളതിന്റെ പകുതി ജീവനക്കാര്‍പോലുമില്ല. ഒരു സര്‍ക്കിള്‍ ഓഫിസര്‍ക്ക് നാലോ അഞ്ചോ സര്‍ക്കിളുകള്‍വരെ നോക്കേണ്ട അവസ്ഥയുണ്ട്. ഹോട്ടല്‍ ഭക്ഷണത്തിന്റെ ഗുണനിലവാരത്തില്‍ മാറ്റമില്ലാത്തതിനു കാരണവും ഇതുതന്നെയാണ്.