ചാലിയം: ഉമ്പിച്ചി ഹാജി ഹയര്‍ സെക്കന്‍ഡറി സ്‌കൂള്‍ എന്‍.എസ്.എസ് യൂനിറ്റിന്റെ നേതൃത്വത്തില്‍ സാമൂഹിക വികസന പദ്ധതി പ്രഖ്യാപനം ചാലിയം ഗവ. ഫിഷറീസ് എല്‍.പി സ്‌കൂളില്‍ നടന്നു. ചാലിയം തീരദേശ മേഖലയിലെ പ്രൈമറി സ്‌കൂള്‍ വിദ്യാര്‍ഥികളുടെ ആരോഗ്യ വിദ്യാഭ്യാസ സേവന പ്രവര്‍ത്തനങ്ങളാണ് എന്‍.എസ്.എസ് സാമൂഹിക പദ്ധതി വിഭാവനം ചെയ്യുന്നത്.
തീരദേശ മേഖലയിലെ പൊതുജനങ്ങള്‍ക്കായി മെഡിക്കല്‍ ക്യാംപ്, രക്ഷാകര്‍തൃ ബോധവല്‍കരണ ക്ലാസ്, കംപ്യൂട്ടര്‍ സാക്ഷരതാ യജ്ഞം, വിദ്യാഭ്യാസ പ്രോല്‍സാഹന പരിപാടികള്‍ എന്നിവയടങ്ങിയ ത്രൈമാസ പരിപാടികള്‍ക്കുള്ള കര്‍മസമിതി രൂപം നല്‍കി. കടലുണ്ടി ഗ്രാമപഞ്ചായത്തംഗം വി. ജമാല്‍ ചടങ്ങ് ഉദ്ഘാടനം ചെയ്തു. കടലുണ്ടി ഗ്രാമപഞ്ചായത്തംഗം ആയിഷാബി പദ്ധതി പ്രഖ്യാപനം നടത്തി. എന്‍.എസ്.എസ് പ്രോഗ്രാം ഓഫിസര്‍ ഡോ. കെ.വി മുഹമ്മദ് അധ്യക്ഷനായി. കര്‍മസമിതി കണ്‍വീനര്‍ പി. അഹമ്മദ് ബദര്‍ പദ്ധതി വിശദീകരിച്ചു. ചടങ്ങില്‍ സ്‌കൂളിലെ മുഴുവന്‍ വിദ്യാര്‍ഥികള്‍ക്കും ഭക്ഷണം കഴിക്കാനുള്ള പ്ലേറ്റിന്റെയും ഗ്ലാസിന്റെയും വിതരണോദ്ഘാടനം പി.ടി.എ പ്രസിഡന്റ് കെ.പി അഷ്‌റഫ് നിര്‍വഹിച്ചു.
സ്‌കൂള്‍ പ്രിന്‍സിപ്പല്‍ എം.വി സൈദ് ഹിസാമുദ്ദീന്‍, പി. അബ്ദുന്നസീര്‍, ഫിഷറീസ് എല്‍.പി സ്‌കൂള്‍ ഹെഡ്മാസ്റ്റര്‍ വിശ്വനാഥന്‍, എ. അബ്ദുറഹിം, ഉമ്മര്‍ പെരിഞ്ചിരി, എം.സി നസീമ, പി. ഫവാസ്, പി. ജയമോള്‍, വി.സി ആരിഫ് സംസാരിച്ചു.